The Color Of Paradise » ᴀ ʀᴇᴛᴀʟɪᴀᴛᴇ
■ ഹൃദയം കൊണ്ട് സിനിമ പിടിക്കുന്നൊരു സംവിധായകനാണ് മാജിദ് മജീദി. അദ്ദേഹത്തിന്റെ സിനിമകളിൽ അത്രത്തോളം ജീവിതമുണ്ട്, ജീവിത യാഥാർഥ്യങ്ങളുണ്ട്, നനവുള്ള കണ്ണീരുണ്ട്. ദൈവത്തെ കണ്ടവരുണ്ടോ? കനിവാർന്ന മനുഷ്യമുഖമായി ഒരു തവണയെങ്കിലും ദൈവത്തെ കാണാത്ത ആരെങ്കിലുമുണ്ടോ. കേരളം പ്രളയജലത്തിൽ മുങ്ങിത്താഴ്ന്നപ്പോൾ രക്ഷാകരങ്ങളായി വന്ന മുക്കുവരുടെ മുഖങ്ങളിൽ ദൈവത്തെ കണ്ട എത്രയോ മലയാളികളുണ്ട്. വിശക്കുന്നവന്റെ മുൻപിൽ ഭക്ഷണമാണ് ദൈവമെന്ന് ഗാന്ധിജി പറഞ്ഞിരിക്കുന്നു. ലോകത്തിന്റെ വർണ്ണങ്ങളൊന്നുപോലുമറിയാൻ ഭാഗ്യമില്ലാത്ത അന്ധർക്ക് കാഴ്ച്ചയല്ലേ ദൈവം. കാഴ്ച്ചയുള്ളവർ അന്ധരായി അഭിനയിച്ച ഒരുപാട് സിനിമകൾ നമ്മൾ കണ്ടിരിക്കുന്നു. പക്ഷേ, ഒരു യഥാർത്ഥ അന്ധബാലനായ മുഹ്സിൻ റംസാനിയെക്കൊണ്ട് വിസ്മയം തീർത്തിരിക്കുകയാണ് മാജിദ് മജീദി ഇവിടെ.
■ മാജിദ് മജീദി തിരക്കഥയെഴുതി സംവിധാനം നിർവഹിച്ച ഫാമിലി ഡ്രാമാ പേർഷ്യൻ ചിത്രമാണ് ദി കളർ ഓഫ് പാരഡൈസ്. മുഹമ്മദ് ദാവൂദി ഛായാഗ്രഹണവും ഹസ്സൻ ഹസ്സൻദൂസ്ത് എഡിറ്റിങ്ങും നിർവഹിച്ചിരിക്കുന്നു. അലിറേസ കോഹൻഡെയ്റിയാണ് പശ്ചാത്തല സംഗീതമൊരുക്കിയിരിക്കുന്നത്.
✍sʏɴᴏᴘsɪs
■ ടെഹ്റാനിലെ ഒരു അന്ധവിദ്യാലത്തിൽ കുട്ടികൾക്ക് മൂന്നുമാസത്തെ അവധിക്കാലം ആരംഭിക്കുകയാണ്. കുട്ടികളെ വീട്ടിലേക്ക് കൂട്ടിക്കൊണ്ടുപോകാൻ അവരുടെ മാതാപിതാക്കൾ വന്നുകൊണ്ടിരിക്കുന്നു. അങ്ങനെ ഒരു കുട്ടിയൊഴികെ എല്ലാവരെയും അവരുടെ മാതാപിതാക്കൾ കൂട്ടിക്കൊണ്ടുപോയി. മുഹമ്മദിന്റെ രക്ഷിതാവ് ഇതുവരെയും വന്നില്ല. അവന്റെ അദ്യാപകൻ അവനെ സമാധാനിപ്പിച്ചുകൊണ്ടിരുന്നു. അങ്ങനെ ഏറ്റവുമൊടുവിൽ അവന്റെ പിതാവ് ഹാഷിം അവിടെ വന്നു. പക്ഷേ, അയാൾക്ക്‌ അവനെ കൂട്ടാൻ ആഗ്രഹമില്ലായിരുന്നു. എങ്ങനെയെങ്കിലും മുഹമ്മദിന്റെ സംരക്ഷണം കുറച്ച് കാലത്തേക്ക് കൂടി ഏറ്റെടുക്കാമോ എന്നയാൾ അധികൃതരോട് കെഞ്ചി. ഇതൊരു വിദ്യാലയമാണ്, അനാഥാലയമല്ല എന്ന് അദ്യാപകർ മറുപടി പറഞ്ഞു. അങ്ങനെ മനസ്സില്ലാ മനസ്സോടെ അയാൾ മുഹമ്മദിനെ ഗ്രാമത്തിലെ തന്റെ വീട്ടിലേക്ക് കൂട്ടിക്കൊണ്ടുപോവുകയാണ്. അവിടെ മുഹമ്മദിനെ ഏറ്റവും കൂടുതൽ സ്നേഹിക്കുന്നൊരു മുത്തശ്ശിയുണ്ട്. രണ്ട് സഹോദരിമാരുണ്ട്, ബഹാരേയും ഹനിയേയും. അവന്റെ മാതാവ് നേരത്തെ മരിച്ചുപോയിരുന്നു. ഒരു കൽക്കരിപ്പാടത്തെ ജോലിക്കാരനായ ഹാഷിമിന് ഇനിയൊരു വിവാഹംകൂടി കഴിക്കണമെന്നാണ് ആഗ്രഹം. അതിന് അന്ധനായ മുഹമ്മദിനെ അയാൾക്ക്‌ എങ്ങനെയെങ്കിലും ഒഴിവാക്കിയേ തീരൂ..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ യഥാർത്ഥ ജീവിതത്തിലും പൂർണ്ണമായി അന്ധനായ മുഹ്സിൻ റംസാനിയാണ് മുഹമ്മദ് എന്ന അന്ധബാലനായി വിസ്മയിപ്പിച്ചിരിക്കുന്നത്. ഹുസെയ്ൻ മഹ്‌ജൂബ് മുഹമ്മദിന്റെ കണിശക്കാരനായ പിതാവ് ഹാഷിമിന്റെ വേഷം മനോഹരമായി അവതരിപ്പിച്ചിരിക്കുന്നു. സാലിമേ ഫെയ്സി (മുത്തശ്ശി), എൽഹാം ഷെറിം (ഹനിയ), ഫറഹ്നാസ് സഫാരി (ബഹാരേ), മുഹമ്മദ് റഹ്‌മാനി (അന്ധവിദ്യാലയത്തിലെ അദ്യാപകൻ), സഹ്‌റ മിസാനി (അന്ധവിദ്യാലയത്തിലെ അദ്യാപിക), കമാൽ മീർകരീമി (അന്ധവിദ്യാലത്തിലെ പ്രിൻസിപ്പാൾ), മുർതാസ ഫത്തേമി (അന്ധനായ ആശാരി), മസൂമേ സീനാതി (പ്രതിശ്രുത വധു), അഹ്മദ് അമീന്യൻ (വധുവിന്റെ പിതാവ്), മുഖദ്ദം ബെഹ്‌ബെഹാനി (ഗ്രാമത്തിലെ സ്കൂൾ പ്രിൻസിപ്പാൾ), ബെഹ്‌സാദ്‌ റഫി (ഗ്രാമത്തിലെ സ്കൂൾ അദ്യാപകൻ) തുടങ്ങിയവരാണ് മറ്റുപ്രധാന അഭിനേതാക്കൾ.
📎 ʙᴀᴄᴋwᴀsʜ
■ ചിൽഡ്രൻ ഓഫ് ഹെവൻറെ ചിത്രീകരണത്തിനിടവേളയിൽ സംവിധായകൻ മാജിദ് മജീദി ടെഹ്റാനിലെ ഒരു അന്ധവിദ്യാലയം സന്ദർശിക്കുകയുണ്ടായി. ഒരു അന്ധബാലനെ അവന്റെ പിതാവ് തിരസ്കരിക്കാൻ ശ്രമിച്ച അനുഭവം അവിടത്തെ ഒരു അദ്യാപകൻ മാജിദ് മജീദിയുമായി പങ്കുവെച്ചു. അതാണ്‌ മാജിദ് മജീദിയെ കളർ ഓഫ് പാരഡൈസിലേക്ക് നയിച്ചത്. കളർ ഓഫ് പാരഡൈസിൽ മുഹമ്മദ് തന്റെ അന്ധനായ മരപ്പണിയാശാനോട് ഹൃദയത്തിൽ തട്ടുന്ന ഒരു ഡയലോഗ് പറയുന്നുണ്ട് : "ഒരിക്കൽ എന്റെ ടീച്ചർ ഞങ്ങളോട് പറഞ്ഞു, സാധാരണ മനുഷ്യരേക്കാൾ ദൈവം നിങ്ങളെ സ്നേഹിക്കുന്നു, കാരണം നിങ്ങൾ അന്ധരായതുകൊണ്ട്. പക്ഷേ ഞാൻ പറഞ്ഞു, ദൈവം ഞങ്ങളെ സ്നേഹിക്കുന്നുവെങ്കിൽ ദൈവത്തെ കാണാൻ ഞങ്ങൾക്ക് കണ്ണുകൾ നൽകുമായിരുന്നില്ലേ.." ഈ വാചകം മുഹമ്മദിനെ അവതരിപ്പിച്ച മുഹ്സിൻ റംസാനിയുടെ സ്വന്തം വാക്കുകൾ തന്നെയായിരുന്നു. ഇറാന്റെ അന്നത്തെ പ്രസിഡന്റ് മുഹമ്മദ് ഖതാമി കളർ ഓഫ് പാരഡൈസിലെ മുഹ്സിൻ റംസാനിയുടെ പ്രകടനം കണ്ടിട്ട് ടെഹ്റാനിൽ അവനൊരു വീട് വെച്ചുകൊടുത്തിരുന്നു. ദി കളർ ഓഫ് പാരഡൈസ് ഒരുപാട് ഫിലിം ഫെസ്റ്റിവലുകളിൽ പുരസ്കാരങ്ങൾ വാരിക്കൂട്ടിയിരുന്നു..
8.2/10 . IMDb
87% . Rotten Tomatoes
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ