Big » ᴀ ʀᴇᴛᴀʟɪᴀᴛᴇ
■ കാർണിവലിലെ ഒരു റെയ്ഡിൽ കയറാൻ 'നീ വളരെ ചെറുതാണ്' എന്ന കാരണം പറഞ്ഞു തിരസ്കരിക്കപ്പെട്ട ഒരു പന്ത്രണ്ട് വയസ്സുകാരൻ പയ്യൻ "ആഗ്രഹങ്ങൾ സാധിച്ചു കൊടുക്കും" എന്ന കൗതുകകരമായ അടിക്കുറിപ്പിലുള്ള സോൾട്ടർ എന്ന യന്ത്രത്തോട് 'എനിക്ക് വലുതാകണം' എന്ന് ആഗ്രഹം പ്രകടിപ്പിക്കുന്നു. പക്ഷേ അത്ഭുതകരമെന്നു പറയട്ടെ, പിറ്റേന്ന് രാവിലെ അവൻ ഉറക്കമുണർന്നത് ഒരു മുപ്പതുകാരനായിട്ടായിരുന്നു. കുട്ടികളുടെ ഫാന്റസി നിറഞ്ഞ ജീവിതത്തിൽ നിന്നും പെട്ടെന്ന് മുതിർന്നവരുടെ ജീവിതത്തിലെത്തുന്ന അവന്റെ മനസ്സ് പക്ഷേ പന്ത്രണ്ടുവയസ്സുള്ള കുട്ടി തന്നെയായിരുന്നു. തന്റെ ഉറ്റസുഹൃത്തിന്റെ സഹായത്തോടെ നഗരത്തിലെത്തുന്ന അവൻ ഒരു കളിപ്പാട്ട സ്ഥാപനത്തിൽ ജോലി നേടുന്നു. സ്ഥാപന ഉടമയുമായി വളരെ പെട്ടെന്ന് തന്നെ സൗഹൃദത്തിലാവുന്ന അവൻ തന്റെ സഹപ്രവർത്തകയായ ഒരു യുവതിയുമായി പ്രണയത്തിലാകുന്നു.
ടോം ഹാങ്ക്സിനെ നായകനാക്കി പെന്നി മാർഷൽ സംവിധാനം ചെയ്ത ഈ കോമഡി ഫാന്റസി ചിത്രത്തിൻറെ തിരക്കഥ രചിച്ചിരിക്കുന്നത് ഗാരി റോസും സ്റ്റീവൻ സ്പീൽബെർഗിന്റെ സഹോദരി ആനി സ്പീൽബെർഗും ചേർന്നാണ്. ബാരി സോണാൻഫീൽഡാണ് ഛായാഗ്രഹണം നിർവ്വഹിച്ചിരിക്കുന്നത്. ബാരി മാൽക്കിൻ ചിത്രസംയോജനം നിർവ്വഹിച്ചിരിക്കുന്നു. ഹൊവാർഡ് ഷോറാണ് ബിഗിൻറെ മനോഹരമായ പശ്ചാത്തല സംഗീതം ഒരുക്കിയിരിക്കുന്നത്.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ മുപ്പതുവയസ്സുകാരനായി മാറുന്ന ജോഷ് ബാസ്കിനെ കുട്ടിത്തം നിറഞ്ഞ സ്വഭാവ സവിശേഷതകളോടെ ടോം ഹാങ്ക്സ് മനോഹരമായി അവതരിപ്പിച്ചിരിക്കുന്നു. ഡേവിഡ് മോസ്കോവാണ് പന്ത്രണ്ടുവയസ്സുകാരൻ ജോഷായി അഭിനയിച്ചിരിക്കുന്നത്. ജോഷിന്റെ കളിക്കൂട്ടുകാരനും മനസ്സാക്ഷി സൂക്ഷിപ്പുകാരനുമായ ബില്ലി കോപ്പക്കി എന്ന കുട്ടിയുടെ വേഷമവതരിപ്പിച്ചിരിക്കുന്നത് ജാറെഡ് റുഷ്തനാണ്. ജോഷിന്റെ കൗതുകകരമായ സ്വഭാവ സവിശേഷതയിൽ ആകൃഷ്ടയായി പ്രണയബദ്ധയാകുന്ന സൂസൻ ലോറൻസ് എന്ന യുവതിയായി അഭിനയിച്ചിരിക്കുന്നത് എലിസബത്ത് പെർകിൻസാണ്. റോബർട്ട് ലോഗ്യ (മി. മക്മില്ലൻ), ജോൺ ഹെർഡ് (പോൾ ഡാവിൻപോർട്ട്), ജോൺ ലോവിട്സ് (സ്കോട്ടി ബ്രണ്ണൻ), മെഴ്സിഡസ് റിയോൾ (മിസ്സിസ് ബാസ്കിൻ), ജോഷ് ക്ലാർക് (മി. ബാസ്കിൻ), ഡെബ്ര ജോ റപ്പ് (മിസ്സ് പാറ്റേഴ്സൺ), കിംബെർലി എം.ഡേവിസ് (സിന്തിയ ബെൻസൺ) തുടങ്ങിയവരാണ് മറ്റു പ്രധാന അഭിനേതാക്കൾ.
📎 ʙᴀᴄᴋwᴀsʜ
■ നൂറ് മില്യൺ ഡോളറിലേറെ കളക്ഷൻ നേടുന്ന ഒരു വനിത സംവിധാനം ചെയ്ത ആദ്യ സിനിമ എന്ന സവിശേഷത ബിഗിന് അവകാശപ്പെട്ടതാണ്. മികച്ച നടനും മികച്ച തിരക്കഥയ്ക്കുമുള്ള ഓസ്കാർ നോമിനേഷനുകൾ സ്വന്തമാക്കിയിരുന്നു ഈ ചിത്രം.
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ