Catch Me If You Can » ᴀ ʀᴇᴛᴀʟɪᴀᴛᴇ
■ ലോക സിനിമയിലെ മൂന്ന് അതികായർ ഒന്നിക്കുന്നു എന്ന പ്രത്യേകതയാണ് ഈ സിനിമയിലേക്ക് എന്നെ ആകർഷിച്ചത്. വിശ്വസംവിധായകൻ സ്റ്റീവൻ സ്പീൽബെർഗിന്റെ സംവിധാനത്തിൽ വിഖ്യാത നടന്മാരായ ടോം ഹാങ്ക്സും ലിയനാർഡോ ഡികാപ്രിയോയും നായകന്മാരാവുന്ന ഈ ചിത്രം ഇതിന്റെ പേര് സൂചിപ്പിക്കുന്ന പോലെ തന്നെ ഒരു കള്ളനും പോലീസും കളിയാണ്. മമ്മൂട്ടിയും മുരളിയും കേന്ദ്രകഥാപാത്രങ്ങളെ അവതരിപ്പിച്ച സത്യൻ അന്തിക്കാട് സംവിധാനം ചെയ്ത കളിക്കളം എന്ന മലയാള സിനിമയെ ഓർമിപ്പിക്കുമെങ്കിലും ഇത് തികച്ചും വ്യത്യസ്തമായ സിനിമയാണ്. ഫ്രാങ്ക് അബഗ്നെയ്ൽ ജൂനിയർ എന്ന അമേരിക്കൻ സുരക്ഷാ ഉപദേഷ്ടാവിന്റെ ജീവിതകഥയെ ആസ്പദമാക്കി ജെഫ് നതാൻസണാണ് തിരക്കഥ രചിച്ചിരിക്കുന്നത്. ഫ്രാങ്ക് തന്റെ കൗമാര പ്രായത്തിൽ ചെക്ക് തട്ടിപ്പ് നടത്തി ദശലക്ഷക്കണക്കിന് ഡോളർ അടിച്ചെടുത്ത് അമേരിക്കൻ കുറ്റാന്വേഷണ ഏജൻസി, എഫ്.ബി.ഐ.യെ വട്ടം കറക്കിയ പിടികിട്ടാപ്പുള്ളിയായിരുന്നു.
✍sʏɴᴏᴘsɪs
■ ഫ്രാങ്ക് അബഗ്നെയ്ൽ സീനിയർ ടാക്സ് വെട്ടിപ്പുനടത്തി എന്ന ആരോപണം നേരിടുന്നതിനാൽ ചെയ്സ് മൻഹാട്ടൻ ബാങ്ക് അയാൾക്ക് ബിസിനസ്സ് ലോൺ നിഷേധിക്കുന്നു. തുടർന്ന് അബഗ്നെയ്ൽ കുടുംബത്തിന് അവരുടെ വലിയ വീട്ടിൽ നിന്നും ചെറിയൊരു അപ്പാർട്ട്മെന്റിലേക്ക് താമസം മാറ്റേണ്ടി വരുന്നു. തന്നെ റാഗ് ചെയ്യാൻ ശ്രമിച്ച സഹവിദ്യാർത്ഥികളെ വിരട്ടുക എന്ന ഉദ്ദേശ്യത്തോടെ ഫ്രഞ്ച് അദ്യാപകനായി അഭിനയിച്ചതായിരുന്നു ഫ്രാങ്കിന്റെ ജീവിതത്തിലെ ആദ്യത്തെ ആൾമാറാട്ടം. ഫ്രാങ്ക് ജൂനിയറിന്റെ ഫ്രഞ്ചുകാരിയായ അമ്മയ്ക്ക് ഫ്രാങ്കിന്റെ പിതാവിന്റെ സുഹൃത്ത്; ജാക്കുമായുണ്ടായിരുന്ന അടുപ്പം ഫ്രാങ്കിന്റെ മാതാപിതാക്കളുടെ ഡൈവോഴ്സിന് കാരണമാകുന്നു. അച്ഛന്റെയോ അമ്മയുടേയോ കൂടെ നിൽക്കാതെ ഫ്രാങ്ക് ജൂനിയർ നാടുവിടുന്നു.
തന്റെ ദൈനംദിന ചിലവുകൾ കഴിച്ചുകൂട്ടാൻ ചെക്ക് തട്ടിപ്പിന് ശ്രമിക്കുന്ന ഫ്രാങ്ക് ജൂനിയർ പിന്നീട് പാൻ അമേരിക്കൻ എയർലൈൻസ് പൈലറ്റായി വേഷമിട്ട് പാൻ അമേരിക്കൻ പേ റോൾ ചെക്ക് വ്യാജമായുണ്ടാക്കി ദശലക്ഷക്കണക്കിന് ഡോളർ വിജയകരമായി തട്ടിയെടുക്കുന്നു. തുടർന്ന് അതിബുദ്ധിമാനായ എഫ്.ബി.ഐ ഏജന്റ് കാൾ ഹാൻറാറ്റി ഫ്രാങ്കിനെ പിന്തുടരാൻ ആരംഭിക്കുന്നു.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ലിയനാർഡോ ഡികാപ്രിയോ ഫ്രാങ്ക് അബഗ്നൈൽ ജൂനിയറെയും ടോം ഹാങ്ക്സ് കാൾ ഹാൻറാറ്റിയെയും അവതരിപ്പിച്ചിരിക്കുന്നു. ഡികാപ്രിയോ ഹാങ്ക്സിനേക്കാൾ ഒരുപടി മുന്നിലായിരുന്നു എന്ന് പറയാമെങ്കിലും അത് ഹാൻറാട്ടിയേക്കാൾ പ്രാധാന്യം ഫ്രാങ്കിനായിരുന്നത് കൊണ്ടായിരിക്കാം. ക്രിസ്റ്റഫർ വാക്കൻ (ഫ്രാങ്ക് അബഗ്നൈൽ സീനിയർ), നതാലി ബയെ (പോള അബഗ്നൈൽ), ആമി ആഡംസ് (ബ്രെണ്ട സ്ട്രോങ്ങ്), മാർട്ടിൻ ഷീൻ (റോജർ സ്ട്രോങ്ങ്), ജെയിംസ് ബ്രോലിൻ (ജാക്ക് ബാൺസ്), നാൻസി ലെനേഹാൻ (കരോൾ സ്ട്രോങ്ങ്) തുടങ്ങിയവരാണ് മറ്റു പ്രധാന താരങ്ങൾ..
📽✄ᴛᴇᴄʜɴɪᴄᴀʟ sɪᴅᴇs
■ ജാനുസ് കമിൻസ്കിയാണ് ചിത്രത്തിൻറെ ഛായാഗ്രാഹകൻ. 1960കളിൽ പ്രേക്ഷകരെ എത്തിക്കുന്ന തരത്തിലുള്ള ഫ്രെയിമുകളൊരുക്കുന്നതിൽ ജാനുസ് വിജയിച്ചിട്ടുണ്ട്.
■ മൈക്കൽ കാനാണ് ചിത്രസംയോജനം നിർവ്വഹിച്ചിരിക്കുന്നത്.
🎵🎧ᴍᴜsɪᴄ & ʙᴀᴄᴋɢʀᴏᴜɴᴅ sᴄᴏʀᴇs
■ ജോൺ വില്യംസാണ് സംഗീതമൊരുക്കിയിക്കുന്നത്. ടൈറ്റിൽ ക്രെഡിറ്റ് ഡിസൈൻ ചെയ്തത് ആരാണെന്ന് അറിയില്ല. എങ്കിലും പറയാതെ വയ്യ, ജോണിന്റെ മനോഹരമായ പശ്ചാത്തല സംഗീതത്തിന്റെ കൂടെ വന്ന ആ ടൈറ്റിൽ കാർഡ് മുഴുവനായി ആസ്വദിച്ചു കണ്ടിരുന്നു പോയി. ഒരു തരത്തിൽ സിനിമയുടെ സംഗ്രഹം തന്നെയായിരുന്നു ആ ടൈറ്റിൽ കാർഡ്.
📎 ʙᴀᴄᴋwᴀsʜ
■ ഫ്രാങ്ക് അബഗ്നൈൽ സീനിയറായി അഭിനയിച്ച ക്രിസ്റ്റഫർ വാക്കന് മികച്ച സഹനടനുള്ള ഓസ്കാർ നോമിനേഷനും ജോൺ വില്യംസിന് മികച്ച സംഗീത സംവിധായകനുള്ള ഓസ്കാർ നോമിനേഷനും ലഭിച്ചിരുന്നുവെങ്കിലും അവാർഡുകൾ തലനാരിഴക്ക് നഷ്ടപ്പെടുകയായിരുന്നു. വ്യാജ ചെക്കുകൾ ഉപയോഗിച്ച് തട്ടിപ്പ് നടത്തി കൗമാരത്തിൽ തന്നെ പിടിയിലായ ഫ്രാങ്ക് അബഗ്നൈലിന്റെ ചെക്കുകളിലുള്ള വൈദഗ്ദ്യം പിന്നീട് എഫ്ബിഐ മറ്റു ചെക്ക് തട്ടിപ്പുകാരെ പിടിക്കാൻ ഉപയോഗിച്ചു എന്നത് ചരിത്രം. ഇപ്പോൾ അമേരിക്കയിലെ അറിയപ്പെടുന്ന സുരക്ഷാ ഉപദേശകൻ, ലോകത്തിലെ പല ബാങ്കുകൾക്കും തട്ടിപ്പുനടത്താൻ പറ്റാത്ത തരത്തിലുള്ള ചെക്കുകൾ ഡിസൈൻ ചെയ്തുകൊടുത്തിട്ടുണ്ട് അദ്ദേഹം. സൂര്യയെ നായകനാക്കി കെ.വി.ആനന്ദ് സംവിധാനം ചെയ്ത അയൻ എന്ന തമിഴ് സിനിമയുടെ ക്ലൈമാക്സ് ക്യാച്ച് മീ ഇഫ് യൂ ക്യാനിന്റെ ക്ലൈമാക്സിൽ നിന്നും ഇൻസ്പയർ ചെയ്തതാണെന്ന് സംശയിക്കുന്നത് ഒരു തെറ്റാവില്ല.
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ