For A Few Dollars More » ᴀ ʀᴇᴛᴀʟɪᴀᴛᴇ
■ ലോക ചരിത്രത്തിൽ തന്നെ ഏറ്റവും കൂടുതൽ തവണ പ്രതിപാദിപ്പിക്കപ്പെട്ടിട്ടുള്ളത് മനുഷ്യന്റെ അത്യാഗ്രഹത്തെക്കുറിച്ചാകും. സമ്പത്തുകൾ ഒറ്റയ്ക്ക് സ്വന്തമാക്കാനുള്ള സ്വാർത്ഥത മനുഷ്യ നിർമ്മിതമായ പല കഥകളിലും വിഷയമായി. മനുഷ്യന്റെ അത്യാഗ്രഹത്തിന്റെ കഥയ്ക്കൊപ്പം ഒരു മധുരപ്രതികാരത്തിന്റെ കഥയും കൂടി പറയുന്നു, ക്ലിന്റ് ഈസ്റ്റ്വുഡിനെ നായകനാക്കി സെർജിയോ ലിയോണി സംവിധാനം നിർവഹിച്ചിരിക്കുന്ന വെസ്റ്റേൺ ജോണറിന്റെ തന്നെ ഉപവിഭാഗമായ സ്പാഗെറ്റി വെസ്റ്റേൺ ജോണറിലുള്ള ഈ സിനിമ. ദി ഗുഡ്, ദി ബാഡ് & ദി അഗ്ലി എന്ന പ്രശസ്ത സിനിമയുടെ പ്രീക്വലുകളിൽ ഒന്നായ ഈ സിനിമയുടെ തിരക്കഥ രചിച്ചിരിക്കുന്നത് ലൂസിയാനോ വിൻസെൻസിയോണി, സെർജിയോ ലിയോണി, സെർജിയോ ഡൊണാറ്റി എന്നിവർ ചേർന്നിട്ടാണ്. മാസിമോ ഡലാമനോയാണ് ഛായാഗ്രഹണം നിർവഹിച്ചിരിക്കുന്നത്. യൂജിനോ അലാബിസോയും ജോർജിയോ സെറാലോങ്ങയും ചേർന്ന് ചിത്രസംയോജനവും നിർവ്വഹിച്ചിരിക്കുന്നു..
✍sʏɴᴏᴘsɪs
■ വളരെ പ്രഗത്ഭരും കൃത്യതയുള്ളവരുമായ ബൗണ്ടി ഹണ്ടേഴ്സ് (സർക്കാർ തലയ്ക്ക് വിലയിട്ട കൊടുംകുറ്റവാളികളെ പ്രതിഫലം വാങ്ങി കൊല്ലുന്നത് തൊഴിലായി സ്വീകരിച്ചവർ) ആയിരുന്നു കേണൽ ഡഗ്ലസ് മോർട്ടിമോറും മാൻകോയും. അതിനിടയിൽ കൊള്ളക്കാരുടെ തലവനും അതിബുദ്ധിശാലിയും ക്രൂരനും ഒരു സൈക്കോപാത്ത് കൂടിയുമായ എൽ ഇൻഡിയോ ജയിൽ ചാടുന്നു. പതിനായിരം ഡോളർ തലയ്ക്ക് വിലയിട്ടിരിക്കുന്ന എൽ ഇൻഡിയോയുടെ കാര്യത്തിൽ രണ്ട് ബൗണ്ട് ഹെൻഡേഴ്ഹണ്ടേഴ്സും തല്പരരാകുന്നു. ഇൻഡിയോയും സംഘവും എൽ പാസോ ബാങ്ക് കൊള്ളയടിക്കാൻ പദ്ധതിയിടുന്നു. "ഒരു കാട്ടിൽ ഒരു സിംഹം മതി" എന്ന തത്വം വെച്ച് തമ്മിൽ കോർക്കുന്ന ഡഗ്ലസും മാൻകോയും പക്ഷേ ഇൻഡിയോയുടെ കാര്യത്തിൽ ഒത്തുതീർപ്പിലെത്തുന്നു. ഇൻഡിയോയുടെ തലയ്ക്ക് നിശ്ചയിച്ചിട്ടുള്ള പതിനായിരം ഡോളർ മാൻകോക്കും ഇൻഡിയോയുടെ കൊള്ളസംഘത്തിലെ മറ്റുള്ള ഓരോരുത്തർക്കുമായിട്ടുള്ള പ്രതിഫല തുകയായ പതിനായിരം ഡോളർ ഡഗ്ലസിനും. ഇൻഡിയോയെയും സംഘത്തെയും സമ്മർദ്ധമായി വേട്ടയാടാൻ മാൻകോയും ഡഗ്ലസും പദ്ധതി തയ്യാറാക്കുന്നു..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ക്ലിന്റ് ഈസ്റ്റ്വുഡിനെയും ലീ വാൻ ക്ലിഫിനെയും താരപദവിയിലെത്തിച്ച ഡോളർ ട്രയോളജിയിലെ രണ്ടാമത്തെ ചിത്രമായ ഏ ഫ്യു ഡോളേഴ്സ് മോറിൽ ടൂക്കോയെ [എലി വലാഷ്] എന്തായാലും മിസ് ചെയ്തു (ദി ഗുഡ്, ദി ബാഡ് & ദി അഗ്ലി ആദ്യം കണ്ടതുകൊണ്ടുള്ള പ്രശ്നമാണ്). ക്ലിന്റ് ഈസ്റ്റവുഡാണ് മാൻകോ എന്ന നായക കഥാപാത്രത്തെ അവതരിപ്പിച്ചിരിക്കുന്നത്. ദി ഗുഡ്, ദി ബാഡ് & ദി അഗ്ലിയിലേതിനേക്കാൾ മികച്ച പ്രകനമായിരുന്നു ക്ലിന്റിന്റേത് എന്ന് എനിക്ക് തോന്നി. ഒരുപക്ഷേ ടൂക്കോയ്ക്ക് മുന്നിൽ ദി മാൻ വിത്ത് നോ നെയിം നിഷ്പ്രഭമായിപ്പോയതുകൊണ്ടാകും. കേണൽ ഡഗ്ലസ് മോർട്ടിമോറായി അഭിനയിച്ചിരിക്കുന്നത് ലീ വാൻ ക്ലിഫാണ്. എൽ ഇൻഡിയോ എന്ന വില്ലൻ കഥാപാത്രമായി എത്തിയിരിക്കുന്ന ജിയാൻ മരിയ വോലന്റെ അക്ഷരാർത്ഥത്തിൽ ഞെട്ടിച്ചു. വെസ്റ്റേൺ ജോണറുകളിലെ മികച്ച വില്ലന്മാരുടെ പട്ടികയിൽ ആദ്യ സ്ഥാനാത്ഥിണ്ടാകും ജിയാൻ വോലന്റേയുടെ എൽ ഇൻഡിയോ. മരിയോ ബ്രെഗ (നിനോ), ലൂയിജി പിസ്റ്റിലി (ഗ്രോഗ്ഗി), ആൽഡോ സമ്പ്രേൽ (കുച്ചീലൊ), ക്ലൗസ് കിൻസ്കി (വൈൽഡ്), ബെനിറ്റോ സ്റ്റെഫാനെല്ലി (ഹ്യൂഗി), പാനോസ് പപാടോപ്ലോസ് (സാഞ്ചോ പെരസ്), റോസ് മേരി ഡെക്സ്റ്റർ (പടത്തിലെ ട്വിസ്റ്റിനെ ബാധിക്കും എന്നുള്ളത് കൊണ്ട് വേഷം വെളിപ്പെടുത്തുന്നില്ല) തുടങ്ങിയവരാണ് മറ്റു പ്രധാന അഭിനേതാക്കൾ..
🎵🎧ᴍᴜsɪᴄ & ʙᴀᴄᴋɢʀᴏᴜɴᴅ sᴄᴏʀᴇs
■ എന്യോ മോറിക്കോണിയാണ് പശ്ചാത്തല സംഗീതം നിർവ്വഹിച്ചിരിക്കുന്നത്. ബിജിഎമ്മിനെക്കുറിച്ച് കൂടുതൽ വിവരിക്കുന്നില്ല. നിങ്ങൾ കേട്ടു തന്നെ അറിയണം. ദി ഗുഡ്, ദി ബാഡ് & ദി അഗ്ലിയിലെ ബിജിഎമാണ് കൂടുതൽ പ്രശസ്തമെങ്കിലും എനിക്ക് കൂടുതൽ ഇഷ്ടപ്പെട്ടത് എ ഫ്യു ഡോളേഴ്സ് മോറിലെ ബിജിഎമാണ്. കിടിലൻ.
📎 ʙᴀᴄᴋwᴀsʜ
■ ക്ലിന്റ് ഈസ്റ്റ്വുഡ് - സെർജിയോ ലിയോണി - എന്യോ മോറിക്കോണി ത്രയം, ഒന്നിച്ചപ്പോഴെല്ലാം ലോകസിനിമയ്ക്ക് ക്ലാസിക്കുകൾ സമ്മാനിച്ചൊരു കൂട്ടുകെട്ടാണ്. ഡോളർ ത്രയത്തിലെ ഏറ്റവും മികച്ച സിനിമയായിട്ടാണ് ലോകപ്രശസ്ത സിനിമാനിരൂപകർ ഈ സിനിമയെക്കുറിച്ച് അഭിപ്രായപ്പെട്ടിരിക്കുന്നത്.
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ