Pariyerum Perumal » ᴀ ʀᴇᴛᴀʟɪᴀᴛᴇ
■ ലോകത്തിലെ ഏറ്റവും മികച്ച സിനിമ എന്ന് നിരൂപകർ വാഴ്ത്തിയ ദി ഷോഷാങ്ക് റിഡെംപ്ഷൻറെ IMDb റേറ്റിംഗ് 9.3യാണ്. കഴിഞ്ഞ ഒരു മാസമായി IMDbയിൽ 9.4 റേറ്റിങ്ങുമായി ഒരു തമിഴ് സിനിമ മുന്നിൽ നിൽക്കുന്നുണ്ട്. വെറുമൊരു IMDb റേറ്റിങ് കൊണ്ട് അളക്കാൻ പറ്റുന്നതല്ല പരിയേറും പെരുമാൾ എന്ന തമിഴ് ചിത്രത്തിൻറെ കാലിക പ്രസക്തി. ചരിത്രത്തിന്റെ പുസ്തകത്താളുകളിൽ വരെ കുറിച്ചിട്ട ദുരഭിമാനക്കൊല തന്നെയാണ് സിനിമയുടെ പ്രമേയം. ഉത്തരേന്ത്യയിൽ മാത്രം സംഭവിക്കുന്ന ഒന്ന് എന്ന് പറഞ്ഞ് പുച്ഛിച്ചു തള്ളിക്കളഞ്ഞിരുന്ന മലയാളികളുടെ മൂക്കിൻ തുമ്പത്ത് പോലും ദുരഭിമാനക്കൊലകൾ അരങ്ങേറി. ജാതിയുടെയും മതത്തിന്റെയും വേലിക്കെട്ടുകൾ പൊളിച്ചെറിഞ്ഞു ഒന്നിക്കാൻ കൊതിച്ചു പ്രണയിച്ച മനുഷ്യാത്മാക്കളെ ജാതിയും മതവുമുള്ള ബന്ധുക്കൾ തങ്ങളുടെ അഭിമാനത്തിന് ക്ഷതമേൽക്കാതിരിക്കാൻ കണ്ണിൽചോരയില്ലാതെ കൊത്തിക്കീറി. കഴിഞ്ഞ മൂന്ന് വർഷത്തിനുള്ളിലായി ഇന്ത്യയിൽ മുന്നൂറോളം ദുരഭിമാനക്കൊലകളാണ് റിപ്പോർട്ട് ചെയ്യപ്പെട്ടിട്ടുള്ളത്. ജാതിയും മതവും മനുഷ്യർ സൃഷ്ടിച്ചതാണ്. ദൈവം മനുഷ്യരെ മനുഷ്യജാതിയായിട്ടാണ് സൃഷ്ടിച്ചത്. പരിയേറും പെരുമാൾ ദുരഭിമാനക്കൊലകൾക്കെതിരെ ഒരു ഉണർത്തുപാട്ടാണ്..
■ മാരി സെൽവരാജ് കഥയും തിരക്കഥയും രചിച്ചു സംവിധാനം നിർവഹിച്ച ഡ്രാമാ ത്രില്ലർ തമിഴ് ചിത്രമാണ് പരിയേറും പെരുമാൾ. ശ്രീധർ ഛായാഗ്രഹണവും സെൽവ R.K എഡിറ്റിങ്ങും നിർവഹിച്ചിരിക്കുന്നു. സന്തോഷ് നാരായണനാണ് സംഗീതവും പശ്ചാത്തല സംഗീതവും ഒരുക്കിയിരിക്കുന്നത്.
✍sʏɴᴏᴘsɪs
■ തിരുനെൽവേലിക്കടുത്ത് പുളിയങ്കുളം എന്നൊരു കൊച്ചു ഗ്രാമത്തിൽ ഒരു പിന്നാക്ക ജാതിയിൽ പിറന്നവനാണ് പരിയൻ എന്ന പരിയേറും പെരുമാൾ. ഗ്രാമത്തിലെ കൊച്ചുകൊച്ചു ജോലികളും ചെറിയ തോതിലുള്ള വേട്ടയാടലുമായി സന്തോഷത്തോടെ ജീവിച്ചിരുന്ന അവൻ ജീവന് തുല്യം സ്നേഹിച്ചിരുന്ന കറുപ്പി എന്ന വേട്ടപ്പട്ടിയുടെ ദാരുണമായ അന്ത്യത്തോടെയാണ് ചിത്രത്തിൻറെ തുടക്കം. പരിയനും കറുപ്പിയും തമ്മിലുള്ള ആത്മബന്ധം അതിമനോഹരമായി ചിത്രീകരിച്ചിരിക്കുന്നു ചിത്രത്തിൽ. കറുപ്പിയുടെ വേർപാടിന് ശേഷം പരിയൻ തിരുനെൽവേലി ലോ കോളേജിൽ ഉപരിപഠനത്തിനായി ചേരുന്നു. ഇംഗ്ലീഷിൽ പരിയനുണ്ടായിരുന്ന ദൗർബല്യം മനസ്സിലാക്കിയ ജ്യോതി മഹാലക്ഷ്മി എന്ന സഹപാഠി അവനെ പഠനത്തിൽ സഹായിക്കുന്നു. ജ്യോതിയും ആനന്ദ് എന്ന മറ്റൊരു സഹപാഠിയും പരിയന്റെ അടുത്ത കൂട്ടുകാരായിത്തീരുന്നു. ഉന്നതകുലജാതയായിരുന്ന ജ്യോതിയുമായിട്ടുള്ള സൗഹൃദം പ്രണയത്തിലേക്ക് വഴിമാറുമ്പോൾ അത് പിന്നാക്ക സമുദായക്കാരനായ പരിയന്റെ ജീവിതത്തിലേക്ക് കനൽ കോരി നിറയ്ക്കാൻ തക്കതാവുകയായിരുന്നു. ജാതിയും മതവും അഭിമാനവും ദുരഭിമാനവും തമ്മിലുള്ള പരസ്പര യുദ്ധത്തിനുള്ള കാഹളം അവിടെ മുഴങ്ങുകയായിരുന്നു. അവിടെ പ്രണയത്തിന്റെ സ്ഥാനം ചവറ്റുകുട്ടയിലായിരുന്നു..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ പരിയേറും പെരുമാൾ എന്ന കേന്ദ്രകഥാപാത്രത്തിന് രക്തവും ജീവനും നൽകിയിരിക്കുന്നത് കതിരാണ്. ജ്യോതി മഹാലക്ഷ്മിയായി ആനന്ദിയും വേഷമിട്ടിരിക്കുന്നു. പക്ഷേ ഇതിലെ അതിപ്രധാന കഥാപാത്രം കറുപ്പി എന്ന നായയാണ്. യോഗി ബാബു (ആനന്ദ്), ജി. മാരിമുത്തു (ജ്യോതിയുടെ അച്ഛൻ), വണ്ണാർപേട്ടയ് തങ്കരാജ് (പരിയന്റെ അച്ഛൻ), ലിജേഷ് (ശങ്കരലിംഗം), കരാട്ടെ വെങ്കടേശൻ (താത്ത), പൂ. റാം (പ്രിൻസിപ്പാൾ), സുഭദ്ര (എക്സാംഹാൾ ഇൻവിജിലേറ്റർ), ഷണ്മുഖരാജൻ (മേസ്തിരി/ആൾമാറാട്ടക്കാരൻ) തുടങ്ങിയവരാണ് മറ്റുപ്രധാന അഭിനേതാക്കൾ..
📎 ʙᴀᴄᴋwᴀsʜ
■ ഈ വർഷം ഏറ്റവും കൂടുതൽ നിരൂപകപ്രശംസ പിടിച്ചുപറ്റിയ തമിഴ് ചിത്രമാണ് പരിയേറും പെരുമാൾ. സൂപ്പർസ്റ്റാർ രജനീകാന്ത് പോലും സംവിധായകൻ മാരി സെൽവരാജിനെ നേരിട്ടുവിളിച്ചു അഭിനന്ദിച്ചിരുന്നു. അടുത്തവർഷം ഇന്ത്യൻ സിനിമയിലെ ഒട്ടുമിക്ക പുരസ്കാരങ്ങളും വാരിക്കൂട്ടാൻ പോകുന്ന ചിത്രമായിരിക്കും പരിയേറും പെരുമാൾ എന്നത് എന്റെയൊരു പ്രവചനം..
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ