Léon: The Professional » ᴀ ʀᴇᴛᴀʟɪᴀᴛᴇ
■ ഇതൊരു പ്രൊഫഷണൽ വാടകക്കൊലയാളിയുടെ കഥയാണ്. പ്രൊഫഷണൽ കില്ലർ പവനായിയുടെ കഥയല്ല. ഇത് വന്ത് ഒറിജിനൽ. മനസ്സിൽ നന്മയും നേരുമുള്ളൊരു പെയ്ഡ് കില്ലർ. ഏതൊരു പുരുഷന്റെയും വിജയത്തിന് പിന്നിൽ ഒരു സ്ത്രീയുണ്ടാകും എന്ന് പറയുന്നതുപോലെ ഒരു പെൺകുട്ടി അയാളുടെ ജീവിതം തന്നെ മാറ്റിമറിക്കുകയാണ്. സണ്ണി വെയ്നിനെയും സാറാ അർജുനെയും കേന്ദ്രകഥാപാത്രങ്ങളാക്കി മിഥുൻ മാനുവൽ തോമസ് സംവിധാനം നിർവ്വഹിച്ച ആൻ മരിയ കലിപ്പിലാണ് എന്ന മലയാള ചിത്രത്തിൽ നായകൻ ഗിരീഷ് ആൻ മരിയയുടെ വില്ലൻ പി.ടി. മാഷ് ഡേവിഡിന്റെ നെഞ്ചത്ത് ചവിട്ടി നിന്ന് പറയുന്നൊരു ഡയലോഗുണ്ട് "ദിസ് ഈസ് ഫോർ ആൻ മരിയ, യൂ സ്റ്റുപ്പിഡ് മങ്കി ഫെയ്സ്." പക്ഷേ ആ ഡയലോഗ് എന്നെ ഓർമ്മിപ്പിച്ചത് ഈ ചിത്രത്തിലെ നായകൻ ലിയോൺ, വില്ലൻ നോർമനോട് പറയുന്ന മാസ്സ് ഡയലോഗാണ്; "ദിസ് ഈസ് ഫ്രം മാറ്റിൽഡ." ഒരു സിംപിൾ ഡയലോഗ് എങ്ങനെ മാസ്സ് ആകുന്നു എന്നറിയണമെങ്കിൽ ഈ സിനിമയുടെ ക്ലൈമാക്സ് വരെ കാത്തിരിക്കുക..
ജീൻ റെനോയെയും നതാലി പോർട്മാനെയും കേന്ദ്രകഥാപാത്രങ്ങളാക്കി ലൂക് ബെസ്സൻ തിരക്കഥയെഴുതി അണിയിച്ചൊരുക്കിയ ക്രൈം ത്രില്ലർ ഫ്രഞ്ച് (ഇംഗ്ലീഷ്) ചിത്രമാണ് ലിയോൺ: ദി പ്രൊഫഷണൽ. നതാലിയുടെ കരിയറിലെ ആദ്യത്തെ സിനിമയാണിത്. തിയറി അർബോഗാസ്റ്റ് ഛായാഗ്രഹണവും സിൽവി ലാൻഡ്ര എഡിറ്റിങ്ങും നിർവ്വഹിച്ചിരിക്കുന്നു. ഒരു പക്കാ മാസ്സ് ത്രില്ലറിനുവേണ്ട പശ്ചാത്തല സംഗീതമൊരുക്കിയിരിക്കുന്നത് എറിക് സെറയാണ്.
✍sʏɴᴏᴘsɪs
■ ന്യൂയോർക്കിലെ ലിറ്റിൽ ഇറ്റലി എന്നറിയപ്പെടുന്ന കൊച്ചു നഗരത്തിൽ ഏകാന്തത ജീവിതം നയിച്ചിരുന്നൊരു ഇറ്റാലിയൻ പ്രൊഫഷണൽ വാടകക്കൊലയാളിയായിരുന്നു ലിയോൺ മൊണ്ടാന. തന്റെ ജോലിയിലെ കൃത്യതയും കണിശതയും കൊണ്ട് പേരെടുത്തവൻ, പക്ഷേ ഒരൽപ്പം നന്മ അയാളിൽ എവിടെയൊക്കെയോ ശേഷിച്ചിരുന്നു. താൻ ഏറ്റെടുക്കുന്ന ഓരോ മിഷനിലും അയാൾ ഒരു നിബന്ധന മാത്രമേ വെച്ചിരുന്നുള്ളൂ, "സ്ത്രീകളെയും കുട്ടികളെയും താൻ കൊല്ലില്ല." ഒരിക്കൽ തന്റെ അയക്കാരായിരുന്ന ഒരു കുടുംബത്തെ മുഴുവനും ഒരു അഴിമതിക്കാരനായ പോലീസുകാരന്റെ നേതൃത്വത്തിൽ കൊന്നൊടുക്കുന്നത് അയാൾക്ക് നിസ്സംഗതയോടെ നോക്കി നിൽക്കേണ്ടി വന്നു. ആ കുടുംബത്തിൽ പിന്നെ അവശേഷിക്കുന്ന ഒരേയൊരു വ്യക്തി, വീട്ടുസാധനങ്ങൾ വാങ്ങാൻ പുറത്തുപോയ മാറ്റിൽഡ എന്ന പന്ത്രണ്ടുവയസ്സുകാരിയായിരുന്നു. തിരിച്ചു വന്ന മാറ്റിൽഡ കാണുന്നത് തന്റെ ഉറ്റവരുടെ ചേതനയറ്റ ശരീരങ്ങളായിരുന്നു. ആ കുടുംബത്തിൽപ്പെട്ടവളാണെന്നു തിരിച്ചറിഞ്ഞാൽ അവർ അവളെയും കൊല്ലുമെന്ന് മനസ്സിലാക്കുന്ന മാറ്റിൽഡ ലിയോണിന്റെ സഹായമഭ്യർത്ഥിക്കുന്നു. തന്നെ കൊലയാളികളിൽ നിന്നും സമ്മർദ്ധമായി ഒളിപ്പിച്ച ലിയോൺ ഒരു വാടകക്കൊലയാളിയാണെന്ന് മനസ്സിലാക്കുന്ന മാറ്റിൽഡ, തന്റെ കുടുംബത്തെ മുഴുവൻ കൊന്നൊടുക്കിയവരെ ഇല്ലാതാക്കാൻ എത്ര ഡോളർ വേണമെന്ന് ലിയോണിനോട് ചോദിക്കുന്നു.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ലിയോൺ മൊണ്ടാന എന്ന നായക കഥാപാത്രത്തെ അവതരിപ്പിച്ച ജീൻ റെനോ പലപ്പോഴും അത്ഭുതപ്പെടുത്തിയത് തന്റെ നിസ്സംഗ ഭാവങ്ങൾ കൊണ്ടാണ്, ബിഗ് ബിയിലെ ബിലാലിനെ ഓർമ്മിപ്പിച്ചു. ഏകാന്തജീവിതം ഇഷ്ടപ്പെട്ടിരുന്ന ലിയോണിന്റെ ജീവിതത്തിലേക്ക് കടന്നു വന്ന മാറ്റിൽഡ എന്ന പന്ത്രണ്ടുവയസ്സുകാരിയെ കൊള്ളണോ തള്ളണോ എന്ന് തീരുമാനിക്കാൻ കഴിയാതെ ഒരു വേള, ഉറങ്ങുന്ന മാറ്റിൽഡയുടെ നെറ്റിയിൽ തോക്ക് വെക്കുന്ന ലിയോണിന്റെ ആ രംഗം എത്ര മനോഹരമായാണ് അയാൾ അവതരിപ്പിച്ചത്. മാറ്റിൽഡ എന്ന പന്ത്രണ്ടു വയസ്സുകാരിയെ അവതരിപ്പിച്ച കുഞ്ഞു നതാലി പോർട്ട്മാനാകട്ടെ ചിലപ്പോഴൊക്കെ പ്രേക്ഷകരെ കരയിപ്പിക്കുകയും ചിലപ്പോഴൊക്കെ ചിരിപ്പിക്കുകയും ചെയ്തു. എടുത്തുപറയേണ്ട മറ്റൊരു കഥാപാത്രം, ഗാരി ഓൾഡ്മാൻ അവതരിപ്പിച്ച നോർമൻ സ്റ്റാൻഫീൽഡ് എന്ന ക്രൂരനായ പോലീസ് ഓഫീസറുടേതാണ്. ഡാനി അയീലോ (ടോണി), മൈക്കൽ ബദലുക്കോ (മാറ്റിൽഡയുടെ അച്ഛൻ), എലെൻ ഗ്രീനി (മാറ്റിൽഡയുടെ രണ്ടാനമ്മ), എലിസബത്ത് റീഗൻ (മാറ്റിൽഡയുടെ സഹോദരി), പീറ്റർ അപ്പേൽ (മാൽകി), ജോർജ്ജ് മാർട്ടിൻ (ഹോട്ടൽ റിസെപ്ഷനലിസ്റ്റ്) തുടങ്ങിയവരാണ് മറ്റുപ്രധാന അഭിനേതാക്കൾ.
📎 ʙᴀᴄᴋwᴀsʜ
■ ചിത്രത്തിൻറെ തിരക്കഥാകൃത്തും സംവിധായകനുമായ ബെസ്സൻ, ലിയോൺ ദി പ്രൊഫഷനലിന് തുടർച്ചയായി ഒരു തിരക്കഥ തയ്യാറാക്കിയിരുന്നു "മാറ്റിൽഡ" എന്ന പേരിൽ. മാറ്റിൽഡ എന്ന കഥാപാത്രത്തെ അൽപ്പം പക്വതയുള്ള പ്രായത്തിൽ അവതരിപ്പിക്കുന്ന ആ തിരക്കഥ സിനിമയാക്കാൻ നതാലി പോർട്മാൻ യൗവ്വനത്തിലെത്താനായി കാത്തിരുന്നു. പക്ഷേ, ഇടയ്ക്ക് വെച്ച് സ്വന്തമായി യൂറോപ്പ കോർപ്പ് ഫിലിം സ്റ്റുഡിയോ തുടങ്ങാൻ ഗൗമോണ്ട് ഫിലിം കമ്പനി വിട്ട ബെസ്സനിന്റെ വേർപിരിയൽ ഇഷ്ടപ്പെടാത്ത ഗൗമോണ്ട് വിതരണ കമ്പനി രണ്ടാം, ഭാഗത്തിനുള്ള ശ്രമം ഉപേക്ഷിച്ചു. ലിയോണിന്റെ രണ്ടാം ഭാഗമുണ്ടാകുമോ എന്ന് ഈയടുത്ത് ബെസ്സനോട് ചോദിച്ചപ്പോൾ അദ്ദേഹത്തിന്റെ മറുപടി ഇതായിരുന്നു, "നതാലിക്ക് പ്രായമായി, അവരിന്നൊരു അമ്മയാണ് (ചിരിക്കുന്നു), വളരെ വൈകിപ്പോയി. ഭാവിയിൽ രണ്ടാം ഭാഗമെടുക്കാൻ എനിക്ക് ഐഡിയ വന്നാൽ തീർച്ചയായും ഞാനതെടുക്കും. അത് പക്ഷേ പണം മാത്രം മോഹിച്ചല്ല, ആ സിനിമ രണ്ടാം ഭാഗമർഹിക്കുന്നുണ്ട്. പക്ഷേ, അത് ഒന്നാം ഭാഗത്തേക്കാളോ അത്ര തന്നെയോ മികച്ചതാവണമെന്ന് എനിക്ക് നിർബന്ധമുണ്ട്."
IMDb ⭐ 8.6/10
Rotten Tomatoes 🍅 71%
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ