Braveheart » ᴀ ʀᴇᴛᴀʟɪᴀᴛᴇ
■ പതിമൂന്നാം നൂറ്റാണ്ടിൽ ബ്രിട്ടീഷ് സാമ്രാജ്യത്തിനെ കിടുകിടെ വിറപ്പിച്ച സ്കോട്ട്ലാന്റ് സ്വാതന്ത്ര്യ പോരാളി സർ വില്ല്യം വാലസിനെക്കുറിച്ച് കേട്ടിട്ടുണ്ടോ. "മാപ്പ് എന്ന ഒരേയൊരു വാക്ക് മാത്രം പറഞ്ഞാൽ മതി നിനക്ക് പെട്ടെന്നുള്ളൊരു മരണം തരാം, അല്ലെങ്കിൽ ജീവനോടെ ക്രൂരമായി പിച്ചിച്ചീന്തിയുള്ള മരണമായിരിക്കും നിനക്ക് വിധിക്കുക" എന്ന് വാലസിന് മജിസ്‌ട്രേറ്റ് അവസാന അവസരം കൊടുത്തപ്പോഴും, തന്റെ ഹൃദയത്തിലേക്ക് മൂർച്ചയുള്ള കഠാര കുത്തിയിറക്കിയപ്പോഴും ആ ധീരനായ പോരാളി ഒറ്റ വാക്കേ പറഞ്ഞുള്ളൂ "സ്വാതന്ത്ര്യം". വാലസിന്റെ വെട്ടിയെടുത്ത തല ലണ്ടൻ ബ്രിഡ്ജിൽ കെട്ടിത്തൂക്കിയിട്ടിട്ടും അധികാരികളുടെ കോപമടങ്ങിയില്ല. വാലസിന്റെ ശരീരം പല കഷ്ണങ്ങളാക്കി ലോകത്തിന്റെ പല ഭാഗത്ത് അവർ പ്രദർശനത്തിന് വെച്ചു, ഇനിയൊരു വാലസ് ഉണ്ടാവാതിരിക്കാൻ. ജീവിച്ചിരിക്കുന്ന വാലസിനെക്കാൾ അവർ ഭയപ്പെട്ടത് കൊല്ലപ്പെട്ട വാലസിനെയായിരുന്നു. അതിനാൽ വാലസിന്റെ ശരീരാവശിഷ്ടങ്ങൾ അവർ മറ്റാരുമറിയാതെ രഹസ്യമായി എവിടെയോ മറച്ചു. റോമാ സാമ്രാജ്യം അടിമകളുടെ പോരാളി സ്പാർട്ടക്കസിനു വിധിച്ച അതേ വിധി..
William Wallace: Every Man Dies, Not Every Man Truly Lives.
മെൽ ഗിബ്‌സൺ സംവിധാനം നിർവ്വഹിച്ച റൊമാന്റിക് ആക്ഷൻ ഹിസ്റ്റോറിക് എപിക് വാർ ഹോളിവുഡ് ചിത്രമാണ് ബ്രേവ്ഹെർട്ട്. അദ്ദേഹം തന്നെയാണ് കേന്ദ്രകഥാപാത്രത്തെ അവതരിപ്പിച്ചിരിക്കുന്നത്. ബ്ലൈൻഡ് ഹാരിയുടെ ദി വാലസ് എന്നറിയപ്പെടുന്ന ക്ലാസ്സിക് കവിതയെ ആസ്പദമാക്കി രണ്ടാൽ വാലസാണ് തിരക്കഥ എഴുതിയിരിക്കുന്നത്. ജോൺ ടോൾ ഛായാഗ്രഹണവും സ്റ്റീവൻ റോസെൻബ്ലം എഡിറ്റിങ്ങും നിർവ്വഹിച്ചിരിക്കുന്നു. ജെയിംസ് ഹോർണറിന്റെതാണ് മനോഹരമായ പശ്ചാത്തല സംഗീതം.
✍sʏɴᴏᴘsɪs
■ പതിമൂന്നാം നൂറ്റാണ്ടിൽ സ്കോട്ട്ലാൻഡ് ഭരിച്ചിരുന്ന അലക്‌സാണ്ടർ മൂന്നാമന്റെ മരണശേഷം ഇംഗ്ലണ്ടിലെ എഡ്വേർഡ് ഒന്നാമൻ സ്കോട്ട്ലൻഡിനെ അധിനിവേശപ്പെടുത്തി. അലക്‌സാണ്ടറിന് അവകാശികളില്ലായിരുന്നു. എഡ്വേഡിന്റെ ഭരണത്തിന് കീഴിൽ സ്കോട്ട്ലാൻഡിലെ ജനങ്ങൾ സ്വാതന്ത്ര്യം നഷ്ടപ്പെട്ടവരായി, എഡ്വേഡിന്റെ അനുയായികളുടെ ക്രൂരതകൾക്കും പീഡനങ്ങൾക്കും ഇരയാക്കപ്പെട്ടവരായി. തന്റെ അച്ഛന്റെയും സഹോദരന്റെയും മരണശേഷം കുഞ്ഞു വില്ല്യം വാലസ് വളർന്നത് അമ്മാവന്റെ കൂടെയായിരുന്നു, ജന്മനാട്ടിൽ നിന്നകന്ന്. വളരെ നല്ലവനായിരുന്ന അമ്മാവൻ അവന് വിദ്യാഭ്യാസവും ആയോധനകലയിൽ പരിശീലനവും നൽകി. യുവാവായി ജന്മനാട്ടിൽ തിരിച്ചെത്തിയ വാലസ് കളിക്കൂട്ടുകാരി മുറോണുമായി പ്രണയത്തിലായി, ഏറെ താമസിയാതെ അവർ രഹസ്യമായി വിവാഹിതരായി. പക്ഷേ ആ സന്തോഷത്തിന് ക്ഷണ നേരത്തെ ആയുസ്സേ ഉണ്ടായിരുന്നുള്ളൂ. സ്കോട്ട്ലാൻഡിലെ സാധാരണക്കാരുടെ സന്തോഷങ്ങൾക്കിടയിൽ വിലങ്ങുതടിയായി അവർ വന്നു, ക്രൂരന്മാരായ ഇംഗ്ലീഷ് പട്ടാളം. വാലസിന്റെ പ്രാണന്റെ പാതിയായിരുന്ന മുറോണെ ഒരു ഇംഗ്ലീഷ് സൈനികനെ ആക്രമിച്ചു എന്ന കുറ്റത്തിന് വധശിക്ഷയ്ക്കിരയാക്കി, വാലസിന് രക്ഷിക്കാൻ സാധിച്ചില്ല. പക്ഷേ, പ്രണയിനിയെ നഷ്ടപ്പെട്ട വാലസ് ഇംഗ്ലീഷ് പട്ടാളത്തിനെതിരെ പടയൊരുക്കി. ഇംഗ്ലീഷ് സാമ്രാജ്യത്തെ തന്നെ വിറപ്പിച്ച വില്ല്യം വാലസിന്റെ പടയോട്ടമായിരുന്നു പിന്നീട്..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ മെൽ ഗിബ്‌സനാണ് വില്ല്യം വാലസിനെ അവതരിപ്പിച്ചിരിക്കുന്നത്. വ്യക്തിപരമായി എനിക്കേറ്റവും ഇഷ്ടപ്പെട്ട മെൽ ഗിബ്‌സൺ കഥാപാത്രമായിരുന്നു വാലസ്. കാതറീൻ മക്കോർമാകാണ് വാലസിന്റെ കളിക്കൂട്ടുകാരിയും ആദ്യ പ്രണയിനിയുമായിരുന്ന മുറോൺ മക്ക്ലനോഗിന്റെ വേഷം അഭിനയിച്ചിരിക്കുന്നത്. കുഞ്ഞു വാലസായി ജെയിംസ് റോബിൻസണും കുഞ്ഞു മുറോണായി മൈറി കാൽവിയും അഭിനയിച്ചിരിക്കുന്നു. വാലസിനോട് അനുരാഗ വിവശയാകുന്ന ഫ്രഞ്ച് രാജകുമാരി ഇസബെല്ലയുടെ വേഷത്തിലെത്തിയിരിക്കുന്നത് സോഫി മാർക്യൂവാണ്. ആംഗസ് മക്ഫഡിയെൻ (റോബർട്ട്‌ ദി ബ്രൂസ്), പാട്രിക് മക്കോഹൻ (എഡ്വേഡ് ഒന്നാമൻ രാജാവ്), ബ്രെൻഡൻ ഗ്ലേസൺ (ഹാമിഷ്), പീറ്റർ ഹാർലി (എഡ്വേഡ് രാജകുമാരൻ), ജെയിംസ് കോസ്മോ (കാംപെൽ), ഡേവിഡ് ഓഹാര (സ്റ്റീഫൻ ഓഫ് അയർലൻഡ്), ഇയാൻ ബാന്നെൻ (ബ്രൂസിയുടെ അച്ഛൻ), സീൻ മക്കിൻലി (മക്ക്ലനോ), ബ്രയാൻ കോക്സ് (ആർഗിൽ വാലസ്), സീൻ ലാവ്‌ലർ (മാൽക്കം വാലസ്), സാൻഡി നെൽസൺ (ജോൺ വാലസ്), മാൽകം ടൈർണി (മജിസ്‌ട്രേറ്റ്) തുടങ്ങിയവരാണ് മറ്റുപ്രധാന അഭിനേതാക്കൾ.
📎 ʙᴀᴄᴋwᴀsʜ
■ മികച്ച ചിത്രം, മികച്ച സംവിധായകൻ (മെൽ ഗിബ്‌സൺ), മികച്ച ഛായാഗ്രഹണം (ജോൺ ടോൾ), മികച്ച ശബ്ദ സങ്കലനം (ലോൻ ബെൻഡർ, പെർ ഹാൽബെർഗ്), മികച്ച മേക്കപ്പ് (പീറ്റർ ഫ്രാമ്പ്ടൺ, പോൾ പാറ്റിൻസൺ, ലോയിസ് ബർവെൽ) എന്നീ വിഭാഗങ്ങളിലായി അഞ്ച് ഓസ്കാർ അവാർഡുകളാണ് ബ്രേവ്ഹെർട്ട് വാരിക്കൂട്ടിയത്. സ്കോട്ട്ലാൻഡിലെ എഡിൻബെർഗ് കോട്ടയിൽ കണ്ട വില്ല്യം വാലസിന്റെ പ്രതിമയുടെ പിന്നിലെ ചരിത്രം തേടിയുള്ള അന്വേഷണമാണ് രണ്ടാൽ വാലസിന് ബ്രേവ്ഹെർട്ട് എന്ന മനോഹരമായ തിരക്കഥ സമ്മാനിച്ചത് എന്നത് കൗതുകകരമായ വസ്തുതയാണ്.
8.4/10 · IMDb
77% · Rotten Tomatoes
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ