Orphan » ᴀ ʀᴇᴛᴀʟɪᴀᴛᴇ
■ ചെറുപ്പക്കാരുടെ പ്രധാന പ്രശ്നം നാട്ടുകാരായ "തെണ്ടികൾ" എയ്തുവിടുന്ന ചോദ്യശരങ്ങളാണ്. പഠിത്തം കഴിഞ്ഞാൽ ജോലി ഇതുവരെ ആയില്ലേ എന്ന ചോദ്യം വരും. ജോലി കിട്ടിയാൽ അടുത്ത ചോദ്യം പിന്നെ ഇതാകും "കല്യാണമൊന്നുമായില്ലേ." കല്ല്യാണം കഴിച്ചു കുറച്ചുനാൾ കഴിഞ്ഞാൽ "വിശേഷമൊന്നുമായില്ലേ" എന്നാകും ചോദ്യം. ഏതൊരു ദമ്പതികളുടെയും ജീവിതാഭിലാഷങ്ങളിൽ ഒന്നാണല്ലോ ഒരു കുഞ്ഞിക്കാൽ കാണുക എന്നത്. അതിന് താമസം വരുമ്പോഴുള്ള ഇജ്ജാതി ചോദ്യം പലരെയും മാനസികമായി തളർത്തും എന്നത് ഈ ചോദിക്കുന്ന പോയൻമാർക്ക് തിരിയണ്ടേ. കുട്ടികളിതുവരെ ആകാത്തത് കൊണ്ട് കല്യാണവീടുകളിൽ പോകാൻ പോലും വിസമ്മതിച്ചു ഉൾവലിഞ്ഞുകഴിയുന്ന പലരെയും എനിക്ക് വ്യക്തിപരമായി അറിയാം. പ്രശ്നം നിങ്ങൾക്കോ മറ്റേ ആളിനോ എന്ന് പരസ്യമായി ചോദിച്ചു കളയും ഈ ഊളന്മാർ. ഒരു കുഞ്ഞുണ്ടാകുക എന്ന സ്വപ്നം സഫലമാകാതെ വരുമ്പോൾ പലരുടെയും അവസാനത്തെ ആശ്രയമായിരിക്കും ഒരു കുഞ്ഞിനെ വല്ല അനാഥാലയങ്ങളിൽ നിന്നും ദത്തെടുക്കുക എന്നത്. ഒരു കുഞ്ഞിനെ ഓമനിക്കാനുള്ള കൊതി അത് കിട്ടാക്കനിയായവരോട് ചോദിച്ചാൽ മാത്രമേ അറിയൂ. അല്ലെങ്കിൽ അത് അനുഭവിച്ചു തന്നെ അറിയണം. പാശ്ചാത്യ നാടുകളിൽ പല സെലിബ്രിറ്റികളും ആഫ്രിക്കയിൽ നിന്നും മറ്റു ദരിദ്രരാജ്യങ്ങളിൽ നിന്നുമൊക്കെ കുട്ടികളെ ദത്തെടുത്ത് സംരക്ഷിക്കാറുണ്ട്. ഇതൊരു അനാഥയുടെ കഥയാണ്. ഓമനത്തം തുളുമ്പുന്ന മുഖവും പുഞ്ചിരിയുമായി കടന്നു വന്ന് പ്രേക്ഷകരെ ആകാംക്ഷയുടെ മുൾമുനയിൽ കൊണ്ട് നിർത്തിയ ഒരു ഒമ്പതുവയസ്സുകാരി അനാഥ ബാലികയുടെ കഥ.
■ ജോമി കൊലേറ്റ്സെറ സംവിധാനം നിർവഹിച്ച സൈക്കോളജിക്കൽ ഹൊറർ ത്രില്ലർ ഹോളിവുഡ് ചിത്രമാണ് ഓർഫൻ. അലക്സ്‌ മാസിയുടെ കഥ തിരക്കഥയാക്കിയിരിക്കുന്നത് ഡേവിഡ് ലെസ്ലി ജോൺസണാണ്. ജെഫ് കട്ടർ ഛായാഗ്രഹണവും തിമോത്തി അൽവേഴ്സൺ എഡിറ്റിങ്ങും നിർവഹിച്ചിരിക്കുന്നു. ഉദ്വേഗം തുളുമ്പുന്ന പശ്ചാത്തല സംഗീതമൊരുക്കി ജോൺ ഒട്ട്മാനും ചിത്രത്തിന് നിറഞ്ഞ പിന്തുണയാണ് നൽകിയിരിക്കുന്നത്.
✍sʏɴᴏᴘsɪs
■ തങ്ങളുടെ പന്ത്രണ്ടുവയസ്സുകാരൻ മകനും അഞ്ചുവയസ്സുകാരി മകൾക്കുമൊപ്പം സന്തുഷ്ടകുടുംബജീവിതം നയിക്കുകയായിരുന്നു കെയ്റ്റ്-ജോൺ കോൾമാൻ ദമ്പതികൾ. അവരുടെ മൂന്നാമത്തെ കുട്ടി എന്ന സ്വപ്നം ഗർഭത്തിലേ അലസിപ്പോയതുകാരണം കെയ്റ്റ് വിഷാദരോഗത്തിലേക്കും മദ്യാസക്തിയിലേക്കും വീഴുന്നു. ഇവയിൽ നിന്നും കെയ്റ്റിനെ മോചിപ്പിക്കാനായിരുന്നു ജോൺ, ഒരു പെൺകുട്ടിയെ ദത്തെടുക്കുക എന്ന തീരുമാനത്തിലെത്തുന്നത്. ഒരു അനാഥാലയത്തിൽ വെച്ച് നിറഞ്ഞപുഞ്ചിരിയുമായി എസ്തർ എന്ന ഒമ്പതുവയസ്സുകാരി റഷ്യൻ പെൺകുട്ടി ഇരുവരുടെയും മനംകവരുന്നു. അവരുടെ ബധിരയും മൂകയുമായ മകൾ മാക്സുമായി എളുപ്പത്തിൽ ചങ്ങാത്തത്തിലാവുന്ന എസ്തറിനെ പക്ഷേ മകൻ ഡാനിയേലിന് അത്രയ്ക്ക് പിടിക്കുന്നില്ല. കെയ്റ്റുമായി ഒരു അമ്മ-മകൾ ബന്ധം ഉണ്ടാക്കാൻ എസ്തറിന് വളരെ എളുപ്പത്തിൽ സാധിക്കുന്നു. എല്ലാവരുടെയും ഹൃദയം കവർന്ന് എസ്തർ അവരുടെ കൂടെ വളരുന്നു. പക്ഷേ, പിന്നീട് എസ്തറിന്റെ പെരുമാറ്റത്തിൽ കെയ്റ്റ് സംശയാലുവാകുന്നു. എസ്തറിന്റെ പുഞ്ചിരിയിലൊളിപ്പിച്ചു വെച്ചിരിക്കുന്ന നിഗൂഢതയെന്താണ്..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ഒമ്പതുവയസ്സുകാരിയായ എസ്തറായി പ്രേക്ഷകരെയും ഒപ്പം നിരൂപകരെയും ഒരുപോലെ ഞെട്ടിക്കുകയായിരുന്നു തന്റെ പന്ത്രണ്ടാം വയസ്സിൽ ഇസബെലി ഫുർമാൻ. ലോകപ്രശസ്ത ഹൊറർ ത്രില്ലറുകളായ ദി എക്‌സോർസിസ്റ്റിലെ ലിൻഡ ബ്ലയറുമായും ദി ബാഡ് സീഡിലെ പാറ്റി മക്കോർമാകുമായുമാണ് ഇസബെല്ലിയെ അവർ താരതമ്യപ്പെടുത്തിയത്. കൊഞ്ചുറിങ് സീരീസിലൂടെ പ്രേക്ഷകഹൃദയങ്ങളിൽ സ്ഥിരപ്രതിഷ്ഠനേടിയ വേര ഫെർമികയാണ്‌ കെയ്റ്റ് കോൾമാന്റെ വേഷത്തിലെത്തിയിരിക്കുന്നത്. പീറ്റർ സർഗാർഡ് (ജോൺ കോൾമാൻ), C.C.H.പൗണ്ടർ (സിസ്റ്റർ അബിഗെയ്ൽ), ജിമ്മി ബെന്നെറ്റ് (ഡാനിയേൽ കോൾമാൻ), ആര്യാന എഞ്ചിനീയർ (മാക്സ് കോൾമാൻ), റോസ്മേരി ഡൻസ്‌മോർ (ബാർബറ കോൾമാൻ), മാർഗോ മാർട്ടീൻഡെയ്ൽ (ഡോ. ബ്രൗണിങ്), കാരൾ റോഡാൻ (ഡോ. വരാവ), ജനീല വില്യംസ് (സിസ്റ്റർ ജൂഡിത്ത്), ലോറി അയേഴ്‌സ് (ജോയ്‌സ്), ബ്രെണ്ടൻ വാൾ (ഡിറ്റക്റ്റീവ്), ജാമി യങ് (ബ്രെണ്ട), ലണ്ടൻ നോറിസ് (ഓസ്റ്റിൻ), മുസ്തഫ അബ്ദിൽകരീം (ട്രെവർ) തുടങ്ങിയവരാണ് മറ്റു പ്രധാന അഭിനേതാക്കൾ..
📎 ʙᴀᴄᴋwᴀsʜ
■ കുട്ടികളെ ദത്ത് നൽകുന്ന സംഘടനകളുടെയും ദത്തെടുത്ത രക്ഷിതാക്കളുടെയും പ്രതിഷേധം കാരണം നിർമാതാക്കളായ വാർണർ ബ്രോസിന് ചിത്രത്തിൻറെ ടാഗ്‌ലൈനായ "It must be hard to love an adopted child as much as your own" എന്നത് മാറ്റി "I don't think Mommy likes me very much" എന്നാക്കേണ്ടി വന്നിരുന്നു. നിർമ്മാതാക്കളിൽ ഒരാൾ വിശ്വപ്രസിദ്ധ നടൻ ലിയനാർഡോ ഡികാപ്രിയോ ആയിരുന്നു എന്നതും ഈ ചിത്രം ശ്രദ്ധിക്കപ്പെടാൻ കാരണമായി. ബധിരയും മൂകയുമായ മാക്സ് ആയി അഭിനയിച്ച ആര്യാന എഞ്ചിനീയർ യഥാർത്ഥ ജീവിതത്തിലും ബധിര തന്നെയായിരുന്നു. ചിത്രത്തിൽ ഒരു പിയാനോ ടീച്ചർ കൂടിയായ കെയ്റ്റിനെ അവതരിപ്പിച്ച വേര ശരിക്കുമൊരു പിയാനോ വിദഗ്ദയാണ്.
7/10 . IMDb
55% . Rotten Tomatoes
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ