Wild Tales » ᴀ ʀᴇᴛᴀʟɪᴀᴛᴇ
■ പേര് കേട്ടാൽ വന്യമൃഗങ്ങളുടെ കഥയാണെന്ന് തോന്നിയേക്കാം, അല്ലെങ്കിൽ കാട്ടിലകപ്പെട്ട മനുഷ്യൻ. ഓപ്പണിങ് ക്രെഡിറ്റ്സ് ഏറെക്കുറെ നമ്മുടെ മുൻധാരണകളെ ശരിവെക്കുന്നതായിരിക്കും. പക്ഷേ, പിന്നീടങ്ങോട്ട് വൈൽഡ് ടെയ്ൽസ് പറയുന്നത് മനുഷ്യരുടെയുള്ളിലെ "മൃഗീയതയുടെ" കഥയാണ്, മനുഷ്യമനസ്സുകളിൽ കെട്ടിയിട്ട ക്രൂരമൃഗം നിമിഷാർദ്ധത്തിൽ കെട്ടുപൊട്ടിച്ചു പുറത്തു ചാടുകയാണ്. അപ്പോൾ അവന്റെയുള്ളിൽ പകയുടെ, ക്രൂരതയുടെ കനൽ മാത്രം. ആ ക്രോദ്ധാഗ്നി തീ വിറകിനെ തിന്നുന്നപോലെ മനുഷ്യ ജീവനുകൾ ഭസ്മമാക്കിക്കളയുകയാണ്. ശരിക്കും മൃഗീയത എന്ന ഒന്നുണ്ടോ എന്നത് തന്നെ സംശയമാണ്, കാരണം മൃഗങ്ങൾ അവയ്ക്കുള്ള ഭക്ഷണത്തിന് വേണ്ടി മാത്രമേ മറ്റുള്ളവയെ ആക്രമിക്കാറുള്ളൂ, അല്ലെങ്കിൽ സ്വയരക്ഷയ്ക്ക് വേണ്ടി. പക്ഷേ, മനുഷ്യർ മൃഗങ്ങളെക്കാൾ ക്രൂരന്മാരാണെന്നു കാലംതെളിയിച്ചുകൊണ്ടിരിക്കുകയാണ്. അവർ ചിലപ്പോൾ എന്തിന് വേണ്ടി എന്നല്ലാതെ പരസ്പരം കൊന്ന് തീർക്കും. നിസ്സാരകാര്യങ്ങൾ വരെ കൊലപാതകത്തിലേക്കുള്ള കാരണങ്ങളായി അവർ കരുതി വെക്കും. വൈൽഡ് ടെയ്ൽസ് പറയുന്നതും മനുഷ്യരിൽ ഉറങ്ങിക്കിടക്കുന്ന മൃഗത്തെക്കുറിച്ചാണ്. പക്ഷേ മൃഗങ്ങൾ മനുഷ്യരേക്കാൾ എത്രയോ ഭേദം..
■ ഡാമിയൻ സിഫ്രോൻ തിരക്കഥയെഴുതി സംവിധാനം നിർവഹിച്ച ബ്ലാക്ക് കോമഡി ആന്തോളജി അർജന്റൈൻ സ്പാനിഷ് ചിത്രമാണ് വൈൽഡ് ടെയ്ൽസ്. ഒരേ തീമിലുള്ള ആറു വ്യത്യസ്ത കഥാശകലങ്ങളുടെ സമാഹാരമാണ് വൈൽഡ് ടെയ്ൽസ്. ജാവിയർ ജൂലിയ ഛായാഗ്രഹണവും പാബ്ലോ ബാർബെറി കരീരയും സംവിധായകൻ ഡാമിയൻ സിഫ്രോനും ചേർന്ന് എഡിറ്റിങ്ങും നിർവഹിച്ചിരിക്കുന്നു. ഗുസ്താവോ സാന്റോലല്ലയാണ് പശ്ചാത്തല സംഗീതം ഒരുക്കിയിരിക്കുന്നത്..
✍sʏɴᴏᴘsɪs
■ വ്യത്യസ്തമായ ആറു കഥകൾ, ആറിലും വ്യത്യസ്ത അഭിനേതാക്കൾ, അതിമനോഹരമായ മേയ്ക്കിങ്; അതാണ്‌ വൈൽഡ് ടെയ്ൽസ്. ഒരു ഫ്ലൈറ്റിനുള്ളിൽ നിന്നാണ് ആദ്യ കഥ "പാസ്റ്റർനാക്" തുടങ്ങുന്നത്. രണ്ട് അപരിചതർ പരസ്പരം പരിചയപ്പെടുകയാണ്; ഒരാൾ മോഡൽ ജോലി ചെയ്യുന്ന ഇസബെല്ല, മറ്റൊരാൾ ക്ലാസ്സിക്‌ സംഗീത നിരൂപകനായ സൽഗാഡോ. പരിചയപ്പെട്ടു വരുമ്പോൾ അവരെ തമ്മിൽ ബന്ധിപ്പിക്കുന്ന ഒരു ഘടകമുണ്ട്; അതാണ്‌ പാസ്റ്റർനാക്. പാസ്റ്റർനാക്കിന്റെ മുൻകാമുകിയായിരുന്നു ഇസബെല്ല, അവൾ പാസ്റ്റർനാക്കുമായി ഉടക്കിപ്പിരിഞ്ഞതാണ്. സൽഗാഡോയാകട്ടെ പാസ്റ്റർനാക്കിന്റെ ഒരു സംഗീത ആൽബത്തെ അടിമുടി വിമർശിച്ചു കൊന്ന വ്യക്തിയുമാണ്. ഇവർ തമ്മിലുള്ള സംഭാഷണം പുരോഗമിക്കവേ പാസ്റ്റർനാക്കിനെ പരിചയമുള്ള യാത്രക്കാർ ഓരോരുത്തരായി രംഗത്ത് വരുന്നു. അതെ, യാത്രക്കാർ മുഴുവനും പാസ്റ്റർനാക്കുമായി ബന്ധമുള്ളവരും അയാളുമായി പലകാര്യങ്ങളിലും ഉടക്കിപ്പിരിഞ്ഞവരുമാണ്. പാസ്റ്റർനാക്കാണ് വിമാനത്തിലെ ക്യാബിൻ ചീഫ് എന്ന് എയർ ഹോസ്റ്റസ് അറിയിക്കുന്നതോടെ ഒരു മഹാദുരന്തത്തിന് മുൻപിലാണ് തങ്ങളെന്ന സത്യം യാത്രക്കാർ മനസ്സിലാക്കുന്നു.
Pasternak, Las ratas, El más fuerte, Bombita, La propuesta, Hasta que la muerte nos separe എന്നിങ്ങനെ ആറു കഥകളാണ് വൈൽഡ് ടെയ്ൽസ് പറയുന്നത്. ആറിന്റെയും തീം മനുഷ്യന്റെയുള്ളിലെ മൃഗവും പ്രതികാരവുമാണ്.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ മരിയ മറുൽ (ഇസബെല്ല), ഡാരിയോ ഗ്രാൻഡിനേറ്റി (സൽഗാഡോ), മോണിക്ക വില്ല (പ്രൊഫസർ ലെഗ്‌വിസമോൻ), ഡീഗോ സ്റ്റാറോസ്‌റ്റ (ഇഗ്‌നാസ്യോ ഫോണ്ടാന), ലുസില മംഗോൺ (അസാഫറ്റ) - [Pasternak], ജൂലിയേറ്റ സിൽബർബെർഗ് (മോസ), റിറ്റ കോർട്ടീസ് (കോസിനേര, കുക്ക്), സെസാർ ബോർഡോൺ (ക്യുവെൻസ), ജുവാൻ സാന്റിയാഗോ ലിനാരി (അലക്സിസ്) - [Las ratas], ലിയനാർഡോ ബറാഗ്ലിയ (ഡീഗോ), വാൾട്ടർ ഡൊണാഡോ (മരിയോ) - [El más fuerte], റിക്കാർഡോ ഡാരിൻ (സൈമൺ), നാൻസി ഡുപ്ല (വിക്ടോറിയ), ലൂയിസ് മാസിയോ (പെകോറ), നവോമി റോൺ (മെഡിയഡോറ), ആൻഡ്രിയ ഗരോട്ടെ (അബൊഗഡ), വിക്ടോറിയ റോളണ്ട് (പാസ്റ്ററേല) - [Bombita], ഓസ്കാർ മാർട്ടിനസ് (മൗറീഷ്യോ), അലൻ ഡെയ്ക്സ്‌ (സാന്റിയാഗോ), മരിയ ഓനെറ്റോ (ഹെലേന), ഒസ്മാർ നുനെസ് (വക്കീൽ), ജർമൻ ഡി സിൽവ (കസീറൊ, തോട്ടക്കാരൻ), ഡീഗോ വേലാസ്‌ക്വസ് (ഫിസ്കൽ) - [La propuesta], ഡീഗോ ജന്റിൽ (ആരിയൽ), എറിക്ക റിവാസ് (റൊമീന), മാർഗറീറ്റ മോൾഫിൻ (ലൂർദ്‌സ്), അബ്യാൻ വാൻസ്റ്റിൻ (ഇസിദോറോ), ലിലിയാന വീമർ (കുക), ക്ലൗഡിയോ ഡെലാൻ (ബോഷ), ഗ്രാസ്‌യേല ഫോഡ്രിനി (മാർഗ), മാഴ്‌സലോ പോസി (കോസിനേരോ, വെയ്റ്റർ), കമീല ഫ്രാങ്കോ (മിലി) - [Hasta que la muerte nos separe] തുടങ്ങിയവരാണ് മറ്റുപ്രധാന അഭിനേതാക്കൾ..
📎 ʙᴀᴄᴋwᴀsʜ
■ മികച്ച വിദേശഭാഷാ ചിത്രത്തിനുള്ള ഓസ്കാർ പുരസ്‌കാരത്തിന് നാമനിർദ്ദേശം ലഭിച്ചിരിക്കുന്നു. ഇംഗ്ലീഷ് ഭാഷയിലല്ലാത്ത മികച്ച ചിത്രത്തിനുള്ള BAFTA പുരസ്കാരവും കരസ്ഥമാക്കിയിരുന്നു. രണ്ട് മാസങ്ങൾ കൊണ്ട് ചിത്രീകരണം പൂർത്തിയാക്കിയ സിനിമയാണ് വൈൽഡ് ടെയ്ൽസ്. സംവിധായകനും തിരക്കഥാകൃത്തുമായ ഡാമിയൻ സിഫ്രോൻ ചിത്രത്തിൻറെ തിരക്കഥ ഭൂരിഭാഗവും എഴുതിയത് സ്വന്തം ബാത്ത് ടബ്ബിൽ വെച്ചായിരുന്നു എന്നതാണ് അതീവ കൗതുകകരം..
8.1/10 . IMDb
95% . Rotten Tomatoes
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ