Castaway On The Moon » ᴀ ʀᴇᴛᴀʟɪᴀᴛᴇ
■ കാസ്റ്റവേ എന്ന ഹോളിവുഡ് ചിത്രം ടോം ഹാങ്ക്സ് എന്ന അഭിനേതാവിന്റെയും റോബർട്ട് സെമാക്കിസ് എന്ന സംവിധായകന്റെയും കരിയറിലെ നാഴികക്കല്ലുകളിൽ ഒന്നാണ്. ആൾവാസമില്ലാത്തൊരു ദ്വീപിൽ അകപ്പെട്ടുപോയ ഒരാളുടെ കഥയാണ് കാസ്റ്റവേയിൽ പറയുന്നതെങ്കിൽ കാസ്റ്റവേ ഓൺ ദി മൂൺ എന്ന കൊറിയൻ ചിത്രം പറയുന്നത് ഒരു വലിയ നഗരത്താൽ ചുറ്റപ്പെട്ട് കിടക്കുന്ന, ഹാൻ നദിയിലെ ബാംസ്യോമെന്ന ദ്വീപിൽ അകപ്പെട്ടുപോയ ഒരു മനുഷ്യന്റെ തികച്ചും വ്യത്യസ്തമായ കഥയാണ്. ഇവിടെ പ്രണയമുണ്ട്, പ്രതീക്ഷയുണ്ട്, അതിജീവനത്തിനായുള്ള പോരാട്ടമുണ്ട്. പക്ഷേ കാസ്റ്റവേയിലെ ചക് നോലൻഡ് എന്ന നായകൻ ദ്വീപിൽ നിന്നും എങ്ങനെയെങ്കിലും രക്ഷപ്പെടാനായി ശ്രമിക്കുമ്പോൾ കാസ്റ്റവേ ഓൺ ദി മൂണിലെ കിം സ്യോങ് ഗ്യുൻ എന്ന നായകനെ ദ്വീപിൽ തന്നെ തുടരാനായിരുന്നു ആഗ്രഹിച്ചത്. അത് എന്തിനുവേണ്ടിയായിരുന്നു എന്നതിലേക്ക് നമുക്കൊന്ന് ദൃഷ്ടി പായിച്ചു നോക്കാം..
■ ലീ ഹേ ജുൻ തിരക്കഥയെഴുതി സംവിധാനം നിർവഹിച്ച റൊമാന്റിക് കോമഡി കൊറിയൻ ചിത്രമാണ് കാസ്റ്റവേ ഓൺ ദി മൂൺ. കിം ബിയോങ് സ്യോ ഛായാഗ്രഹണവും നാം-നാ യോങ് എഡിറ്റിംഗും നിർവഹിച്ചിരിക്കുന്നു. കിം ഹോങ്-ജിബിന്റെതാണ് പശ്ചാത്തല സംഗീതം..
✍sʏɴᴏᴘsɪs
■ ഹാൻ നദിക്ക് മുകളിലെ പാലത്തിൽ നിന്നും താഴേക്ക് ചാടി ആത്മഹത്യ ചെയ്യാനൊരുങ്ങുന്നു നായകനിൽ നിന്ന് തന്നെ നമുക്ക് തുടങ്ങാം. നഗരജീവിതത്തിന്റെ വശ്യതയിൽ മനംമയങ്ങി ക്രെഡിറ്റ് കാർഡും ബാങ്ക് ലോണുമായി ജീവിച്ചൊരു യുവാവായിരുന്നു കിം. ഒരിക്കൽ ജോലി നഷ്ടപ്പെട്ട് കടക്കെണിയിൽ അകപ്പെട്ട് കാമുകിയാൽപ്പോലും തിരസ്കരിക്കപ്പെട്ട് സ്വയം ജീവനെടുക്കാൻ തീരുമാനിച്ചതായിരുന്നു അവൻ. പണമില്ലാത്തവനായിരിക്കുക എന്നതിന് പുറമെ യാധൊരു കഴിവും (Skills) ഇല്ലാത്തവനായിരിക്കുക എന്നിവയൊക്കെയായിരുന്നു അവനെ തേക്കാൻ കാമുകി കണ്ടെത്തിയ പോരാഴ്മകൾ. നീന്തൽ വശമില്ലാത്ത അവൻ അങ്ങനെ ഹാൻ നദിയിലേക്ക് എടുത്ത് ചാടുകയാണ്. പക്ഷേ, മനസ്സമാധാനമായി മരിക്കാൻ പോലും കഴിവില്ലാത്തവയാണ് താനെന്ന്, പാലത്തിന് ചുവട്ടിലെ ബാംസ്യോമെന്ന തുരുത്തിലേക്ക് ഓളങ്ങൾ കൊണ്ടുചെന്നിട്ടപ്പോഴാണ് അവൻ മനസ്സിലാക്കിയത്. രക്ഷയ്ക്കായ് അവൻ അലറിവിളിച്ചിട്ടും ഒരു വിളിപ്പാടകലെ കിടക്കുന്ന നഗരത്തിലെ ഒരു മനുഷ്യക്കുഞ്ഞുപോലും അവന്റെ ശബ്ദം കേട്ടില്ല. പക്ഷേ, പതിയെപ്പതിയെ നഗരത്തിരക്കിൽ നിന്നും ക്രെഡിറ്റ് കാർഡുകളുടെയും ബാങ്ക് ലോണുകളുടെയും ബാധ്യതകളിൽ നിന്നുമൊഴിഞ്ഞുള്ള ആ വനവാസജീവിതം അവൻ ആസ്വദിച്ചു വരികയായിരുന്നു. നഗരത്തിലെ അംബരചുംബിയായ ഫ്ലാറ്റ് സമുച്ചയത്തിൽ അന്തർമുഖയായി ജീവിച്ച സൈബർ അഡിക്റ്റായൊരു പെൺകുട്ടി, കിം ജുങ് യോൻ ചന്ദ്രനിൽ വസിക്കുന്ന അന്യഗ്രഹജീവിയെന്നപോലെ ഒരു കൗതുകത്തിന് അയാളെ നിരീക്ഷിച്ചു തുടങ്ങിയതാണ്. പക്ഷേ, അത് അവരുടെ ജീവിതം തന്നെ മാറ്റിമറിക്കാൻ പോന്ന എന്തോ ആയി മാറുകയായിരുന്നു..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ജുങ് ജേ-യുങ്ങാണ് കിം കിം സ്യോങ്-ഗ്യുനായി വേഷമിട്ടിരിക്കുന്നത്. ഒരു നഗരവാസിയായ യുവാവിൽ നിന്നും ഒരു വനവാസിയിലേക്കുള്ള ജുങിന്റെ ട്രാൻസ്ഫോർമേഷൻ അപാരമായിരുന്നു. പുറംലോകത്തോട് യാധൊരു ബന്ധവുമില്ലാതെ ജീവിച്ച കിം ജുങ് യോൻ എന്ന പെൺകുട്ടിയുടെ വേഷം ജുങ് റിയോ-വോൻ ഗംഭീരമാക്കി. പാർക് യോങ്-സ്യോ (ഡെലിവറി ബോയ്), യാങ് മി-ക്യുങ് (കിം ജുങ് യോനിൻറെ അമ്മ), മിൻ ക്യോങ്-ജിൻ (സെക്യൂരിറ്റി ഗാർഡ്), ജാങ് നാം-യോൾ (ബസ് ഡ്രൈവർ), ലീ സാങ്-ഹുൻ (കിം സ്യോങ്-ഗ്യുനിന്റെ അച്ഛൻ), ജാങ് സൊ-യോൻ (കിം സ്യോങ്-ഗ്യുനിന്റെ കാമുകി) തുടങ്ങിയവരാണ് മറ്റുപ്രധാന അഭിനേതാക്കൾ..
📎 ʙᴀᴄᴋwᴀsʜ
■ മൈക്കൽ ഗോൾഡ്ബാഷിന്റെ തിരക്കഥയിൽ മാർക്ക് വാട്ടേഴ്സ് സംവിധാനം ചെയ്യുന്ന ഒരു ഹോളിവുഡ് റീമേക്ക് 2011ൽ CJ എന്റർടൈൻമെന്റ് അനൗൺസ് ചെയ്തിരുന്നു. നോർത്ത് കൊറിയയുടെ ആക്രമണത്തിൽ നിന്നും മുൻകരുതൽ എന്ന നിലയിൽ വർഷത്തിൽ രണ്ടുതവണ നടത്തി വരുന്ന ഇവാക്വേഷൻ ഡ്രിലിന്റെ മുന്നറിയിപ്പ് സന്ദേശം ഈ ചിത്രത്തിൽ രണ്ടുതവണയായി കടന്നു വരുന്നുണ്ട്. പ്രതികൂല സാഹചര്യങ്ങൾ ഒരു മനുഷ്യനെ എത്രത്തോളം കരുത്തനാക്കും എന്ന് ഈ ചിത്രം വരച്ചു കാണിക്കുന്നുണ്ട്.
*Desire Makes Humans Smarter*
8.1/10 · IMDb
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ