Hacksaw Ridge » ᴀ ʀᴇᴛᴀʟɪᴀᴛᴇ
■ രണ്ടാം ലോക മഹായുദ്ധ കാലത്ത് ഒക്കിനാവയിൽ വെച്ച് അമേരിക്കയും ജപ്പാനും തമ്മിലുള്ള തീപാറുന്ന പോരാട്ടത്തിനിടയിൽ ഒരു തോക്ക് പോലും കൈയ്യിലെടുക്കാതെ പരിക്കേറ്റ 75 അമേരിക്കൻ പട്ടാളക്കാരെ യുദ്ധമുഖത്ത് നിന്നും രക്ഷിച്ച അമേരിക്കൻ ആർമി മെഡിക്, ഡെസ്മണ്ട് ഡോസിന്റെ അസാധാരണ ജീവിത കഥ. അത് സിനിമയാക്കുമ്പോൾ സംവിധായക കസേരയിൽ ഇരിക്കുന്നത് "മെൽഗിബ്സൺ" കൂടിയാവുമ്പോൾ പടം ക്ലാസ്സാവാതെ വേറെ നിവർത്തിയില്ല. റോബർട്ട് ഷെങ്കനും ആൻഡ്രൂ നൈറ്റും ചേർന്നാണ് തിരക്കഥ ഒരുക്കിയിരിക്കുന്നത്. സൈമൺ ഡഗ്ഗനാണ് ഛായാഗ്രഹണം. ചിത്രസംയോജനം ജോൺ ഗിൽബെർട്ടിന്റേതാണ്. റൂപെർട് ഗ്രെഗ്സൺ വില്യംസാണ് പശ്ചാത്തല സംഗീതം ഒരുക്കിയിരിക്കുന്നത്.
✍sʏɴᴏᴘsɪs
■ കുട്ടിയായിരുന്ന ഡെസ്മണ്ട് ഡോസ് കല്ലുകൊണ്ട് തലയ്ക്കടിച്ച് ഇളയസഹോദരൻ ഹാലിനെ മൃതപ്രായനാക്കുന്നു. അതിന് ശേഷം പക്വതയോടെ ജീവിക്കണമെന്ന് കരുതുന്ന അവന് അതിനും സാധിക്കുന്നില്ല. ഡെസ്മണ്ടിന്റെ കൗമാര പ്രായത്തിൽ മുൻസൈനികനായിരുന്ന അവന്റെ അച്ഛനും അമ്മയും തമ്മിൽ വഴക്ക് നടക്കുന്നതിനിടയിൽ അമ്മയെ രക്ഷിക്കാനായി അവൻ അച്ഛന് നേരെ തോക്കുചൂണ്ടുന്നു. അതിന് ശേഷം തീരാത്ത കുറ്റബോധം കാരണം ഇനിയൊരിക്കലും ജീവിതത്തിൽ തോക്ക് കൈയ്യിലെടുക്കില്ല എന്ന് അവൻ പ്രതിജ്ഞയെടുക്കുന്നു. മറ്റുള്ളവരെ സഹായിച്ചും പരിചരിച്ചുമായിരുന്നു അവന്റെ യൗവനം. പരിക്കുപറ്റിയ ഒരാളെയും കൊണ്ട് ഹോസ്പിറ്റലിൽ എത്തുന്ന അവൻ ദൊറോത്തി എന്ന നഴ്സിനെ പരിചയപ്പെടുന്നു. അവർ തമ്മിൽ പ്രണയത്തിലാകുന്നു. രണ്ടാം ലോകമഹായുദ്ധ കാലത്ത് ജപ്പാൻ പേൾഹാർബർ ആക്രമിച്ചതിന് ശേഷം ഡെസ്മണ്ട് അമേരിക്കൻ സൈന്യത്തിൽ നിയമനം കിട്ടുന്നു. സെർജെന്റ് ഹോവെലിന്റെ കീഴിലുള്ള തന്റെ ട്രൈനിങ്ങിൽ വളരെ മികച്ച പ്രകടനം നടത്തുന്ന ഡെസ്മണ്ട് പക്ഷേ തോക്ക് ഉപയോഗിക്കുന്നതിന് വിസമ്മതിക്കുന്നു. ഒരു മെഡിക് ആവുകയാണ് തന്റെ ലക്ഷ്യമെന്ന ഡെസ്മണ്ടിന്റെ വിശദീകരണം ഹോവെലിനെ തൃപ്തനാക്കുന്നില്ല. അയാൾ ക്രൂരമായ ശിക്ഷകൾ ഡെസ്മണ്ടിനു വിധിച്ചു. സഹപ്രവർത്തകരുടെ ക്രൂരമായ മർദ്ദനങ്ങൾക്ക് ശേഷവും ഡെസ്മണ്ട് തീരുമാനത്തിൽ ഒരു മാറ്റവും വരുത്തിയില്ല. പക്ഷേ തോക്ക് ഉപയോഗിക്കാൻ നിഷേധിച്ചതിലൂടെ പട്ടാള അച്ചടക്ക ലംഘനം ആരോപിച്ച് ഡെസ്മണ്ട് അറസ്റ്റ് ചെയ്യപ്പെടുന്നു.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ഡെസ്മണ്ട് ഡോസായി അഭിനയിച്ചിരിക്കുന്നത് ആൻഡ്രൂ ഗാർഫീൽഡാണ്. അറിയില്ലേ ഗാർഫീൽഡിനെ? അമേസിങ് സ്പൈഡർമാൻ സീരീസിലെ നായകൻ തന്നെ. പക്ഷേ, ഈ എലുമ്പൻ പയ്യന് ഒരു പട്ടാള ചിത്രത്തിൽ എന്തുകാര്യം എന്നത് പല പ്രേക്ഷകരെയും പോലെ എന്റെയും സംശയമായിരുന്നു. എന്നാൽ ഗാർഫീൽഡിന്റേത് അതെല്ലാം ആസ്ഥാനത്താക്കുന്ന പ്രകടനമായിരുന്നു. തനിക്ക് നന്നായി അഭിനയിക്കാനറിയാം എന്ന് ആൻഡ്രൂ തെളിയിച്ച സിനിമ എന്ന് തന്നെ പറയാം. തെരേസ പാൽമറാണ് ഡെസ്മണ്ട് ഡോസിന്റെ പ്രണയിനിയായ നഴ്സ് ദൊറോത്തി സ്ക്യൂട്ടിന്റെ വേഷമിട്ടിരിക്കുന്നത്. വിൻസ് വോൻ (സെർജെന്റ് ഹോവെൽ), സാം വർത്തിങ്ങ്ടൺ (ക്യാപ്റ്റൻ ജാക്ക് ഗ്ലോവർ), ലൂക്ക് ബ്രാസി (സ്മിറ്റി റൈക്കർ), ഹ്യൂഗോ വീവിങ് (ടോം ഡോസ്, ഡെസ്മണ്ടിന്റെ അച്ഛൻ), റയാൻ കോർ (ലെഫ്റ്റനന്റ് മാൻവിൽ), റേച്ചൽ ഗ്രിഫിത്ത്സ് (ബെർത ഡോസ്, ഡെസ്മണ്ടിന്റെ അമ്മ) തുടങ്ങിയവരാണ് മറ്റു പ്രധാന അഭിനേതാക്കൾ.
📎 ʙᴀᴄᴋwᴀsʜ
■ ആൻഡ്രൂ ഗാർഫീൽഡിന് മികച്ച നടനുള്ള ഓസ്കാർ നോമിനേഷൻ ആദ്യമായി ലഭിച്ചത് ഈ സിനിമയിലൂടെയാണ്. മികച്ച ചിത്രത്തിനും മികച്ച സംവിധായകനും മികച്ച സൗണ്ട് എഡിറ്റിങ്ങിനുമുള്ള ഓസ്കാർ തലനാരിഴയ്ക്കാണ് നഷ്ടപ്പെട്ടത്. എങ്കിലും മികച്ച ശബ്ദ മിശ്രണത്തിനും മികച്ച ചിത്രസംയോജനത്തിനുമുള്ള ഓസ്കാർ പുരസ്കാരങ്ങൾ നേടാനായി.
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ