A Beautiful Mind » ᴀ ʀᴇᴛᴀʟɪᴀᴛᴇ
■ റസ്സൽ ക്രോ എന്ന പേര് കേൾക്കുമ്പോൾ ആദ്യം ഓർമ്മ വരുന്നത് ഗ്ലാഡിയേറ്ററിലെ മാക്സിമസിനെയായിരുന്നു, ഈ സിനിമ കാണുന്നത് വരെ. ഇനി മുതൽ ആ സ്ഥാനം എ ബ്യൂട്ടിഫുൾ മൈൻഡിലെ ജോൺ നാഷിന് സ്വന്തം. റസ്സൽ ഓസ്കാർ അർഹിച്ചിരുന്നു, അത് പക്ഷേ മാക്സിമസിനായിരുന്നില്ല. കാസ്റ്റ് എവേയിലെ ടോം ഹാങ്ക്സിന്റെ ചക് നോലൻഡിനായിരുന്നു 2001ലെ ഓസ്കാർ അർഹതപ്പെട്ടത് (അഭിപ്രായം വ്യക്തിപരം) എന്ന് ഞാൻ ഇന്നും വിശ്വസിക്കുന്നു. ചക് നോലൻഡും ജോൺ നാഷും തമ്മിലായിരുന്നു മത്സരമെങ്കിൽ ഒരുപക്ഷേ ഞാൻ നാഷിന്റെ കൂടെ നിന്നേനെ.
റസ്സൽ ക്രോവിനെയും ജെന്നിഫർ കോനെല്ലിയെയും കേന്ദ്രകഥാപാത്രങ്ങളാക്കി റോൺ ഹൊവാർഡ് സംവിധാനം നിർവഹിച്ച റൊമാന്റിക് ബയോഗ്രഫിക്കൽ ഡ്രാമാ ഹോളിവുഡ് ചിത്രമാണ് "എ ബ്യൂട്ടിഫുൾ മൈൻഡ്". ഇക്കണോമിക്സിൽ നോബൽ പുരസ്കാരം സ്വന്തമാക്കിയ വിഖ്യാത അമേരിക്കൻ മാത്തമറ്റീഷ്യനും ഇക്കണോമിസ്റ്റുമായ ജോൺ ഫോർബ്സ് നാഷിന്റെ ജീവിതകഥയെ ആസ്പദമാക്കി സിൽവിയ നാസർ എഴുതിയ ഇതേപേരിലുള്ള പുസ്തകത്തെ പ്രമേയമാക്കി അക്കീവ ഗോൾഡ്സ്മാനാണ് തിരക്കഥ എഴുതിയിരിക്കുന്നത്. റോജർ ഡീകിൻസ് ഛായാഗ്രഹണവും ഡാനിയേൽ P.ഹാൻലിയും മൈക്ക് ഹില്ലും ചേർന്ന് എഡിറ്റിങ്ങും നിർവ്വഹിച്ചിരിക്കുന്നു. ജെയിംസ് ഹോർണറാണ് പശ്ചാത്തല സംഗീതമൊരുക്കിയിരിക്കുന്നത്.
✍sʏɴᴏᴘsɪs
■ പ്രിൻസ്റ്റൻ യൂണിവേഴ്സിറ്റിയിൽ ഉപരിപഠനത്തിനെത്തുന്ന ജോൺ നാഷെന്ന യുവാവിൽ നിന്നുമാണ് കഥ തുടങ്ങുന്നത്. ഗണിതശാസ്ത്രത്തിൽ അസാമാന്യ പ്രതിഭയായിരുന്ന നാഷ്, കാർണീജി സ്കോളർഷിപ്പ് ലഭിക്കുന്നതിന് വേണ്ടിയുള്ള പ്രോജക്റ്റ് സമർപ്പിക്കാനുള്ള അതിസമ്മർദ്ദത്തിലായിരുന്നു. മറ്റുള്ളവരുടെ ആശയം പകർത്തുന്നതിനേക്കാൾ തന്റെ സ്വന്തം ആശയം ഉപയോഗിച്ച് പ്രോജക്റ്റ് തയ്യാറാക്കാനായിരുന്നു നാഷിന്റെ ശ്രമം. തന്റെ സുഹൃത്തുക്കൾക്കൊപ്പം സമയം ചെലവയിക്കുന്നതിനിടയിൽ എങ്ങനെ പെൺകുട്ടികളെ സമീപിക്കാം എന്ന ചർച്ചയിൽ നിന്നുമാണ് നാഷിന് പ്രോജക്റ്റ് തയ്യാറാക്കാനുള്ള ആശയം ലഭിക്കുന്നത്. പിൽക്കാലത്ത് "നാഷ് എക്വിലിബ്രിയം" എന്നറിയപ്പെട്ട ഗെയിം തിയറി ഉണ്ടാവുന്നത് അങ്ങനെയാണ്. പ്രസ്തുത പ്രൊജക്റ്റിലൂടെ മസാച്ചുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജിയിലെ രണ്ട് ഗണിതപ്രതിഭകളായിരുന്ന സോളിനും ബെൻഡറിനുമൊപ്പം ചേരാനുള്ള ക്ഷണവും അദ്ദേഹത്തിന് ലഭിക്കുന്നു. വർഷങ്ങൾക്ക് ശേഷം അമേരിക്കയുടെ പ്രതിരോധമന്ത്രാലയമായ പെന്റഗൺ സോവിയറ്റ് യൂണിയന്റെ കുറച്ച് രഹസ്യ കോഡുകൾ ക്രാക്ക് ചെയ്യാൻ നാഷിന്റെ സഹായം തേടുന്നു. അതിനിടയിൽ തന്റെ വിദ്യാർത്ഥിയായ അലീഷ്യ ലാർഡയുമായി നാഷ് പ്രണയത്തിലാവുന്നു.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ റസ്സലിന്റെ ഏറ്റവും മികച്ച വേഷം (അഭിപ്രായം വ്യക്തിപരം). ജോൺ നാഷിന്റെ മാനസിക പ്രശ്നങ്ങളും അതിനെ അതിജീവിക്കാനുള്ള ശ്രമങ്ങളും വളരെ ഭംഗിയായി തന്നെ റസ്സൽ അവതരിപ്പിച്ചിട്ടുണ്ട്. ഭർത്താവിനെ എല്ലാ സമ്മർദ്ദഘട്ടങ്ങളിലും താങ്ങായി നിന്ന് സംരക്ഷിച്ച, അയാളുടെ വിജയത്തിന്റെ പിന്നിലെ സ്ത്രീയായി വർത്തിച്ച അലീഷ്യയുടെ വേഷം ജെന്നിഫർ കോനെല്ലി ഭംഗിയായി അവതരിപ്പിച്ചു. എഡ് ഹാരിസ് (വില്യം പാർച്ചർ), പോൾ ബെറ്റണി (ചാൾസ് ഹെർമൻ), ജോഷ് ലൂക്കാസ് (മാർട്ടിൻ ഹാൻസെൻ), ആദം ഗോൾഡ്ബർഗ് (റിച്ചാർഡ് സോൾ), ആന്തണി റാപ്പ് (ബെൻഡർ), വിവിയൻ കർഡോൺ (മാഴ്സി), ക്രിസ്റ്റഫർ പ്ലമ്മർ (ഡോ. റോസെൻ), ജഡ്ഡ് ഹിർഷ് (ഹെലിൻഗർ), ജേസൺ ഗ്രേയ് സ്റ്റാൻഫോർഡ് (ഐൻസ്ലി നീൽസൺ), ടാനിയ ക്ലാർക് (ബെക്കി), ജില്ലി സിമോൺ, ജോഷ് പയസ് (പ്രിൻസ്റ്റൻ പ്രൊഫസർ) തുടങ്ങിയവരാണ് മറ്റുപ്രധാന അഭിനേതാക്കൾ.
📎 ʙᴀᴄᴋwᴀsʜ
■ മികച്ച ചിത്രം, മികച്ച സഹനടി (ജെന്നിഫർ കോനെല്ലി), മികച്ച സംവിധായകൻ (റോൺ ഹൊവാർഡ്), മികച്ച തിരക്കഥ (അക്കീവ ഗോൾഡ്സ്മാൻ) എന്നീ വിഭാഗങ്ങളായി നാല് ഓസ്കാർ പുരസ്കാരങ്ങളാണ് എ ബ്യൂട്ടിഫുൾ മൈൻഡ് സ്വന്തമാക്കിയത്. മികച്ച നടനടനുള്ളതടക്കം നാല് നോമിനേഷനുകൾ കൂടി ലഭിച്ചിരുന്നെങ്കിലും സ്വന്തമാക്കാനായില്ല. ആ വർഷത്തെ മികച്ച നടനുള്ള ഓസ്കാർ പുരസ്കാരം ട്രെയിനിങ് ഡേയിലെ അഭിനയത്തിന് ഡെൻസെൽ വാഷിങ്ങ്ടനായിരുന്നു. ട്രെയിനിങ് ഡേ ഇതുവരെ കാണാത്തതുകൊണ്ട് റസ്സൽ (ജോൺ നാഷ്) - ഡെൻസെൽ (അലോൺസോ ഹാരിസ്) താരതമ്യത്തിന് നിൽക്കുന്നില്ല.
8.2/10 · IMDb
75% · Rotten Tomatoes
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ