Philadelphia » ᴀ ʀᴇᴛᴀʟɪᴀᴛᴇ
■ ടോം ഹാങ്ക്സിനെയും ഡെൻസെൽ വാഷിംഗ്ട്ടനെയും കേന്ദ്രകഥാപാത്രങ്ങളാക്കി ജോനാഥൻ ഡെമ്മേ സംവിധാനം നിർവഹിച്ചിരിക്കുന്ന ഡ്രാമ ഫിലിമാണ് ഫിലാഡൽഫിയ. ഒരു എയ്ഡ്സ് രോഗിയുടെ ജീവിതം പ്രമേയമാക്കി റോൺ നൈസ്വാനറാണ് തിരക്കഥ രചിച്ചിരിക്കുന്നത്. കഴിഞ്ഞ വർഷം അവസാനമായിരുന്നു ഒരു എയ്ഡ്സ് രോഗിയായ യുവതിയുടെ ജീവിതം പ്രമേയമാക്കി അരുവി എന്ന തമിഴ് സിനിമ പുറത്തിറങ്ങിയത്. നിരൂപകരുടെ പ്രശംസ പിടിച്ചു പറ്റിയ അരുവി പക്ഷേ അബദ്ധത്തിൽ വന്നു ഭവിച്ച ഒരു HIV ഇൻഫെക്ഷനായിട്ടാണ് സിനിമയിൽ ചിത്രീകരിച്ചിരിക്കുന്നത്. എന്നാൽ ഈ സിനിമയിൽ അങ്ങനെ സ്ഥാപിക്കാൻ ഒരു തരത്തിലും ശ്രമിക്കുന്നില്ല എന്ന് മാത്രമല്ല, നായകൻ ഒരു സ്വവർഗാനുരാഗിയാണെന്നു തുറന്നു സമ്മതിക്കുന്നുമുണ്ട്. കൂടാതെ എയ്ഡ്സ് രോഗിയാണെന്ന് തിരിച്ചറിഞ്ഞു അരുവിയെ സ്വന്തം കുടുംബം അകറ്റിനിർത്തിയപ്പോൾ ഫിലാഡൽഫിയയിലെ ആൻഡ്രൂ ബെക്കറ്റിന് സ്വന്തം കുടുംബത്തിന്റെ മികച്ച പിന്തുണയായിരുന്നു ലഭിച്ചത്. ഒരു പക്ഷേ എയ്ഡ്സിനെയും സ്വവർഗഗാനുരാഗത്തെയും പ്രമേയമാക്കിക്കൊണ്ടുള്ള ആദ്യ മുഖ്യധാരാ സിനിമയായിരിക്കും ഫിലാഡൽഫിയ. ടാക് ഫ്യൂജിമോട്ടോയാണ് ഛായാഗ്രഹണം നിർവ്വഹിച്ചിരിക്കുന്നത്. ക്രെയ്ഗ് മക്കെയാണ് ചിത്രസംയോജകൻ. ഹൊവാർഡ് ഷോർ മനോഹരമായ പശ്ചാത്തല സംഗീതമൊരുക്കിയിരിക്കുന്നു.
✍sʏɴᴏᴘsɪs
■ ഫിലാഡൽഫിയയിലെ പ്രശസ്തമായൊരു നിയമസ്ഥാപനത്തിലെ മികച്ചൊരു അഭിഭാഷനായിരുന്നു ആൻഡ്രൂ ബെക്കറ്റ്. അദ്ദേഹത്തിന്റെ ജോലിയിലെ ആത്മാർത്ഥയും കഠിനാധ്വാനവും മികവുമൊക്കെ തിരിച്ചറിഞ്ഞു സ്ഥാപനത്തിന്റെ ഉടമകൾ സീനിയർ അസോസിയേറ്റ് സ്ഥാനത്തിലേക്ക് പ്രൊമോഷൻ നൽകുന്നു. ആയിടയ്ക്കാണ് ഫിലാഡൽഫിയയിലെ അറിയപ്പെടുന്നൊരു കൗൺസിലറായ ജോ മില്ലറുടെ അടുക്കൽ ആൻഡ്രൂ ഒരു പരാതിയുമായി വരുന്നത്, തന്നെ അകാരണമായി കമ്പനി ജോലിയിൽ നിന്നും പിരിച്ചു വിട്ടിരിക്കുന്നു. ആൻഡ്രൂ എയ്ഡ്സ് ബാധിതനാണെന്ന് ജോയോട് വെളിപ്പെടുത്തുന്നു. എയ്ഡ്സ് കാരണമാണ് തന്നെ ജോലിയിൽ നിന്നും പുറത്താക്കിയതിന് ആൻഡ്രൂ ജോയോട് ഉറപ്പ് പറയുന്നു. പക്ഷേ ആൻഡ്രൂ അതുവരെ സമീപിച്ച മറ്റെല്ലാ അറ്റോർണികളെയും പോലെ ജോയും കേസ് സ്വീകരിക്കാൻ തയ്യാറാകുന്നില്ല, എയ്ഡ്സ് എന്ന രോഗത്തോടുള്ള ഭയാശങ്ക തന്നെ കാരണം. ഭയം കാരണം ഡോക്റ്ററെ സമീപിക്കുന്ന ജോയോട് വെറും സാമീപ്യം കൊണ്ടോ സ്പർശനം കൊണ്ടോ പകരുന്ന ഒരു രോഗമല്ല എയ്ഡ്സ് എന്ന് വിശദീകരിക്കുന്നു. ജോയുടെ ഭാര്യയും ഇത് തന്നെ പറയുന്നതോടെ ജോ കുറ്റബോധത്തിലെത്തുന്നു. മറ്റൊരു വക്കീലിനെയും കണ്ടെത്താൻ കഴിയാതിരുന്ന ആൻഡ്രൂ സ്വയം വാദിക്കാനുള്ള തയ്യാറെടുപ്പിന് നിയമ ലൈബ്രറിയിൽ റെഫെറെൻസ് നടത്തിക്കൊണ്ടിരിക്കെ ജോയെ വീണ്ടും കണ്ടുമുട്ടുന്നു. ജോ മില്ലർ ആൻഡ്രൂ ബെക്കെറ്റിന്റെ കേസ് ഏറ്റെടുക്കുന്നു.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ആൻഡ്രൂ ബെക്കറ്റ് എന്ന എയ്ഡ്സ് രോഗിയുടെ വേഷം ടോം ഹാങ്ക്സിന്റെ കരങ്ങളിൽ ഭദ്രമായിരുന്നു. വേദനയുടെ കയങ്ങളിൽ വീണുപിടയുമ്പോഴും മറ്റുള്ളവരുടെ മുന്നിൽ പ്രസന്നവദനായി നിൽക്കാൻ ശ്രമിക്കുന്ന ആൻഡ്രൂ ഒരു തരത്തിൽ പ്രേക്ഷകർക്ക് നൊമ്പരമായിരുന്നു. കൗൺസിലർ ജോ മില്ലറുടെ വേഷം അഭിനയിച്ചിരിക്കുന്നത് ഡെൻസെൽ വാഷിംഗ്ട്ടനാണ്. ജേസൺ റൊബാഡ്സ് (ചാൾസ് വീലർ), മേരി സ്റ്റേൻബെർഗെൻ (ബെലിൻഡ കോനൻ), അന്റോണിയോ ബന്ദെരാസ് (മിഗ്വേൽ അൽവാരസ്), ജോവാനെ വുഡ്വാഡ് (സാറാ ബെക്കറ്റ്), റോബർട്ട് W.കാസിൽ (ബഡ് ബെക്കറ്റ്), ആൻ ഡൗട് (ജിൽ ബെക്കറ്റ്), ചാൾസ് നേപ്പിയർ (ജഡ്ജ് ലൂക്കാസ് ഗാർനെറ്റ്), റോബർട്ട മാക്സ്വെൽ (ജഡ്ജ് ടെയ്റ്റ്), കാരൻ ഫിൻലി (ഡോ. ഗിൽമാൻ), റോബർട്ട് റിഡ്ജ്ലി (വാൾട്ടർ കെന്റൻ), ബ്രാഡ്ലി വിറ്റ്ഫോഡ് (ജേമി കോളിൻസ്), റോൺ വാവ്റ്റർ (ബോബ് സീഡ്മാൻ), അന്ന ഡീവറി സ്മിത്ത് (ആന്തിയ ബർട്ടൻ), ലിസ സമ്മർമോർ (ലിസ മില്ലർ) തുടങ്ങിയവരാണ് മറ്റു പ്രധാന അഭിനേതാക്കൾ.
📎 ʙᴀᴄᴋwᴀsʜ
■ ആൻഡ്രൂ ബെക്കറ്റ് എന്ന എയ്ഡ്സ് രോഗിയുടെ വേഷം അനശ്വരമാക്കിയതിനായിരുന്നു ടോം ഹാങ്ക്സിന് മികച്ച നടനുള്ള ആദ്യത്തെ ഓസ്കാർ ലഭിക്കുന്നത്. കൂടാതെ "സ്ട്രീറ്റ്സ് ഓഫ് ഫിലാഡൽഫിയ" എന്ന് തുടങ്ങുന്ന മനോഹര ഗാനത്തിലൂടെ ബ്രൂസ് സ്പ്രിങ്സ്റ്റീന് മികച്ച ഗാനത്തിനുള്ള ഓസ്കാറും ലഭിച്ചു. ഫിലാഡെൽഫിയയുടെ കഥ ജോഫ്രി ബൊവെർസ്, ക്ലാരൻസ് ബി. കെയ്ൻ എന്നീ രണ്ടു അറ്റോർണിമാരുടെ ജീവിതവുമായി ഭയങ്കര സാമ്യമുണ്ടായിരുന്നു. രണ്ടുപേരെയും എയ്ഡ്സ് രോഗികളാണെന്ന് തിരിച്ചറിഞ്ഞു കമ്പനികൾ ജോലിയിൽ നിന്നും പുറത്താക്കുകയായിരുന്നു. കെയ്നാകട്ടെ തന്നെ പുറത്താക്കിയ കമ്പനിക്കെതിരെ കേസ് കൊടുത്തു തന്റെ മരണത്തിന് മുൻപ് വിജയം വരിച്ചതുമായിരുന്നു. ഫിലാഡൽഫിയയുടെ കഥയിൽ നിന്നും പ്രചോദനം കൊണ്ട് നടി രേവതി ശിൽപ ഷെട്ടി, സൽമാൻ ഖാൻ, അഭിഷേക് ബച്ചൻ എന്നിവരെ കേന്ദ്രകഥാപാത്രങ്ങളാക്കി ബോളിവുഡിൽ "ഫിർ മിലേങ്കേ" എന്നൊരു സിനിമ ചെയ്തിരുന്നു.
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ