Dances With Wolves » ᴀ ʀᴇᴛᴀʟɪᴀᴛᴇ
■ അമേരിക്കയിൽ കുടിയേറ്റക്കാർക്കെതിരെ നിയമം കർശനമായപ്പോൾ ആക്റ്റിവിസ്റ്റുകൾ പലതും പറയുന്നത് കേട്ടിട്ടുണ്ട്, അത് പറയാൻ അമേരിക്കക്കാർക്ക് എന്തവകാശമുണ്ട് എന്ന്. കാരണം അമേരിക്ക എന്നത് ശരിക്കും കുടിയേറ്റ ഭൂമിയാണ്. അമേരിക്കൻ മണ്ണിന്റെ യഥാർത്ഥ അവകാശികളായ റെഡ് ഇന്ത്യൻസ് എന്ന് യൂറോപ്യൻസ് വിളിച്ച ഗോത്രവർഗ്ഗക്കാരുടെ മണ്ണ്. അവരെ ഒന്നൊന്നായി ആ നാട്ടിൽ നിന്നും തുരത്തിയാണ് ഇന്ന് കാണുന്ന അമേരിക്ക ഉണ്ടായത്. ആ മണ്ണിൽ ചവിട്ടി നിന്നാണ് ഇന്ന് അമേരിക്കക്കാർ അഹങ്കാരം കൊള്ളുന്നത്. കെവിൻ കോസ്റ്റ്നർ സംവിധാനം നിർവ്വഹിച്ച എപിക് വെസ്റ്റേൺ ഹിസ്റ്റോറിക് ഹോളിവുഡ് ചിത്രമാണ് ഡാൻസെസ് വിത്ത് വോൾവ്സ്. കോസ്റ്റ്നർ തന്നെയാണ് കേന്ദ്രകഥാപാത്രമായി അഭിനയിച്ചിരിക്കുന്നത്. മൈക്കൽ ബ്ലേക്കിന്റെ ഇതേപേരിലുള്ള പുസ്തകത്തെ അടിസ്ഥാനമാക്കി അദ്ദേഹം തന്നെയാണ് തിരക്കഥ രചിച്ചിരിക്കുന്നത്. ഡീൻ സെംലെർ ഛായാഗ്രഹണവും നീൽ ട്രാവിസ് എഡിറ്റിങ്ങും നിർവ്വഹിച്ചിരിക്കുന്നു. ജോൺ ബാരിയാണ് മനോഹരമായി പശ്ചാത്തല സംഗീതമൊരുക്കിയിരിക്കുന്നത്. ചിത്രത്തിലെ ഏറ്റവും പ്രധാനപ്പെട്ട രംഗങ്ങളിൽ ഒന്നായ ഫയർ ഡാൻസിന് സംഗീതം നൽകിയിരിക്കുന്നത് പീറ്റർ ബഫറ്റാണ്.
✍sʏɴᴏᴘsɪs
■ 1863ൽ കോൺഫെഡറേറ്റ് സ്‌റ്റേറ്റും യൂണിയൻ ആർമിയും തമ്മിലുള്ള കലുഷിതമായ ആഭ്യന്തര യുദ്ധത്തിനിടയിൽ യൂണിയൻ ആർമി സൈനികനായ ലെഫ്റ്റനന്റ് ജോൺ ജെ. ഡൻബാറിന്റെ കാലിന് മാരകമായ പരിക്ക് പറ്റുന്നു. തന്റെ കാല് നഷ്ടപ്പെട്ടു എന്നുറപ്പിക്കുന്ന ഡൻബാർ മരണം വരിക്കാൻ തീരുമാനിച്ച് കോൺഫെഡറേറ്റ് അതിർത്തിയിൽ അവരുടെ സൈനികരുടെ തോക്കുകൾക്ക് മുന്നിലൂടെ കുതിരയോടിച്ചു പോകുന്നു. കോൺഫെഡറേറ്റ് സൈനികർ ഡൻബാറിനെ ലക്ഷ്യം വെക്കുന്നതിനിടയിൽ യൂണിയൻ ആർമി അവരെ ആക്രമിച്ചു തോൽപ്പിക്കുന്നു. രക്ഷപ്പെടുന്ന ഡൻബാറിന് അദ്ദേഹത്തിന്റെ ധീരതയ്ക്കുള്ള സമ്മാനമായി സൈന്യം, അദ്ദേഹം ഇഷ്ടപ്പെടുന്ന ഏത് സ്ഥലത്തും പോസ്റ്റിങ് നൽകാമെന്ന് ഉറപ്പുകൊടുക്കുന്നു. അമേരിക്കൻ ഗോത്രവർഗ സംസ്കാരമവശേഷിക്കുന്ന പടിഞ്ഞാറൻ അതിർത്തിയിലേക്ക് സ്ഥലം മാറ്റം ആവശ്യപ്പെടുന്ന ഡൻബാറിന് പടിഞ്ഞാറൻ അതിർത്തിയിലെ ഫോർട്ട് ഹെയ്‌സിലേക്ക് മാറ്റം കൊടുക്കുന്നു. ഫോർട്ട് ഹെയ്സ് മേജർ ഫാംബ്രോ, ആക്രമണകാരികളായ പോണീകളുടെയും മിതവാദികളായ ലക്കോട്ട ഇന്ത്യൻസിന്റെയും വിഹാരകേന്ദ്രമായ ഫോർട്ട് സെഡ്‌വിക്കിലേക്ക് ഡൻബാറിനെ അയക്കുന്നു, അതും ഒറ്റയ്ക്ക്..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ഡേവിഡ് ജെ. ഡൻബാറായി കെവിൻ കോസ്റ്റ്നർ പല മേക്കോവറുകളിലെത്തി. ഡൻബാറിന് ലക്കോട്ട ഇന്ത്യൻസിന്റെ തലവൻ നൽകിയ മറ്റൊരു പേരാണ് "ഡാൻസെസ് വിത്ത് വോൾവ്സ്". മേരി മക്ഡൊണലാണു സ്റ്റാന്റ്‌സ് വിത്ത് ഏ ഫിസ്റ്റ് എന്ന നായികാ വേഷം ചെയ്തിരിക്കുന്നത്. ഗ്രഹാം ഗ്രീനി (കിക്കിങ് ബേഡ്), റോഡ്‌നി A.ഗ്രാൻഡ് (വിൻഡ് ഇൻ ഹിസ് ഹെയർ), ഫ്ലോയ്ഡ് റെഡ് ക്രൗ വെസ്റ്റർമാൻ (ടെൻ ബിയേഴ്സ്), ടന്റൂ കർദിനാൾ (ബ്ലാക്ക് ശൗൾ), ജിമ്മി ഹെർമൻ (സ്റ്റോൺ കാഫ്), നഥാൻ ലീ ചെയ്‌സിങ് ഹിസ് ഹോഴ്സ് (സ്‌മൈൽസ് ഏ ലോട്ട്), മൈക്കൽ സ്പിയേഴ്‌സ് (ഒട്ടർ), ജേസൺ R.ലോൺഹിൽ (വേം), ചാൾസ് റോക്കറ്റ് (ലെഫ്റ്റനന്റ് എൽജിൻ), റോബർട്ട്‌ പാസ്റ്റൊറെല്ലി (ടിമ്മൺസ്), ടോണി പിയേഴ്സ് (സ്പൈവി), കിർക് ബാൾട്സ് (എഡ്വേഡ്‌സ്), ടോം എവെരെറ്റ് (സെർജന്റ് പെപ്പർ), മോറി ചെയ്കിൻ (മേജർ ഫാംബ്രോ), വെസ് സ്റ്റുഡി (പോണി), മൈക്കൽ ഹോർട്ടൻ (ക്യാപ്റ്റൻ കാർഗിൽ) തുടങ്ങിയവരാണ് മറ്റുപ്രധാന അഭിനേതാക്കൾ.
📎 ʙᴀᴄᴋwᴀsʜ
■ മികച്ച ചിത്രം, മികച്ച സംവിധായകൻ (കെവിൻ കോസ്റ്റ്നർ), മികച്ച തിരക്കഥ (മൈക്കൽ ബ്ലേക്ക്), മികച്ച ഛായാഗ്രഹണം (ഡീൻ സെംലെർ), മികച്ച ശബ്ദം (റസ്സൽ വില്യംസ്, ജെഫ്രി പെർകിൻസ്, ബിൽ W.ബെന്റൻ, ഗ്രിഗറി H.വാട്ട്കിൻസ്), മികച്ച എഡിറ്റിംഗ് (നീൽ ട്രാവിസ്), മികച്ച സംഗീതം (ജോൺ ബാരി) എന്നീ വിഭാഗങ്ങളിലായി ഏഴ് ഓസ്കാറുകളാണ് ഡാൻസെസ് വിത്ത് വോൾവ്സ് വാരിക്കൂട്ടിയത്. ഭൂരിഭാഗം സംഭാഷണങ്ങളും ലക്കോട്ട ഭാഷയിലായിരുന്നു എന്നൊരു പ്രത്യേകതയുണ്ട് ചിത്രത്തിന്. പോണി ഭാഷയും ഉപയോഗിച്ചിട്ടുണ്ട്. 2007ൽ അമേരിക്കയുടെ നാഷണൽ ഫിലിം രെജിസ്ട്രിയിലേക്കും തെരഞ്ഞെടുക്കപ്പെട്ടിരുന്നു. 1800കളുടെ മധ്യത്തിൽ പോണി ഗോത്രവർഗ്ഗക്കാരുടെ ഇടയിൽ പ്രവർത്തിച്ചിരുന്ന ജോൺ ഡൻബാർ എന്നൊരു പാതിരിയുണ്ടായിരുന്നു. പോണികളെ ക്രൂരന്മാരും ലക്കോട്ടകളെ നല്ലവരുമായി ഏകപക്ഷീയമായി ചിത്രീകരിച്ചതിൽ വിമർശനം നേരിടേണ്ടി വന്നിട്ടുണ്ട് ചിത്രത്തിന്. ശക്തരായ ലക്കോട്ടകളുടെ ഇരകളാവാൻ വിധിക്കപ്പെട്ടവരായിരുന്നു പോണികൾ എന്നായിരുന്നു ചരിത്രത്തിൽ ഭൂരിഭാഗവും വിലയിരുത്തപ്പെട്ടിട്ടുള്ളത്.
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ