Cast Away

Cast Away » ᴀ ʀᴇᴛᴀʟɪᴀᴛᴇ

■ മനുഷ്യവാസമില്ലാത്ത ഒരു ദ്വീപിൽ ഒറ്റപ്പെട്ടുപോയ ഒരു മനുഷ്യന്റെ അതിജീവനത്തിന്റെ കഥ പറഞ്ഞ സിനിമയാണ് റോബർട്ട് സെമാക്കിസ് സംവിധാനം നിർവ്വഹിച്ച് ടോം ഹാങ്ക്സ് നായകനായ കാസ്റ്റ് എവേ എന്ന ചിത്രം. മനുഷ്യന്റെ അതിജീവനം പ്രമേയമാക്കിയുള്ള വേറെയും ധാരാളം സിനിമകൾ കണ്ടിട്ടുണ്ടെങ്കിലും (ദി റെവനന്റ്, ലൈഫ് ഓഫ് പൈ, സാൻക്റ്റം, ദി ബ്ലൂ ലഗൂൺ, അപ്പോകാലിപ്റ്റോ, കിങ്‌കോങ്, Etc..) ഇത് വ്യത്യസ്തമായൊരു അനുഭവമായിരുന്നു. ടോം ഹാങ്ക്സ് എന്ന നടന്റെ സാന്നിധ്യം തന്നെയായിരുന്നു എന്നെ ആകർഷിച്ചത് എന്നും പറയാം. മനുഷ്യൻ തീയുണ്ടാക്കാൻ പഠിച്ചതാണ് മനുഷ്യപുരോഗതിക്ക് നാമ്പിട്ടത് എന്ന് പറഞ്ഞു കേട്ടിട്ടുണ്ട്. വളരെ നാളത്തെ പരിശ്രമത്തിന് ശേഷം താനുണ്ടാക്കിയ
തീനാളം  കാണുമ്പോൾ ടോമിന്റെ കഥാപാത്രത്തിനുണ്ടാകുന്ന ഒരു ഭ്രാന്തമായ വികാരമുണ്ടായിരുന്നു, സന്തോഷവും സങ്കടവുമെല്ലാം ആ മുഖത്ത് പ്രകടമായിരുന്നു. ആദ്യമായി തീയുണ്ടാക്കാൻ പഠിച്ച മനുഷ്യനുണ്ടായ സന്തോഷം എന്ത്രമാത്രമായിരിക്കും എന്നായിരുന്നു ഞാൻ ആ രംഗം കാണുന്ന വേളയിൽ ആലോചിച്ചത്. വില്യം ബ്രോയിൽസാണ് ചിത്രത്തിൻറെ കഥ രചിച്ചിരിക്കുന്നത്.

✍sʏɴᴏᴘsɪs           

    

■ ലോകത്തിലെ തന്നെ ഏറ്റവും മികച്ച കൊറിയർ സ്ഥാപനമായ അമേരിക്കൻ കമ്പനി, ഫെഡക്സിന്റെ ഇന്റർനാഷണൽ എക്സിക്യൂട്ടീവ് ഓഫീസറായിരുന്നു ചക്ക് നോലൻഡ്‌. സമയനിഷ്‌ഠയിൽ കണിശതപുലർത്തിയിരുന്ന അയാൾ തന്റെ പ്രണയിനി കെല്ലി ഫ്രിയേഴ്‌സിനൊപ്പം ടെന്നസി സ്റ്റേറ്റിലെ മെംഫിസിലായിരുന്നു താമസിച്ചിരുന്നത്. ചക്കിന്റെ തിരക്കുപിടിച്ച ബിസിനസ് ജീവിതത്തിനിടയിൽ ശരിക്കൊന്ന് പ്രണയിക്കാൻ പോലും അവർക്ക് സമയം ലഭിച്ചിരുന്നില്ല.
ക്രിസ്മസ് രാത്രിക്ക് മുൻപ് തിരിച്ചെത്താമെന്ന ഉറപ്പോടെ ധാരാളം ഉപഹാരങ്ങൾ തന്റെ പ്രണയിനിക്ക് സമ്മാനിച്ച് ചക്ക് നോലൻഡ് മലേഷ്യയിലേക്കുള്ള തന്റെ ഒദ്യോഗിക യാത്രയ്ക്കുവേണ്ടി വിമാനം കയറി.  കാർഗോയുമായിപ്പോവുന്ന ഫെഡെക്സിന്റെ തന്നെ പ്രൈവറ്റ് വിമാനമായിരുന്ന അതിൽ പൈലറ്റുമാരും ചക്കും മാത്രമായിരുന്നു ഉണ്ടായിരുന്നത്. ഭയങ്കരമായ കൊടുങ്കാറ്റിൽ അകപ്പെട്ട് നിയന്ത്രണം നഷ്ടമായി പസഫിക് സമുദ്രത്തിൽ ആ വിമാനം തകർന്നു വീഴുന്നു. അപകടത്തെ അതിജീവിച്ച ചക്ക് മാത്രം ഒരു ദ്വീപിൽ എത്തിപ്പെടുന്നു. അവിടെ അയാൾക്ക് കൂട്ടിനുണ്ടായിരുന്നത് തകർന്ന വിമാനത്തിൽ നിന്നും ഒഴുകിയെത്തിയ ഫെഡെക്സിന്റെ പാഴ്സലുകളും തന്റെ പ്രണയിനി സമ്മാനിച്ച അവളുടെ ചിത്രമുള്ള ഒരു വാച്ചും മാത്രം. ആൾത്താമസമില്ലാത്ത ദ്വീപിൽ നാലുവർഷത്തോളം തനിച്ച് ജീവിക്കേണ്ടി വരുന്ന ഒരു മനിഷ്യന്റെ അതിജീവന കഥയാണ് കാസ്റ്റ് എവേ നമ്മോട് പറയുന്നത്.

👥ᴄᴀsᴛ & ᴘᴇʀfᴏʀᴍᴀɴᴄᴇs   

    

■ ചക്ക് നോലൻഡായി അസാമാന്യ പ്രകടനം നടത്തിയ ടോം ഹാങ്ക്സിന്റെ കൂടെ പ്രേക്ഷകരും ആ ദ്വീപിൽ ഒറ്റപ്പെട്ടുപോയി എന്ന് പറഞ്ഞാൽ അതൊരു തെറ്റാവില്ല. തന്റെ കഥാപാത്രത്തിന് വേണ്ടി ശരീരഭാര വ്യത്യാസത്തിലും ടോം ശ്രദ്ധിച്ചിട്ടുണ്ട്. ദ്വീപിൽ എത്തിപ്പെടുന്ന നോലൻഡും നാലുവർഷങ്ങൾക്ക് ശേഷമുള്ള നോലൻഡും വ്യത്യസ്തനായിരുന്നു എന്ന് പ്രേക്ഷകർക്ക് മനസിലാക്കാം. ഹെലൻ ഹണ്ടാണ് ചക്കിന്റെ പ്രണയിനി കെല്ലി ഫ്രിയേഴ്സായി അഭിനയിച്ചിരിക്കുന്നത്. നിക്ക് സേർസി (സ്റ്റാൻ), ജെന്നിഫർ ലെവിസ് (ബെക്ക ട്വിഗ്), ക്രിസ് നോത് (ജെറി ലോവേറ്റ്), ലാറി വൈറ്റ് (ബെറ്റിന പീറ്റേഴ്‌സൺ), വിൻസ് മാർട്ടിൻ (ആൽബർട്ട് അൽ മില്ലെർ), ജോഫ്രി ബ്ലെയ്ക്ക് (മെയ്നാഡ് ഗ്രഹാം), മൈക്കൽ ഫോറസ്ററ് (ജാക്ക്‌), ജയ് അക്കോവോൻ (പെട്രോവ്) തുടങ്ങിയവരാണ് മറ്റു അഭിനേതാക്കൾ..

📽✄ᴛᴇᴄʜɴɪᴄᴀʟ sɪᴅᴇs

■ ഡോൺ ബർഗസ്സാണ് ചിത്രത്തിൻറെ ഛായാഗ്രാഹകൻ. ദ്വീപിന്റെ ഭംഗിയും രാത്രിയുടെ ഭീകരതയും അദ്ദേഹത്തിൻറെ ക്യാമറയിൽ ഭദ്രമായിരുന്നു.

■ ആർതർ സ്‌കിമ്മിഡാണ്‌ ചിത്രസംയോജനം നിർവ്വഹിച്ചിരിക്കുന്നത്.

🎵🎧ᴍᴜsɪᴄ & ʙᴀᴄᴋɢʀᴏᴜɴᴅ sᴄᴏʀᴇs

■ അലൻ സിൽവെസ്ട്രിയാണ് സംഗീതം നിർവ്വഹിച്ചിരിക്കുന്നത്. മനോഹരം എന്ന് ഒറ്റവാക്കിൽ പറയാം.

📎 ʙᴀᴄᴋwᴀsʜ

■ കാസ്റ്റ് എവേയിലെ അഭിനയത്തിന് ടോം ഹാങ്ക്സിന് മികച്ച നടനുള്ള ഓസ്കാർ നോമിനേഷൻ ലഭിച്ചുവെങ്കിലും മികച്ച ചിത്രത്തിന്റേതടക്കം അഞ്ച്‌ ഓസ്കാറുകൾ വാരിക്കൂട്ടിയ ഗ്ലാഡിയേറ്ററിന്റെ വർഷമായിരുന്നു അന്ന്. ഗ്ലാഡിയേറ്ററിലെ നായകൻ റസൽ ക്രോവാണ് ആ വർഷത്തെ മികച്ച നടനുള്ള ഓസ്കാർ നേടിയത്.

7.8/10 · IMDb
90% · Rotten Tomatoes

                       

Riγαs Ρυliκκαl