Argentina Fans Kaattoorkadavu » ᴀ ʀᴇᴛᴀʟɪᴀᴛᴇ
■ ആട് 2 എന്ന സൂപ്പർഹിറ്റ് ചിത്രത്തിന് ശേഷം മിഥുൻ മാനുവൽ തോമസ് സംവിധാനം നിർവഹിക്കുന്ന സ്പോർട്സ് ഡ്രാമ മലയാള ചിത്രമാണ് അർജന്റീന ഫാൻസ്‌ കാട്ടൂർക്കടവ്. മലയാളത്തിൽ കാളിദാസ് ജയറാം നായകനാകുന്ന മൂന്നാമത്തെ ചിത്രവും. തുടർച്ചയായ നാല് ഹിറ്റുകൾക്ക് ശേഷം മലയാള സിനിമയുടെ ഐശ്വര്യം എന്നറിയപ്പെട്ട ഐശ്വര്യ ലക്ഷ്മി നായികയായി ചേരുന്നതോടെ അർജന്റീന ഫാൻസ്‌ കാട്ടൂർക്കടവിനു പ്രേക്ഷകർ വലിയ പ്രതീക്ഷകളാണ് നൽകുന്നത്. ഐശ്വര്യ ലക്ഷ്മി ഒരിക്കൽ കൂടി ഭാഗ്യതാരകമാകുമോ? അർജന്റീന ഫാൻസ്‌ കാട്ടൂർക്കടവ് കാളിദാസ് ജയറാമിന്റെ ആദ്യത്തെ സൂപ്പർഹിറ്റാകുമോ?
■ അശോകൻ ചെരുവിൽ എഴുതിയിരിക്കുന്ന കഥയെ തിരക്കഥാ രൂപത്തിലാക്കിയിരിക്കുന്നത് സംവിധായകൻ മിഥുൻ മാനുവൽ തോമസും ജോൺ മന്ത്രിക്കലും ചേർന്നാണ്. റെനാഡൈവാണ് ഛായാഗ്രഹണം നിർവഹിച്ചിരിക്കുന്നത്. തനി നാട്ടിൻപുറത്തെ കഥയായതുകൊണ്ട് തന്നെ നാട്ടിൻപുറത്തിന്റെ സുന്ദരമായ ഫ്രയിമുകൾ അതിമനോഹരമായി തന്നെ ഒപ്പിയെടുക്കാൻ അദ്ദേഹത്തിന് സാധിച്ചിട്ടുണ്ട്. ലിജോ പോളാണ് എഡിറ്റിംഗ്‌ നിർവഹിച്ചിരിക്കുന്നത്. ഗോപി സുന്ദറാണ് അർജന്റീന ഫാൻസ്‌ കാട്ടൂർക്കടവിന്റെ പശ്ചാത്തല സംഗീതവും ഇതിലെ അഞ്ച് ഗാനങ്ങൾക്കും സംഗീതവും ഒരുക്കിയിരിക്കുന്നത്. വിജയ്‌ യേശുദാസ് പാടിയ ഹേയ് മധുചന്ദ്രികേ എന്ന പാട്ട് എനിക്ക് വല്ലാതങ്ങ് ഇഷ്ടപ്പെട്ടു. പിന്നെ നെഞ്ചാണേ എന്ന് തുടങ്ങുന്ന പാട്ട് ഫുട്‍ബോൾ ഫാൻസുകാർക്ക് എന്തായാലും ഇഷ്ടപ്പെടും.
✍sʏɴᴏᴘsɪs
■ തൃശൂരിലുള്ള കാട്ടൂർക്കടവെന്ന ഫുട്‍ബോൾ ഭ്രമം തലയ്ക്കുപിടിച്ച നാട്ടിൻപുറം ഗ്രാമം. ഫുടബോളിൽ കേരളത്തിൽ എന്നല്ല ലോകത്തിൽ തന്നെ ഏറ്റവും കൂടുതൽ ആരാധകരുള്ള രാജ്യങ്ങളാണ് അർജന്റീനയും ബ്രസീലും. ലോകകപ്പിലായാലും കോപ്പ അമേരിക്കയിലായാലും കളിക്കളത്തിൽ പന്തുരുളുമ്പോൾ ഇങ്ങിവിടെ കേരളത്തിൽ ഇവരുടെ ഫാൻസുകാർ തമ്മിൽ കൊമ്പുകോർക്കാൻ തുടങ്ങും. അർജന്റീന ഫാൻസ്‌ കാട്ടൂർക്കടവിലും പറയുന്നത് കുറച്ച് ഫുട്‍ബോൾ ഭ്രാന്തന്മാരുടെ കഥയാണ്. അർജന്റീനയുടെ കടുത്ത ആരാധകനായ വിപിനനെ കേന്ദ്രീകരിച്ചാണ് കഥയുടെ ഒഴുക്ക്. വിപിനന്റെ പ്ലസ് ടു കാലവും കോളേജ് കാലവും അതുകഴിഞ്ഞുള്ള യൗവനവുമെല്ലാം ഓരോ സ്റ്റേജായി കടന്നു വരുന്നു. പ്ലസ് ടു കാലത്തിനിടയ്ക്ക് അവൻ മെഹ്റു എന്നൊരു പെൺകുട്ടിയുമായി അടുപ്പത്തിലാകുന്നു. കുറച്ചു നേരം അവരുടെ പ്രണയവുമായി സിനിമ മുന്നോട്ട് പോകുന്നു. മെഹ്റു ഒരൽപ്പം ഇടതുപക്ഷ ചിന്താഗതിയുള്ള പെൺകുട്ടിയായിരുന്നു. കോളേജ് ലൈഫ് കഴിഞ്ഞ വിപിനന് ജീവിത പ്രാരാബ്ദം കാരണം ഗൾഫിലേക്ക് പോവേണ്ടി വരികയാണ്.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ കാളിദാസൻ മൂന്ന് വ്യത്യസ്ത ഗെറ്റപ്പിലുള്ള വിപിനൻ എന്ന നായക കഥാപാത്രമായി മികച്ച പ്രകടനം തന്നെയാണ് കാഴ്ച്ച വെച്ചിരിക്കുന്നത്. പൂമരവും മിസ്റ്റർ & മിസ്സിസ് റൗഡിയിലേതിനേക്കാളും കാളിയുടെ അഭിനയം കുറച്ചുകൂടി മെച്ചപ്പെട്ടു എന്ന് തന്നെ പറയാം. തൃശൂർ സ്ലാങ്ങൊക്കെ നന്നായി തന്നെ കാളി ചെയ്തിട്ടുണ്ട്. ഐശ്വര്യ ലക്ഷ്മിയാണ് മെഹ്റു എന്ന നായികാ കഥാപാത്രമായി അഭിനയിച്ചിരിക്കുന്നത്. തൃശൂർ സ്ലാങ്ങിൽ ഐശ്വര്യ അൽപ്പം പതറിപ്പോയോ എന്നെനിക്ക് സംശയമുണ്ട്. എങ്കിലും തരക്കേടില്ലാത്ത പെർഫോമൻസ് തന്നെയായിരുന്നു. പിന്നെ എല്ലാവർക്കും ഏറ്റവും കൂടുതൽ അറിയാൻ അതിയായ ആഗ്രഹമുള്ളത് കരിക്കിലെ ജോർജ്ജ് എന്ന അനു കെ. അനിയന്റെ അഭിനയം എങ്ങനെയുണ്ടെന്നായിരിക്കും. നജീബ് പാമ്പാടൻ എന്ന കട്ട ബ്രസീൽ ഫാനായിട്ടാണ് അനു എത്തിയിരിക്കുന്നത്. സ്‌ക്രീനിൽ അത്രയധികം സമയം അനുവിന് ലഭിച്ചിട്ടില്ലെങ്കിലും അനു നിരാശപ്പെടുത്തിയിട്ടില്ല. കിട്ടിയ സമയം അനു ഉപയോഗപ്പെടുത്തി എന്ന് തന്നെയാണ് എന്റെ അഭിപ്രായം. കരിക്കിൽ ബ്രിട്ടോ ആയി അഭിനയിച്ച അർജുൻ രത്തനും ഇതിൽ സജീർ എന്നൊരു ക്യാരക്റ്ററായി എത്തുന്നുണ്ട്. അനീഷ് ഗോപാലൻ (സുനിമോൻ ആറാട്ടുകുഴി), ശ്യാം കാർഗോസ് (അജയഘോഷ്), പോൾ ജോസഫ് (രാഘവൻ), സിൻസ് ഷാൻ (തോമസ് മാഷ്), സോണിയ ഗിരി (സുജ), അസീം ജമാൽ (മുനീർ കൊടുവള്ളി) തുടങ്ങിയവരാണ് മറ്റു പ്രധാന അഭിനേതാക്കൾ..
📎 ʙᴀᴄᴋwᴀsʜ
■ ഒരൽപ്പം കോമഡിയും ബോറടിപ്പിക്കാത്ത കഥാപറച്ചിലുമായി കടന്നുപോകുന്ന ഒരു ഫീൽ ഗുഡ് എന്ന് പറയാവുന്ന തരത്തിലുള്ള എന്റർടൈനറാണ് അർജന്റീന ഫാൻസ്‌ കാട്ടൂർക്കടവ്. വലിയൊരു സംഭവം എന്നൊന്നും പറയാനില്ലെങ്കിൽ പ്രേക്ഷകനെ ഒട്ടും മടുപ്പിക്കാതെ അവസാനിപ്പിക്കുന്ന ശരാശരിക്കും മുകളിൽ നിൽക്കുന്ന ഒരു കൊച്ചു സിനിമ. ഇതൊക്കെ എന്റെ വ്യക്തിപരമായ അഭിപ്രായങ്ങളാണ്. നിങ്ങൾ തിയേറ്ററിൽ നിന്നും കണ്ടു തന്നെ വിലയിരുത്തുക.
3.5/5 . MyRating
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ