Kumbalangi Nights » ᴀ ʀᴇᴛᴀʟɪᴀᴛᴇ
■ കുമ്പളങ്ങി, കൊച്ചിക്കടുത്തുള്ള മനോഹര ദ്വീപുഗ്രാമം. കേരളത്തിലെ മനോഹരമായ വിനോദസഞ്ചാരകേന്ദ്രങ്ങളിലൊന്ന്. മൽസ്യബന്ധനമായിരുന്നു ഈ ഗ്രാമക്കാരുടെ പ്രധാന തൊഴിലെങ്കിലും ഇപ്പോൾ ടൂറിസം വലിയൊരു വരുമാന സ്രോതസ്സായി മാറിയിരിക്കുന്നു. കുമ്പളങ്ങി എന്ന മനോഹര ഗ്രാമം പശ്ചാത്തലമാക്കി ഒരു മലയാള സിനിമ വരുമ്പോൾ അത് സംവിധാനം നിർവഹിക്കുന്നത് നാട്ടിൻപുറത്തിന്റെ പച്ചയായ ജീവിതാവിഷ്കാരം വെള്ളിത്തിരയിലെത്തിച്ചു പ്രേക്ഷകരുടെ "ബ്രില്യൻസ്" ഒരുപാട് ഏറ്റുവാങ്ങിയ സംവിധായകൻ ദിലീഷ് പോത്തന്റെ പ്രിയ ശിഷ്യൻ മധു സി. നാരായണൻ കൂടിയാവുമ്പോൾ പ്രതീക്ഷകൾ ഏറെയുണ്ടായിരുന്നു. കൂടാതെ ഫഹദെന്ന "നാച്ചുറൽ സ്റ്റാറി"ന്റെ സാനിധ്യവും പ്രതീക്ഷയ്ക്ക് മാറ്റ് കൂട്ടി.
■ മലയാളികൾ ഭൂരിപക്ഷവും ഒരു സിനിമയ്ക്ക് കയറിയിരുന്നത് ആദ്യമൊക്കെ അതിലെ നായകൻ ആരാണെന്ന് നോക്കിയായിരുന്നു. പിന്നീടെപ്പഴോ നല്ല സംവിധായകരുടെ സിനിമകൾ തെരഞ്ഞെടുക്കുക എന്ന സ്വഭാവം മലയാളി പ്രേക്ഷകർ കാണിച്ചു തുടങ്ങി. മലയാളികളുടെ കാഴ്ച്ചപ്പാട് പാടേ മാറി എന്ന തോന്നൽ ജനിപ്പിക്കുന്നതായിരുന്നു ഒരു നായകനടനെക്കാളുപരി, സംവിധായകനെക്കാളുപരി അതിന്റെ തിരക്കഥാകൃത്ത് ശ്രദ്ധിക്കപ്പെടുമ്പോൾ. സാൾട്ട് & പെപ്പറിലൂടെ തിരക്കഥാരംഗത്ത് കാലുറപ്പിച്ച ശ്യാം പുഷ്കരന് ഇപ്പോൾ ലഭിക്കുന്ന പ്രേക്ഷകശ്രദ്ധ അരക്കിട്ടുറപ്പിക്കുന്നത് സിനിമ ഒരു തിരക്കഥാകൃത്തിന്റേത് കൂടിയാണ് എന്നതാണ്. ശ്യാം പുഷ്ക്കരൻ തൊട്ടതെല്ലാം പൊന്നാക്കിയ തിരക്കഥാകൃത്താണെന്നതായിരിക്കാം (22 ഫീമെയ്ൽ കോട്ടയം, ഡാ തടിയാ, ഇയ്യോബിന്റെ പുസ്തകം, മഹേഷിന്റെ പ്രതികാരം, മായാനദി) അദ്ദേഹത്തെ കേന്ദ്രബിന്ദുവാക്കുന്നതിന് ഉപോല്പക്കം എന്ന് തോന്നുന്നു. കുമ്പളങ്ങി എന്ന മനോഹര ഗ്രാമത്തിന്റെ വശ്യ ചാരുത അതേപ്പോലെ ഒപ്പിയെടുക്കാൻ നിയോഗിക്കപ്പെട്ടത് ഷൈജു ഖാലിദ് എന്ന ഛായാഗ്രഹണ പ്രതിഭ കൂടിയാവുമ്പോൾ അത് പ്രതീക്ഷകൾ ഒരിക്കലും തെറ്റിയില്ല എന്നതിന് അടിവരയിടുന്നതായിരുന്നു. എത്രയോ മികച്ച മനോഹര ഫ്രെയിമുകൾ. സുഷിൻ ശ്യാമിന്റെ മനോഹര മെലഡികളും കൂടി ഒത്തു ചേർന്നപ്പോൾ ഒരു മനോഹര സിനിമയാണ് കുമ്പളങ്ങി നൈറ്റ്സ് ആയി ഇതൾ വിരിയിച്ചത്. സൈജു ശ്രീധരനാണ് എഡിറ്റിംഗ് നിർവഹിച്ചിരിക്കുന്നത്..
✍sʏɴᴏᴘsɪs
■ കുമ്പളങ്ങിയിലെ രണ്ട് കുടുംബങ്ങളുടെ കഥയാണ് കുമ്പളങ്ങി നൈറ്റ്സിൽ വരച്ചിട്ടിരിക്കുന്നത്. സജിയുടെ കുടുംബവും ഷമ്മിയുടെ കുടുംബവും. കാര്യമായിട്ട് ജോലിയും കൂലിയുമില്ലാത്ത സഹോദരന്മാർ (സജി, ബോബി, ബോണി, ഫ്രാങ്കി) വാതിലിന് പോലും അടച്ചുറപ്പില്ലാത്ത വീട്ടിൽ ജീവിക്കുന്നു. ഇനിയെന്തെന്ന ചിന്ത ഒരിക്കലും അവരെ വലയ്ക്കുന്നില്ല. അവരെന്തുകൊണ്ട് അങ്ങനെയായെന്ന് ഫ്ലാഷ് ബാക്ക് ഇടാതെ തന്നെ ബോബിയുടെയും സജിയുടെയും വാക്കുകളിലൂടെ പറഞ്ഞു തരികയാണ് സംവിധായകൻ. ഷമ്മി, യാഥാസ്ഥിതിക മലയാളി പുരുഷന്മാരുടെ പ്രതിനിധിയാണ്. ഷമ്മി ചിലപ്പോൾ ഞാനാവാം, നീയാകാം. ഷമ്മിയെന്ന കഥാപാത്രം ഫഹദ് ഫാസിൽ ചെയ്യുമ്പോൾ അത് നായകനാവണമെന്ന ചിന്ത ഇവിടെ കളഞ്ഞേക്ക്. "ഷമ്മി അത്ര വെടിപ്പല്ല ബ്രോ.." ഷമ്മിയുടെ സഹോദരി ബേബിയും സജിയുടെ സഹോദരൻ ബോബിയും തമ്മിൽ ഉടലടുക്കുന്ന പ്രണയത്തിലൂടെ കുമ്പളങ്ങി നൈറ്റ്സ് പ്രയാണം തുടരുന്നു..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ഓരോ ചിത്രങ്ങൾ കഴിയുന്തോറും തന്റെ അഭിനയ മികവിന്റെ മാറ്റ് കൂടിക്കൊണ്ടിരിക്കുകയാണ് എന്ന് തെളിയിക്കുന്നതായിരുന്നു സജിയായുള്ള സൗബിൻ ഷാഹിറിന്റെ പ്രകടനം. സുഡാനിയിലെ മജീദിലൂടെ താൻ വെറുമൊരു കൊമേഡിയൻ മാത്രമല്ല നല്ലൊരു നടനാണ് എന്ന് തെളിയിച്ച സൗബിൻ കുമ്പളങ്ങിയിലെ സജിയിലൂടെ അതിന് അടിവരായിട്ടിരിക്കുകയാണ്. തന്റെ സ്ഥിരം ശോക നായകൻ ഇമേജിൽ നിന്നും പുറത്തു വന്നിരിക്കുകയാണ് സജിയുടെ അനിയൻ ബോബിയായി മികച്ച പ്രകടനം കാഴ്ച്ച വെച്ച ഷെയ്ൻ നിഗം. തൊണ്ടിമുതലും ദൃക്സാക്ഷിയും എന്ന സിനിമയിൽ കള്ളനായി അഭിനയിച്ചപ്പോൾ "ഇങ്ങേര് ശരിക്കും കള്ളനാണോ" എന്ന് മലയാളികളെക്കൊണ്ട് പറയിപ്പിച്ച ഫഹദ് ഫാസിൽ ഇവിടെയും പ്രതീക്ഷ തെറ്റിക്കുന്നില്ല. എജ്ജാതി പഹയൻ. ഷമ്മിയുടെ ഭാര്യയായി അഭിനയിച്ച ഗ്രെയ്സ് ആന്റണിയും (സിമി) സഹോദരിയായി (ബേബി) അഭിനയിച്ച അന്ന ബെന്നുമടക്കം എല്ലാവരും ഒന്നിനൊന്നു മികച്ച പ്രകടനമാണ് കാഴ്ച്ച വെച്ചിരിക്കുന്നത്. ശ്രീനാഥ് ഭാസി (ബോണി), രമേശ് തിലക്, മാത്യു തോമസ് (ഫ്രാങ്കി) തുടങ്ങിയവരാണ് മറ്റു പ്രധാന അഭിനേതാക്കൾ..
📎 ʙᴀᴄᴋwᴀsʜ
■ കാലികപ്രസക്തിയുള്ള കഥയവതരിപ്പിക്കുന്നതുകൊണ്ടാവാം ശ്യാം പുഷ്ക്കരൻ ഇത്രയ്ക്കും ജനകീയനായ തിരക്കഥാകൃത്താവുന്നത്. വെറുമൊരു നാട്ടിൻപുറത്തെ നന്മ വിളിച്ചോതുന്ന സിനിമയല്ല കുമ്പളങ്ങി നൈറ്റ്സ്. 22 ഫീമെയിലിലൂടെ ആണധികാരത്തിന്റെ "കടയ്ക്കൽ" കത്തി വെപ്പിച്ച ശ്യാം ഇവിടെയും അത് തന്നെ ആവർത്തിക്കുന്നു. അന്നാ ബെൻ അവതരിപ്പിച്ച ബേബി മോൾ പലയിടത്തും പുരോഗമന പെണ്ണിടത്തിന്റെ തീപ്പൊരിയായി.
3.75/5 . MyRating
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ