Tumbbad » ᴀ ʀᴇᴛᴀʟɪᴀᴛᴇ
■ ഒറ്റവാക്കിൽ പറഞ്ഞാൽ 'ഇന്ത്യൻ സിനിമയുടെ അഭിമാനം'. പ്രമേയം പലതവണ പാടിപ്പതിഞ്ഞതാണെങ്കിലും മെയ്ക്കിങ്ങിലെ സൗന്ദര്യമാണ് തുമ്പാടിനെ വ്യത്യസ്തമാക്കുന്നത്. വിലക്കപ്പെട്ട കനി മോഹിച്ച ഹവ്വ മുതൽ തുടങ്ങുന്നു മനുഷ്യന്റെ അത്യാഗ്രഹത്തിന്റെ കഥകൾ. ആബേലിന്റെ സുന്ദരിയായ ഭാര്യ, അക്ലിമയെ മോഹിച്ചു സ്വന്തം സഹോദരനെ കൊലപ്പെടുത്തി മനുഷ്യവംശത്തിലെ ആദ്യത്തെ കൊലയാളിയാവാൻ വിധിക്കപ്പെട്ട കായേനിന്റെ കഥയും അത്യാഗ്രഹത്തിന്റേത് തന്നെയായിരുന്നു. ബൈബിളിലും ഖുർആനിലും പുരാണങ്ങളിലും മനുഷ്യന്റെ അത്യാഗ്രഹത്തിന്റെ കഥകൾ ഏറ്റവും കൂടുതൽ തവണ പ്രതിപാദിക്കപ്പെട്ടു. അമർചിത്രകഥകളിലും ഈസോപ്പ് കഥകളിലുമെല്ലാം ഗുണപാഠകഥകളായി അത്യാഗ്രഹത്തിന്റെ കഥകൾ പ്രമേയങ്ങളായി. എത്ര മനോഹരമായിട്ടാണ് ഒരു സാങ്കൽപ്പിക കഥയെ ഐതീഹ്യവും ചരിത്രവുമായി ഒരുപോലെ ബന്ധിപ്പിക്കാൻ സംവിധായകർക്ക് സാധിച്ചിരിക്കുന്നത്, അതും ഇതേ അത്യാഗ്രഹത്തിന്റെ കഥ പറഞ്ഞ്.
■ ആര്യൻ കട്ടാരിയ, ആനന്ദ് ഗാന്ധി, ആദേശ് പ്രസാദ് എന്നിവർ സംവിധാനം നിർവഹിച്ച ഹിസ്റ്റോറിക്കൽ പീരിയഡ് ഫാന്റസി ഹൊറർ ത്രില്ലർ ബോളിവുഡ് ചിത്രമാണ് തുമ്പാട്. മിതേഷ്‌ ഷാ, ആദേശ് പ്രസാദ്, റാഹി അനിൽ ബർവെ, ആനന്ദ് ഗാന്ധി എന്നിവരാണ് തിരക്കഥ എഴുതിയിരിക്കുന്നത്. പങ്കജ് കുമാർ ഛായാഗ്രഹണവും സൻയുക്ത കാസ എഡിറ്റിങ്ങും നിർവഹിച്ചിരിക്കുന്നു. അജയ് അതുൽ, ജെസ്‌പർ കെയ്ദ് എന്നിവരാണ് പശ്ചാത്തല സംഗീതം ഒരുക്കിയിരിക്കുന്നത്.
✍sʏɴᴏᴘsɪs
■ സ്വാതന്ത്ര്യാനന്തര ഭാരതത്തിന്റെ പശ്ചാത്തലത്തിൽ വിനായക് റാവു എന്ന സമ്പന്നൻ തന്റെ പതിനാല് വയസ്സുകാരനായ മകൻ പണ്ഡുരങ്ങിനോട് ധനത്തിന്റെയും സമ്പൽസമൃദ്ധിയുടെയും ദേവതയുടെ കഥ പറഞ്ഞു തുടങ്ങുന്നു, ഒപ്പം തന്റെയും. വിനായക് പറഞ്ഞ ഐതീഹ്യ പ്രകാരം ലോകം സൃഷ്ടിച്ച സമ്പത്തിന്റെ ദേവത 160 ദശലക്ഷം ദൈവങ്ങൾക്ക് ജന്മം നൽകി. ആദ്യ സന്തതിയായ ഹസ്തറിനോട് അവർക്ക് പ്രത്യേക സ്നേഹമുണ്ടായിരുന്നു. പക്ഷേ, ഹസ്തറാകട്ടെ അത്യാഗ്രഹിയും ഭക്ഷണത്തിനോട് അമിതാസക്തിയുള്ളവനുമായിരുന്നു. മറ്റു ദേവകളുടെ സമ്പത്തും ഭക്ഷണവും കൈക്കലാക്കാൻ അവൻ ശ്രമിച്ചു. സഹികെട്ട ദേവകൾ ഒന്നടങ്കം ഹസ്തറിനു നേരെ തിരിഞ്ഞു. പക്ഷേ സമ്പത്സമൃദ്ധിയുടെ ദേവത ഹസ്തറിനെ സംരക്ഷിച്ചു, ചില നിബന്ധന പ്രകാരം. ഹസ്തറിനെ മറ്റു ദേവകളെപ്പോലെ ആരും ആരാധിക്കാൻ പാടില്ല, ഹസ്തറിന്റെ പേര് തന്നെ ചരിത്രത്തിന്റെ താളുകളിൽ നിന്നും നീക്കപ്പെടണം, എങ്കിൽ ഹസ്തറിന് ഭൂമീദേവിയുടെ ഗർഭപാത്രത്തിൽ ശിഷ്ടകാലം ഉറങ്ങാം. പക്ഷേ കാലം ഒരുപാട് കടന്നു പോയപ്പോൾ ഹസ്തറിനെ ആരാധിക്കാനും മന്ദിരങ്ങൾ ഉയർന്നു വന്നു, തുമ്പാടിൽ. ഇത് ഹസ്തറിനെ ഉണർത്തി. അതുകൊണ്ട് തന്നെ സമൃദ്ധിയുടെ ദേവത നിലയ്ക്കാത്ത മഴ കൊണ്ട് തുമ്പാടിനെ ശപിച്ചു. സ്വാതന്ത്ര്യത്തിന് മുൻപുള്ള (1918) ഇന്ത്യ പശ്ചാത്തലമായി വരുന്നു. തുമ്പാടിലെ പ്രഭു സർക്കാരിന്റെ വീട്ടിലെ ജോലിക്കാരിയാണ് വിനായകിന്റെയും സദാശിവന്റേയും അമ്മ. സർക്കാരിന്റെ വീട്ടിൽ പ്രതിഷ്ഠിച്ചിട്ടുള്ള ഹസ്തറിന്റെ പ്രതിമയിലുള്ള സ്വർണ്ണ നാണയം എന്നെങ്കിലും സർക്കാർ തനിക്ക് സമ്മാനിക്കുമെന്ന വിശ്വാസത്തിലാണ് അവരവിടെ വർഷങ്ങളോളം ജാരയായി ജോലി ചെയ്തത്. പക്ഷേ വൃദ്ധനായ സർക്കാരിന്റെ മരണം അവരെ കുട്ടികളെയും കൂട്ടി നാടുവിടാനുള്ള തീരുമാനത്തിലെത്തിക്കുന്നു. പക്ഷേ, വിനായകിന്റെ കണ്ണ് അപ്പോഴും ഹസ്തറിന്റെ പക്കലുണ്ടെന്ന് വിശ്വസിക്കപ്പെടുന്ന അമൂല്യമായ നിധിയിലായിരുന്നു..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ സോഹും ഷായാണ് വിനായകെന്ന നായക കഥാപാത്രമായി തകർത്താടിയിരിക്കുന്നത്. ദുന്ദിരാജ് പ്രഭാകർ ജോഗ്ലേകർ വിനായകിന്റെ ബാല്യകാലം അവതരിപ്പിച്ചിരിക്കുന്നു. രുദ്ര സോനി വിനായകിന്റെ സഹോദരൻ സദാശിവന്റെ വേഷം അഭിനയിച്ചിരിക്കുന്നു. വിനായകിന്റെ അമ്മയായി വേഷമിട്ടിരിക്കുന്നത് ജ്യോതി മാൽഷേയാണ്. അനിത ഡാടെ (വിനായകിന്റെ ഭാര്യ), രഞ്ജിനി ചക്രബർത്തി (വിനായകിന്റെ ജാര), ദീപക് ഡാംലെ (രാഘവ്), കാമെറോൺ ആൻഡേഴ്സൺ (സെർജെന്റ് കൂപ്പർ), മാധവ് ഹരി ജോഷി (സർക്കാർ), മുഹമ്മദ് സമദ് (പാണ്ഡുരാജ്/മുത്തശ്ശി), ഹരീഷ് ഖന്ന (രാജ) തുടങ്ങിയവരാണ് പ്രധാന അഭിനേതാക്കൾ..
📎 ʙᴀᴄᴋwᴀsʜ
■ കാറ്റലോണിയൻ ഫിലിം ഫെസ്റ്റിവലിൽ പങ്കജ് കുമാറിന് മികച്ച ഛായാഗ്രാഹകനുള്ള പുരസ്കാരം നേടിക്കൊടുത്തിരുന്നു തുമ്പാട്. ഈ സിനിമ ചിത്രീകരിക്കാൻ അഞ്ച് വർഷത്തോളമെടുത്തു, തുമ്പാടിലെ തോരാത്ത മഴ ഒറിജിനാലിറ്റിയോടെ ചിത്രീകരിക്കാൻ നാല് മഴക്കാലം ഉപയോഗിക്കേണ്ടി വന്നു. സോഹും ഷായെ തന്നെ നായകനാക്കി തുമ്പാടിനൊരു രണ്ടാം ഭാഗം ഇറങ്ങിയേക്കും. തുമ്പാട് എന്ന സ്ഥലം യഥാർത്ഥത്തിൽ മഹാരാഷ്ട്രയിൽ സത്താറയ്ക്കും പൂനയ്ക്കും അടുത്തായുണ്ട്. ഇനിയാരും 'തൂമ്പായും' കൊണ്ട് അങ്ങോട്ട്‌ ചെല്ലണ്ട..!!
8.7/10 . IMDb
89% . Rotten Tomatoes
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ