Avatar » ᴀ ʀᴇᴛᴀʟɪᴀᴛᴇ
■ ഇത്രയും പോപ്പുലറായ അവതാറിനെക്കുറിച്ചു പറയണ്ട എന്ന് വിചാരിച്ചിരുന്നതാണ്. അവതാർ കാണാത്തവരുണ്ടാവില്ല എന്ന എന്റെ തെറ്റിദ്ധാരണയായിരുന്നു എന്നെ അങ്ങനെയൊരു തീരുമാനമെടുക്കാൻ മുൻപ് പ്രേരിപ്പിച്ചത്. പക്ഷേ അവതാറിന്റെ രണ്ടാം ഭാഗം അടുത്ത വർഷം ഡിസംബറോടെ വെള്ളിത്തിരയിലെത്തും, അതുകൊണ്ട് തന്നെ അവതാറിനെക്കുറിച്ചൊരു ഡീറ്റൈൽഡ്‌ റിവ്യൂ പ്രതീക്ഷിക്കുന്നു എന്ന് പല സുഹൃത്തുക്കളും ആവശ്യപ്പെട്ടത് പ്രകാരമാണ് ഈ റിവ്യൂ. 2009ൽ ലോക സിനിമയെ വിസ്മയിപ്പിച്ചുകൊണ്ട് പ്രേക്ഷകരെ ഒരു അത്ഭുതലോകത്ത് പിടിച്ചിരുത്തിയ സിനിമയായിരുന്നു ജെയിംസ് കാമറോണിന്റെ അവതാർ. അവതാർ എന്ന ചിന്ത കാമറോണിന് വന്നത് പക്ഷേ ടൈറ്റാനിക്കിനും മുൻപ് 1994ലായിരുന്നു. അന്ന് അദ്ദേഹം 80 പേജുകളോളമുള്ള കുറിപ്പ് അവതാർ എന്ന സിനിമയ്ക്ക് വേണ്ടി എഴുതിയിരുന്നു. പക്ഷേ, അതിനിടയ്ക്കാണ് ടൈറ്റാനിക് എന്ന വലിയൊരു പ്രോജക്റ്റ് കാമറോണിനെ തേടിയെത്തുന്നത്. ടൈറ്റാനിക് തീർത്ത ശേഷം 1999ൽ റിലീസ് ചെയ്യാനുള്ള പാകത്തിൽ പടമെടുക്കാം എന്ന തീരുമാനത്തിലെത്തിയ കാമറോണിനെ പക്ഷേ, അവതാർ എന്ന സിനിമയെടുക്കാൻ പോന്ന ടെക്‌നോളജി അക്കാലത്ത് വികാസം പ്രാപിച്ചിട്ടില്ലാത്തത് പിന്നോട്ട് വലിച്ചു. അങ്ങനെ അതിന് ശേഷം ഏകദേശം 2005ലാണ് അവതാറിന്‌ വേണ്ടിയുള്ള മുന്നൊരുക്കങ്ങൾ തുടങ്ങുന്നത്. പതിനഞ്ച് വർഷത്തോളമുള്ള കാത്തിരിപ്പ് ലോക സിനിമാ പ്രേക്ഷകരെ സംബന്ധിച്ചിടത്തോളം ഒരു മഹാത്ഭുതത്തിനു മുൻപുള്ള ശൂന്യതയായിരുന്നു.
■ ജെയിംസ് കാമെറോൺ തിരക്കഥയെഴുതി സംവിധാനം നിർവഹിച്ച ആക്ഷൻ അഡ്വെഞ്ചർ ഫാന്റസി എപിക് സയൻസ് ഫിക്ഷൻ ഹോളിവുഡ് ചിത്രമാണ് അവതാർ. മൗറോ ഫിയോറെ ഛായാഗ്രഹണവും സ്റ്റീഫൻ റിവ്‌കിൻ, ജോൺ റെഫോവ, ജെയിംസ് കാമറോൺ എന്നിവർ എഡിറ്റിങ്ങും നിർവഹിച്ചിരിക്കുന്നു. മൗറോ ഫിയോറെയുടെ അസാധ്യ ക്യാമറ ആംഗിളുകളും ഫ്രയിമുകളും, ഒരു രക്ഷയുമില്ല. ലോകത്തെ അക്ഷരാർത്ഥത്തിൽ ഞെട്ടിച്ച ഇതിന്റെ വിഷ്വൽ എഫക്റ്റുകളെക്കുറിച്ച് പറയാതെ ഈ റിവ്യൂ ഒരിക്കലും പൂർണ്ണമാവില്ല. ലോർഡ് ഓഫ് ദി റിങ് സീരീസ്, കിങ് കോങ്ങ്, പ്ലാനറ്റ് ഓഫ് ദി എയ്‌പ്പ് സീരീസ്, മാർവെലിന്റെയും ഡിസിയുടെയും സൂപ്പർഹീറോ ചിത്രങ്ങളടക്കം ഒട്ടുമിക്ക ഹോളിവുഡിലെ അത്ഭുത ചിത്രങ്ങൾക്കും വിഷ്വൽ എഫക്ട്സ് മനോഹരമാക്കിയ ന്യൂസിലാന്റ് കേന്ദ്രമായി പ്രവർത്തിക്കുന്ന വേറ്റ ഡിജിറ്റൽ തന്നെയാണ് അവതാറിന്റെയും വിസ്മയിപ്പിച്ച വിഷ്വൽ എഫക്ടുകൾക്ക് പിന്നിൽ. ഏതാണ്ട് 1800ൽ പരം മനുഷ്വരുടെ അധ്വാനമാണ് നമ്മൾ വിസ്മയത്തോടെ ആസ്വദിച്ചു കണ്ട അവതാറിലെ വിഷ്വൽ എഫക്റ്റുകൾ. ജെയിംസ് ഹോർണറാണ് അതിമനോഹരമായ പശ്ചാത്തല സംഗീതം അവതാറിന്‌ വേണ്ടി ഒരുക്കിയത്.
✍sʏɴᴏᴘsɪs
■ ഇരുപത്തി രണ്ടാം നൂറ്റാണ്ട് കഥാപശ്ചാത്തലം. അതിവികാസം പ്രാപിച്ച മനുഷ്യ വർഗ്ഗം. പക്ഷേ, ഇന്ത്യയടക്കം സമ്പത്സമൃദ്ധമായ ഏഷ്യൻ ആഫ്രിക്കൻ രാജ്യങ്ങളെയും ചൂഷണം ചെയ്ത് പരമദാരിദ്ര്യത്തിലേക്ക് തള്ളിവിട്ട കൊളോണിയലിസ്റ്റ് ചിന്ത ഇനിയും അവസാനിച്ചിട്ടില്ലെന്ന പാഠം തുറന്നു കാണിക്കുകയാണ് ജെയിംസ് കാമറോൺ അവതാർ എന്ന അത്ഭുത സിനിമയിലൂടെ 2100കളുടെ മധ്യത്തിൽ ഭൂമിയുടെ സകല പ്രകൃതി വിഭവങ്ങളും ഊറ്റിക്കുടിച്ച് അതിന്റെ പാരമ്യതയിലെത്തി നിൽക്കുമ്പോൾ അസംസ്‌കൃത വസ്തുക്കൾക്കായുള്ള അന്വേഷണങ്ങളാണ് മനുഷ്യരെ ക്ഷീരപദത്തിനും അപ്പുറത്ത് സ്ഥിതി ചെയ്യുന്ന പണ്ടോറ എന്ന അന്യഗ്രഹത്തിലെത്തിക്കുന്നത്. മനുഷ്യ നിലനിൽപ്പ് സാധ്യമല്ലാത്ത വിഷമയമായ അന്തരീക്ഷമായിരുന്നു പണ്ടോറയിൽ. വളരെ വിലപിടിപ്പുള്ള യുനോബ്റ്റേനിയം എന്ന അസംസ്‌കൃത വസ്തു ധാരാളമായി ആ ഗ്രഹത്തിലുണ്ടെന്ന് അവർ കണ്ടെത്തുന്നു. അവിടെ ഖനനം നടത്തണമെങ്കിൽ ഏകദേശം മനുഷ്യ പ്രകൃതിയോട് അടുത്ത് നിൽക്കുന്ന ശരീരപ്രകൃതിയുള്ള നാവി എന്ന അന്യഗ്രഹ ജീവികളെ അവിടെ നിന്നും ഒഴിപ്പിക്കണമായിരുന്നു. അതിനായി ശാസ്ത്രജ്ഞന്മാർ നാവി ഹ്യൂമൻ ഹൈബ്രിഡ്സ് എന്ന അവതാറുകളെ സൃഷ്ടിക്കുന്നു. ജനിതക ഘടനയിൽ സാമ്യമുള്ള മനുഷ്യരുടെ തലച്ചോറുകളുമായി ബന്ധിപ്പിച്ചാൽ ഈ അവതാറുകളെ നിയന്ത്രിക്കാൻ പറ്റും എന്നുള്ളതായിരുന്നു പ്രത്യേകത. അങ്ങനെ നാവികളുടെ സമൂഹത്തിൽ നുഴഞ്ഞുകയറി ചാരപ്പണി ചെയ്ത് അവരെ പണ്ടോറയിൽ നിന്നും ഒഴിപ്പിക്കുക എന്ന ദൗത്യം മുൻപ് സൈന്യത്തിൽ പ്രവർത്തിച്ചു വികലാംഗനായ ജെയ്ക് സുള്ളിയെ ശാസ്ത്രജ്ഞർ ഏൽപ്പിക്കുന്നു.
👥ᴄᴀsᴛ & ᴘᴇʀfᴏʀᴍᴀɴᴄᴇs
■ സാം വർത്തിങ്ടനാണ് ജെയ്ക് സുള്ളിയെന്ന നായക കഥാപാത്രമായി അഭിനയിച്ചിരിക്കുന്നത്. അവതാർ പ്രോഗ്രാമിന്റെ തലവയായ ഡോ. ഗ്രേസ് അഗസ്റ്റിനായി സിഗോർണി വീവറും വേഷമിട്ടിരിക്കുന്നു. സോ സൽദാനയാണ് നാവി സമൂഹത്തിന്റെ നേതാവിന്റെ മകൾ നെയ്റ്റിരിയെ അവതരിപ്പിച്ചിരിക്കുന്നത്. സ്റ്റീഫൻ ലാങ് (കേണൽ മൈൽസ് ക്വാറിച്ച്), മിഷേലി റോഡ്രിഗസ് (ട്രൂഡി ചാക്കോൻ), ജിയോവനി റിബിസി (പാർക്കർ സെൽഫ്രിഡ്‌ജ്‌), ജോയൽ ഡേവിഡ് മൂർ (ഡോ. നോർമ് സ്പെൽമാൻ), ദിലീപ് റാവു (ഡോ. മാക്സ് പട്ടേൽ), CCH പൗണ്ടർ (മോവാത്), വെസ് സ്റ്റുഡി (എയ്‌റ്റുകൻ), ലാസ് അലോൺസോ (സൂ ടെയ്) തുടങ്ങിയവരാണ് മറ്റു പ്രധാന അഭിനേതാക്കൾ.
📎 ʙᴀᴄᴋwᴀsʜ
■ ലോകത്തിൽ ഏറ്റവും കൂടുതൽ കളക്ഷൻ നേടിയ സിനിമയെന്ന ഖ്യാതി ഇപ്പോഴും അവതാർ എന്ന വിസ്മയ ചിത്രത്തിൻറെ പേരിനൊപ്പമാണ്. മികച്ച ഛായാഗ്രഹണം (മൗറോ ഫിയോറെ), മികച്ച വിഷ്വൽ എഫെക്ട്സ്, മികച്ച കലാസംവിധാനം എന്നീ കാറ്റഗറിയിൽ മൂന്ന് ഓസ്കാർ പുരസ്‌കാരങ്ങളാണ് അവതാർ നേടിയത്. അവതാറിൽ നാവികൾ സംസാരിക്കുന്ന ഭാഷ ലോകത്ത് മനുഷ്യർ സംസാരിക്കുന്ന ഒരു ഭാഷയുമല്ല. പ്രശസ്ത ഭാഷാ ശാസ്ത്രജ്ഞൻ ഡോ. പോൾ R. ഫ്രോമറാണ് അത് പൂർണ്ണമായും കൃത്രിമമായി ഉണ്ടാക്കിയത്. അവതാറുകളുടെ നീല നിറത്തിന് പ്രചോദനമായത് ഹിന്ദു പുരാണങ്ങളിലെ ദേവകളാണെന്ന് കാമറോൺ ഒരു ഇന്റർവ്യൂവിൽ വെളിപ്പെടുത്തിയിരുന്നു. അവതാറിന്‌ 1992ലിറങ്ങിയ മോഹൻലാൽ ചിത്രം വിയറ്റ്‌നാം കോളനിയുടെ പ്രമേയവുമായി അടുത്ത സാമ്യമുണ്ടായത് വെറും യാദൃശ്ചികമാണെന്നു ഞാൻ കരുതുന്നില്ല, കാരണം കാമറോൺ തന്നെ ഒരു ഇന്റർവ്യൂവിൽ പറഞ്ഞിട്ടുണ്ട്, 1995ലാണ് അവതാറിന്റെ തിരക്കഥ അദ്ദേഹം പൂർണ്ണമാക്കിയതെന്നും സിനിമയുടെ ടൈറ്റിലടക്കം ഇന്ത്യയിൽ നിന്നും പ്രചോദനം ഉൾക്കൊണ്ടതാണെന്നും. അവതാറിന്റെ വൻവിജയത്തിനു ശേഷം ജെയിംസ് കാമെറോൺ വിതരണക്കാരായ 20th Century Foxമായി നാലോളം സീക്വലുകൾക്ക് വേണ്ടിയാണ് കരാർ ഒപ്പ്‌ വെച്ചത്. അവതാറിന്‌ ശേഷം കാമറോൺ ഒരു ഫീച്ചർ ഫിലിമും സംവിധാനം ചെയ്തിട്ടില്ല എന്നതുകൊണ്ട് തന്നെ അവതാറിന്റെ തുടർ ഭാഗങ്ങൾ വിസ്മയങ്ങളുടെ വിസ്മയങ്ങളായിരിക്കും എന്നത് തീർച്ച. Something Biggest is coming..
7.8/10 . IMDb
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ