Flu » ᴀ ʀᴇᴛᴀʟɪᴀᴛᴇ
■ ദുരന്തങ്ങൾ നമ്മുടെ വാതിൽപ്പടിയിൽ എത്തുന്നതുവരെ നമ്മൾ സുരക്ഷിതരാണെന്ന് വിശ്വസിക്കുന്നവരാണ് മലയാളികൾ. ഒരു ഭൂകമ്പമോ സുനാമിയോ ഉരുൾപൊട്ടലോ പകർച്ച വ്യാധിയോ എവിടെയെങ്കിലും റിപ്പോർട്ട് ചെയ്യപ്പെട്ടാൽ അത് നമ്മളെ ബാധിക്കുന്ന കാര്യമല്ല എന്നങ്ങു ആശ്വാസം കണ്ടെത്തും. ഇത്രയും കാലം ഏറെക്കുറെ പല ദുരന്തങ്ങളിൽ നിന്നും നമ്മൾ മലയാളികൾ സുരക്ഷിതരായിരുന്നു എന്നത് യാഥാർഥ്യമാണ് താനും. ഇന്നിപ്പോൾ അതല്ല സ്ഥിതി. നിപ്പ വൈറസ് സൃഷ്ടിച്ച ഭീതിയുടെ മുൾമുനയിലാണ് നമ്മളിപ്പോൾ. പനി ഒരു രോഗമല്ല, ഒരു രോഗ ലക്ഷണമാണ് എന്ന് പലപ്പോഴായി ശാസ്ത്രം പറഞ്ഞതാണ്. നിപ്പ വിതച്ച പനി ഒരു മഹാവ്യാധിയായി മനുഷ്യരുടെ ജീവനെടുക്കാൻ തുടങ്ങിയിരിക്കുന്നു. ഡെങ്കിപ്പനിക്ക് മരുന്ന് കണ്ടുപിടിക്കുന്നതുവരെ അതൊരു മഹാവ്യാധിയായിരുന്നു, മരുന്ന് കണ്ടുപിടിച്ച ശേഷം അതും നിസാരമായി. നിപ്പയ്ക്ക് മറുമരുന്ന് കണ്ടുപിടിക്കുന്നത് വരെ അതൊരു മഹാവ്യാധി തന്നെയാണ്. ദൈനംദിനം ഭീതിപടർത്തിക്കൊണ്ടുള്ള നിപ്പ വൈറസിന്റെ വാർത്തകളാണ് കുറച്ചു മാസങ്ങൾക്കു മുൻപേ ഞാൻ കണ്ട ഈ കൊറിയൻ ചിത്രത്തെക്കുറിച്ചു എഴുതണം എന്ന് തോന്നിപ്പിച്ചത്. തീർച്ചയായും "ഫ്ലൂ" എന്ന ഈ കൊറിയൻ സിനിമയിൽ നിന്നും നിപ്പയ്‌ക്കെതിരെ ആരോഗ്യവകുപ്പിന് കൈക്കൊള്ളാൻ സാധിക്കുന്ന ഒരുപാട് റെഫെറൻസുകൾ ലഭിക്കും. മനുഷ്യർ വ്യത്യസ്ത ആരോഗ്യ ഘടനയുള്ളവരാണ്. ചിലരുടെ ശരീരത്തിൽ പല അപൂർവ രോഗങ്ങളെയും പ്രതിരോധിക്കുന്ന ആന്റിബോഡികൾ പ്രകൃതിയായി തന്നെ നൽകാറുണ്ട്. അതാണ് ചിലർക്ക് (പ്രതിരോധ കുത്തിവെപ്പ് എടുക്കാത്ത) ചിക്കൻ പോക്സ്, ചെങ്കണ്ണ് പോലോത്ത രോഗങ്ങൾ ഒരു വിധേനയും പകരാത്തത്. നിപ്പ വൈറസ് കാരണം ഒരു കുടുംബത്തിലെ മൂന്ന് പേർ മരിച്ചത് സമീപദിവസങ്ങളിലാണ്. പക്ഷേ അവരെ ശുശ്രൂഷിച്ച അവരുടെ രണ്ട് കുടുംബാംഗങ്ങൾക്ക് (തീർച്ചയില്ല) ഇതുവരെയും വൈറസ് ബാധ സ്ഥിരീകരിക്കപ്പെട്ടിട്ടില്ല എന്ന് കേട്ടു. അത് നേരാണെങ്കിൽ അവരുടെ ശരീരത്തിൽ നിപ്പ വൈറസിനെതിരായ ആന്റിബോഡി ഉണ്ടാവാനുള്ള സാധ്യത വളരെ കൂടുതലാണ്. അവരുടെ രക്തത്തിൽ നിന്നും നിപ്പയ്‌ക്കെതിരായ പ്രതിരോധ മരുന്നുകൾ ശാസ്ത്രീയമായി നിർമ്മിക്കാവുന്നതാണ്. സിനിമ കണ്ടുള്ള നിസാരമായ അറിവ് മാത്രമേ ഈയുള്ളവനുള്ളൂ. ശാസ്ത്രരംഗത്തെ അതികായന്മാർ തീരുമാനമെടുക്കട്ടെ.
ജാങ് ഹ്യുക്, സൂ ഏ, പാർക് മിൻഹ എന്നിവരെ കേന്ദ്രകഥാപാത്രങ്ങളാക്കി കിം സുങ് സു തിരക്കഥയെഴുതി സംവിധാനം നിർവഹിച്ച ഡിസാസ്റ്റർ ആക്ഷൻ ത്രില്ലർ കൊറിയൻ ചിത്രമാണ് "ഫ്ലൂ" (ഗാംഗി). ലീ മോ-ഗേ ഛായാഗ്രഹണവും നാം നാ-യോങ് എഡിറ്റിങ്ങും നിർവഹിച്ചിരിക്കുന്നു. കിം തേ-സ്യോങാണ് പശ്ചാത്തല സംഗീതം ഒരുക്കിയിരിക്കുന്നത്.
✍sʏɴᴏᴘsɪs
■ കൊറിയയിലേക്ക് നിയമവിരുദ്ധമായി മനുഷ്യരെ കടത്തുന്ന രണ്ടംഗ സംഘത്തിൽ നിന്നാണ് സിനിമയുടെ തുടക്കം. കുടിയേറ്റക്കാരിൽ ചിലർ അസ്വാഭാവികമായി ചുമയ്ക്കുന്നത് ശ്രദ്ധയിൽപ്പെട്ടിട്ടും മനുഷ്യക്കടത്തുകാർ അത് നിസാരമായി കണ്ടു അവരെ ഒരു കണ്ടെയ്നറിൽ കുത്തിനിറച്ചു കൊറിയയിലേക്ക് കയറ്റിക്കൊണ്ടു പോകുന്നു. ഒമ്പത് ദിവസത്തിനു ശേഷം കൊറിയയിലെ തുറമുഖ നഗരമായ പ്യോങ്തേക്കിൽ എത്തുന്ന കണ്ടെയ്‌നർ തുറക്കുന്ന മനുഷ്യക്കടത്തു സംഘം ആ ഭയാനകമായ കാഴ്ച്ച കണ്ടു ഞെട്ടുന്നു. കുടിയേറ്റക്കാർ മുഴുവൻ അജ്ഞാതമായ ഏതോ രോഗം ബാധിച്ചു മരിച്ചു കിടക്കുന്നു. സഹോദരങ്ങളായ മനുഷ്യക്കടത്ത് സംഘത്തിലെ ഇളയ സഹോദരൻ ഈ വിവരം അവരുടെ ബോസിനെ അറിയിക്കാൻ മൊബൈലിൽ പകർത്തുന്നതിനിടെ ദുരന്തത്തെ അത്ഭുതകരമാംവിധം അതിജീവിച്ച ഒരു വ്യക്തി സഹായത്തിനായി തന്റെ കരമുയർത്തുന്നു. ഞെട്ടിത്തരിച്ചു പോകുന്ന അവന്റെ കൈയ്യിൽ നിന്നും മൊബൈൽ ഫോൺ രക്തത്തിൽ കുളിച്ചുകിടക്കുന്ന കബന്ധങ്ങളിലേക്ക് വീഴുന്നു. ദുരന്തത്തെ അതിജീവിച്ച യുവാവിനെയും കൊണ്ട് നഗരത്തിലെത്തുന്ന അവരുടെ പക്കൽ നിന്നും ആ യുവാവ് രക്ഷപ്പെടുന്നു. അക്കാലത്ത് "പക്ഷിപ്പനി" എന്നറിയപ്പെട്ട H5N1 എന്ന പകർച്ചപ്പനിയുടെ വിളയാട്ടം തുടങ്ങുകയായിരുന്നു ആ കൊറിയൻ നഗരത്തിൽ..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ കിം ഇൻ-ഹേ എന്ന സിംഗിൾ പേരന്റ് അമ്മയായ യുവഡോക്ടറായി സൂ ഏ നല്ല അഭിനയപ്രകടനമാണ് കാഴ്ച്ചവെച്ചത്. കിം ഇൻ-ഹേയോട് പ്രണയം തോന്നുന്ന ബുദാങ് എമർജൻസി റെസ്പോൺസ് ടീമിലെ അംഗം കാം ജി-ഗൂയുടെ വേഷം ജാങ് ഹ്യുക് ഉജ്ജ്വലമാക്കി. പക്ഷേ, ഞെട്ടിക്കുന്ന പ്രകടനം നടത്തിയത് ഇവരൊന്നുമായിരുന്നില്ല, കിം ഇൻ-ഹേയുടെ മകളായ കിം മി-രൂവിന്റെ വേഷത്തിലെത്തിയ പാർക് മിൻ-ഹ എന്ന ആറു വയസ്സുകാരിയായിരുന്നു അമ്പരപ്പിക്കുന്ന പ്രകടനവുമായി വിസ്മയിപ്പിച്ചത് (ഇപ്പോൾ പത്ത് വയസ്സ്). ലെസ്റ്റർ അവാൻ ആൻഡ്രാഡ (മോൻസായ്), യൂ ഹേ-ജിൻ (ബേ ക്യുങ്-ഉബ്‌), മാ ഡോങ്-സ്യോക് (ജ്യോൻ ഗൂക്-ഹ്വാൻ), ലീ ഹീ-ജൂൻ (ജു ബ്യുങ്-കി), കിം കി-ഹ്യോൻ (ദക്ഷിണകൊറിയൻ പ്രധാനമന്ത്രി), ചാ ഇൻ-പ്യോ (ദക്ഷിണകൊറിയൻ പ്രസിഡന്റ്), ലീ സാങ്-യോബ് (ജു ബ്യുങ്-വൂ), പാർക് ഹ്യോ-ജൂ (ടീച്ചർ ജുങ്), പാർക് ജുങ്-മിൻ (ചുൽ-ഗ്യോ), ബോറിസ് സ്റ്റൗട്ട് (ലിയോ സ്‌നൈഡർ) തുടങ്ങിയവരാണ് മറ്റു പ്രധാന അഭിനേതാക്കൾ.
📎 ʙᴀᴄᴋwᴀsʜ
■ "ഫ്ലൂ"യിലെ വിസ്മയ പ്രകടനത്തിലൂടെ മികച്ച സഹനടിക്കുള്ള ഗ്രാൻഡ് ബെൽ പുരസ്‌കാരത്തിന് തൊട്ടടുത്തെത്തിയിരുന്നു (നോമിനേഷൻ) പാർക് മിൻ-ഹ എന്ന ആറു വയസ്സുകാരി. IMDb, Rotten Tomatoes റേറ്റിങ്ങുകളെടുത്ത് കിണറ്റിലിടാൻ തോന്നിയ നിമിഷം..
(അഭിപ്രായം വ്യക്തിപരം).
6.8/10 · IMDb
45% · Rotten Tomatoes
8.5/10 · MyDramaList
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ