Sin City » ᴀ ʀᴇᴛᴀʟɪᴀᴛᴇ
■ ലോകത്തിലെ ഏറ്റവും മികച്ച ആന്തോളജി ഫിലിമുകളെക്കുറിച്ച് സംസാരിക്കുമ്പോൾ സിൻ സിറ്റിയെക്കുറിച്ച് തീർച്ചയായും പറഞ്ഞിരിക്കണം. വ്യത്യസ്തമായ നാല് കഥകൾ, പക്ഷേ നാലും തമ്മിൽ കെട്ടുപിണഞ്ഞു
കിടക്കുന്നു. ഫ്രാങ്ക് മില്ലറുടെ ഇതേപേരിലുള്ള നോവലിനെ ആസ്പദമാക്കി ഫ്രാങ്ക് മില്ലറും റോബർട്ട് റോഡ്രിഗസുമാണ് തിരക്കഥ രചിച്ചിരിക്കുന്നത്. അവർ രണ്ടുപേരും തന്നെയാണ് സംവിധാനവും നിർവ്വഹിച്ചിരിക്കുന്നത്. ഒപ്പം വിശ്വപ്രസിദ്ധ സംവിധായകൻ ക്വന്റിൻ ടാരന്റിനോയും അതിഥി സംവിധായകനായി എത്തിയിട്ടുണ്ട്.
ചിത്രത്തിലെ കളർ കോമ്പിനേഷനെക്കുറിച്ച് പറയാതെ വയ്യ, ഭൂരിഭാഗവും ബ്ലാക്ക് & വൈറ്റിൽ ചിത്രീകരിച്ചിരിക്കുന്ന ഈ സിനിമ ചില പ്രത്യേക നിറങ്ങളെമാത്രം ഫോക്കസ് ചെയ്ത് പ്രതിഫലിപ്പിച്ചിരിക്കുന്നു. റോബർട്ട് റോഡ്രിഗസാണ് ഛായാഗ്രഹണവും ചിത്രസംയോജനവും നിർവ്വഹിച്ചിരിക്കുന്നത്. കൂടാതെ, ജോൺ ഡെബ്നിയുടെയും ഗ്രാമി റിവല്ലിന്റെയും കൂടെ സംഗീതത്തിലും ഒരു കൈനോക്കിയിട്ടുണ്ട് റോബർട്ട്.
✍sʏɴᴏᴘsɪs
■ ക്രൈമുകളിൽ മുങ്ങിക്കുളിച്ചു നിൽക്കുന്നതുകൊണ്ട് ബേസിൻ സിറ്റിക്ക് കിട്ടിയ ഇരട്ടപ്പേരാണ് "സിൻ സിറ്റി". ബേസിൻ സിറ്റിയിലെ രാത്രി ജീവിതമാണ് ചിത്രത്തിൻറെ പ്രമേയമായിരിക്കുന്നത്. ഉദ്യോഗസ്ഥ സമൂഹവും പോലീസും ഗവണ്മെന്റും അഴിമതിയിൽ മുങ്ങിനിൽക്കുന്നു. പാപങ്ങളുടെ നഗരത്തിൽ അവരെ എതിർത്തുതോൽപ്പിക്കാൻ അവതാരമെടുത്ത, അല്ലെങ്കിൽ മറ്റുള്ളവർ ചെയ്ത അഴിമതികാരണം പ്രതിക്കൂട്ടിൽ നിൽക്കേണ്ടി വരുന്ന മൂന്ന്‌ നായകന്മാരുടെ കഥയാണിത്.
"That Yellow Bastard"
ബേസിൻ സിറ്റിയിലെ മുതിർന്ന ഒരു പോലീസ് ഉദ്യോഗസ്ഥനായിരുന്ന ജോൺ ഹാർട്ടിഗൻ നഗരത്തിലെ ഒരു സീരിയൽ കില്ലറെ തടയാനുള്ള ശ്രമം നടത്തുന്നു. പിഞ്ചുകുട്ടികളെ ബലാത്സംഗം ചെയ്തു കൊല്ലുന്ന റോർക്ക് ജൂനിയറുടെ നാലാമത്തെ ഇരയായിരുന്ന പതിനൊന്നുകാരി നാൻസി കലഹാനെ ഹാർട്ടിഗൻ റോർക്കിൽ നിന്നും രക്ഷിക്കുന്നു. പക്ഷേ, സെനറ്റർ റോർക്കിന്റെ മകനായിരുന്ന ജൂനിയർ റോർക്കിനെ രക്ഷിക്കാൻ സെനറ്ററും പോലീസുകാരും ചേർന്ന് ഹാർട്ടിഗനെ പ്രതിയെന്ന് മുദ്രകുത്തി ജയിലിലടയ്ക്കുന്നു.
"The Customer Is Always Right"
ബാൽക്കണിയിൽ നിന്നും ബേസിൻ നഗരത്തെ നോക്കിക്കൊണ്ടിരുന്ന യുവതിയെ മധുര വാക്കുകൾ പറഞ്ഞുകൊണ്ട് വളരെയെളുപ്പത്തിൽ ഇമ്പ്രസ്സ് ചെയ്യിക്കുന്ന ആ യുവാവ് അവളെ സൈലൻസർ ഘടിപ്പിച്ച തോക്കുകൊണ്ട് കൊന്നുകളയുന്നു.
"The Hard Goodbye"
തന്റെകൂടെ ഒരു രാത്രി ചെലവഴിച്ച ഗോൾഡി എന്ന അഭിസാരികയെ പിറ്റേന്ന് പുലർച്ചെ ഉറക്കമുണർന്ന മാർവ് കാണുന്നത് കൊല്ലപ്പെട്ടനിലയിലായിരുന്നു. പോലീസിന്റെ പിടിയിൽ നിന്നും സാഹസികമായി രക്ഷപ്പെടുന്ന അയാൾ ഗോൾഡിയെ കൊന്നവനോട് പ്രതികാരം ചെയ്യാൻ ദൃഢനിശ്ചയമെടുക്കുന്നു.
"The Big Fat Kill"
തന്റെ കാമുകിയായ ഷെല്ലിയെ ശല്യപ്പെടുത്തിയ ഷെല്ലിയുടെ പൂർവ്വകാമുകൻ ജാക്കി ബോയിയെ ഡ്വൈറ്റ് വളരെ ക്ഷുഭിതനായി വാർൺ ചെയ്യുന്നു. പക്ഷേ ഷെല്ലിയുടെ വീട്ടിൽ നിന്നിറങ്ങിയ ജാക്കി ബോയിയും സുഹൃത്തുക്കളും ബെക്കി എന്ന പെൺകുട്ടിയെ നഗരമധ്യത്തിൽ വെച്ച് ശല്യം ചെയ്യുന്നതായി ഡ്വൈറ്റ് കാണുന്നു. ഡ്വൈറ്റിന്റെ സുഹൃത്തുക്കളായ ഗെയ്‌ലും മിഹോയും ഇത് ശ്രദ്ധിക്കുന്നുണ്ടായിരുന്നു. ബെക്കിയെ ഭീഷണിപ്പെടുത്തുന്ന ജാക്കി ബോയിയെയും സുഹൃത്തുക്കളെയും മിഹ വധിക്കുന്നു.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ബ്രൂസ് വില്ലിസാണ് ജോൺ ഹാർട്ടിഗനെ അവതരിപ്പിച്ചിരിക്കുന്നത്. നാൻസി കലഹാനായി ജെസീക്ക ആൽബയും അഭിനയിച്ചിരിക്കുന്നു. പതിനൊന്നു വയസ്സുള്ള നാൻസിയായി മകെൻസി വേഗയാണ്‌ അഭിനയിച്ചിരിക്കുന്നത്. മിക്കി റൂർക്കിയാണ് മാർവിന്റെ വേഷം ചെയ്തിരിക്കുന്നത്. ഗോൾഡിയായും വെന്റിയായും ജെയ്‌മി കിംഗ് അഭിനയിച്ചിരിക്കുന്നു. ഡ്വൈറ്റ് മക്കാർത്തിയായി അഭിനയിച്ചിരിക്കുന്നത് ക്ലൈവ് ഓവനാണ്. ബ്രിട്ടനി മർഫി ഷെല്ലിയെയും റൊസാരിയോ ഡൗസൺ ഗെയ്ലിനെയും ഡെവോൺ ഓക്കി മിഹോയേയും അവതരിപ്പിച്ചിരിക്കുന്നു. അലക്സിസ് ബ്ലെഡൽ (ബെക്കി), കാർല ഗുഗിനോ (ലുസില്ലെ), പവേഴ്സ് ബൂത്ത് (സെനറ്റർ റോർക്), ബെനിസിയോ ഡെൽ ടോറോ (ജാക്കി ബോയ്), മൈക്കൽ ക്ലാർക് ഡങ്കൺ (മനൂറ്റ്), റിക്ക് ഗോമസ് (ഡഗ്ലസ് ക്ലമ്പ്), ജോഷ് ഹാർട്ട്നെറ്റ് (സെയിൽസ്മാൻ), റുറ്റ്ഗർ ഹോവർ (കർഡിനാൾ പാട്രിക് ഹെൻറി റോർക്), മർലി ഷെൽട്ടൻ (കസ്റ്റമർ), നിക്ക് സ്റ്റാൾ (റോർക് ജൂനിയർ), എലിജ വുഡ് (കെവിൻ) തുടങ്ങിയവരാണ് മറ്റു പ്രധാന അഭിനേതാക്കൾ.
📎 ʙᴀᴄᴋwᴀsʜ
■ ചിത്രത്തിലെ പ്രത്യേക തരത്തിലുള്ള കളർ കോമ്പിനേഷൻ കാൻസ് ഫിലിം ഫെസ്റ്റിവലിൽ സാങ്കേതികവിദ്യക്കുള്ള ഗ്രാൻഡ്പ്രൈസ്‌ നേടിക്കൊടുത്തു.
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ