Moebius » ᴀ ʀᴇᴛᴀʟɪᴀᴛᴇ
■ ആരും കൈവെക്കാൻ ധൈര്യപ്പെടാത്ത പ്രമേയങ്ങളിൽ കൈവെക്കുകയും അത് തന്റെ മേക്കിങ്ങിലെ വൈഭവം കൊണ്ട് ക്ലാസ്സിക്‌ ആക്കുകയും ചെയ്യുന്നൊരു സംവിധായകനുണ്ടെങ്കിൽ അത് കൊറിയൻ സംവിധായകൻ കിം കി ഡുക് ആണ്. ഈ സിനിമ ഏത് ജോണറിൽപ്പെടും എന്ന് പറയുക തന്നെ അതികഠിനമാണ്. എങ്കിലും ഹൊറർ ഡ്രാമ എന്നങ്ങു പറഞ്ഞു തടി രക്ഷിച്ചേക്കാം. എന്തായാലും ഈ സിനിമ ഒരു ഇന്ത്യൻ ചലച്ചിത്രകാരൻ കോപ്പിയടിക്കുകയോ ഒദ്യോഗികമായി തന്നെ റീമേയ്ക്ക് ചെയ്യുകയോ ചെയ്യും എന്നൊരു പേടി അസ്ഥാനത്താണ്. കൊറിയൻ സെൻസർ ബോർഡ് തന്നെ ആദ്യം ബാൻ ചെയ്തിരുന്ന പടമാണ് ഇതെന്ന് ഓർക്കുക. പിന്നീട് റേറ്റിങ് മാറ്റി റിവ്യൂ ചെയ്തിട്ടാണ് ഇതിന്റെ റിലീസ് അനുവദിച്ചത്. കിം കി ഡുക് തന്നെയാണ് ഈ സിനിമയുടെ തിരക്കഥ രചിച്ചിരിക്കുന്നത്. അദ്ദേഹം തന്നെ ഛായാഗ്രഹണവും എഡിറ്റിങ്ങും നിർവ്വഹിച്ചിരിക്കുന്നു. ഇന്യോങ് പാർക്കിന്റേതാണ് പശ്ചാത്തല സംഗീതം.
Statutory Warning : അതിഭയങ്കരമായ വിധം ധൈര്യമുള്ളവരും "തൊലിക്കട്ടി"യുള്ളവരും മാത്രം കാണുക. അല്ലാത്തവർ കണ്ടിട്ട് എന്റെ പൂർവ്വികന്മാരെ സ്മരിക്കുന്നത് എനിക്കിഷ്ടമുള്ള കാര്യമല്ല.
✍sʏɴᴏᴘsɪs
■ ഭർത്താവും ഭാര്യയും അവരുടെ കൗമാരക്കാരനായ മകനുമടങ്ങുന്ന കുടുംബം. ഭർത്താവിന്റെ വഴിവിട്ട ജീവിതത്തിൽ മനംമടുത്ത് ആ ഭാര്യ കഠിനമായ ഒരു തീരുമാനമെടുക്കുന്നു. പക്ഷേ, ആ തീരുമാനം ഭർത്താവിൽ പ്രയോഗിക്കുന്നതിൽ പരാജയപ്പെടുന്ന അവൾ ഒടുവിൽ തന്റെ മകനിൽ ആ തീരുമാനം നടപ്പിലാക്കുന്നു. ഒരു ദുർബല നിമിഷത്തിൽ അവൾക്ക് തോന്നിയ ആ തീരുമാനം ആ കുടുംബത്തിന്റെ തന്നെ ഭാവി തുലാസിൽ നിർത്തുന്നു.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ചോ ജേ ഹ്യുൻ (ഭർത്താവ്), ലീ യൂൻ വൂ (ഭാര്യ), യങ് ജൂ സ്യോ (മകൻ) എന്നിവരാണ് ഈ സിനിമയുടെ കേന്ദ്രകഥാപാത്രങ്ങൾ. മൂന്ന് പേരും മത്സരിച്ചുള്ള അഭിനയപ്രകടനം കാഴ്ച്ചവെച്ചിരിക്കുന്നു. മറ്റൊരു പ്രധാന കഥാപാത്രമായ കടയിലെ യുവതിയുടെ വേഷം ചെയ്തിരിക്കുന്നതും ലീ യൂൻ വൂ തന്നെയാണ് എന്നറിഞ്ഞപ്പോൾ അൽപ്പം കൗതുകവും കൂടുതൽ അത്ഭുതവും തോന്നി. ജേ ഹോങ് കിം (ഗാങ് ലീഡർ), ജേ റോക് കിം (ഡോക്ടർ) തുടങ്ങിയവരാണ് മറ്റു പ്രധാന അഭിനേതാക്കൾ.
📎 ʙᴀᴄᴋwᴀsʜ
■ കിം കി ഡുക്കിന്റെ മറ്റൊരു ക്ലാസ്സിക്‌ ചിത്രമായ 3-അയൺ നമ്മെ വിസ്മയിപ്പിച്ചത് അതിലെ പ്രധാന കഥാപാത്രങ്ങളായ നായകനും നായികയ്ക്കും സംഭാഷണമില്ല എന്ന കൗതുകം കാരണമാണ്. പക്ഷേ, മൊയെബിയസിൽ സംവിധായകൻ അതിലും വലിയ കൗതുകം സന്നിവേശിപ്പിച്ചിരിക്കുന്നു. "ഇതിലെ ഒരു കഥാപാത്രത്തിനുപോലും സംഭാഷണമില്ല". എന്നാൽ പ്രമേയം ഭംഗിയായി പ്രേക്ഷകരിൽ എത്തിക്കുന്നതിൽ സംവിധായകൻ മുമ്പത്തെപ്പോലെ തന്നെ വിജയിച്ചിട്ടുണ്ടുതാനും. ഈ സിനിമ നിങ്ങളെ വേട്ടയാടിക്കൊണ്ടിരിക്കും എന്നത് തീർച്ചയാണ്, നിങ്ങൾ ഓർക്കാൻ ഇഷ്ടപ്പെട്ടില്ലെങ്കിലും..
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ