The Girl With The Dragon Tattoo » ᴀ ʀᴇᴛᴀʟɪᴀᴛᴇ
■ വസ്ത്രധാരണ രീതി കൊണ്ട് സമൂഹത്തിൽ തെറ്റിദ്ധരിക്കപ്പെടുന്നവർ ഏറെയാണ്. നല്ല കട്ടത്താടിയും മുടിയും വളർത്തി നടക്കുന്ന ചെറുപ്പക്കാരെ കഞ്ചാവാണെന്നും മയക്കുമരുന്നാണെന്നും പറഞ്ഞ് ഒരു കാര്യവുമില്ലാതെ പുറമെയുള്ള ലുക്ക് മാത്രം നോക്കി അകത്തിടാറുണ്ടായിരുന്നു ഒരു കാലത്ത് പോലീസ്. ഇന്നലെ തന്നെ തന്റെ മുടി പോലീസുകാർ പിടിച്ചു വെട്ടിയെന്നു ഒരു പയ്യൻ കരഞ്ഞുകൊണ്ട് പറഞ്ഞ വീഡിയോ നമ്മളെല്ലാവരും കണ്ടതാണ്. അതിനെതിരെയുള്ള പ്രതിഷേധം എന്ന നിലയിലായിരുന്നു ഒരു മെക്സിക്കൻ അപാരത എന്ന സിനിമയിൽ "ഞങ്ങൾ താടി വളർത്തും മീശ വളർത്തും മുട്ടോളം മുട്ടറ്റം മുടിയും വളർത്തും" എന്ന പാട്ടിറങ്ങിയത്. മഹാപ്രളയത്തിന്റെ സമയത്താണ് പുറമെയുള്ള ലുക്കിന്റെ പേരിൽ മാത്രം ഫ്രീക്കന്മാരെന്നും കഞ്ചാവെന്നും പറഞ്ഞ് നമ്മൾ അകറ്റി നിർത്തിയ അതേ ചെറുപ്പക്കാരുടെ വില കേരളമറിഞ്ഞത്. അതുകൊണ്ട് ലുക്കിലൊന്നും വല്ല്യ കാര്യമില്ല, വർക്കിലാണ് കാര്യം. അങ്ങനെ തെറ്റിദ്ധരിക്കപ്പെട്ട സമൂഹത്തിന്റെ പ്രതിനിധിയാണ് ഇതിലെ നായിക ലിസ്ബെത്ത്. ശരിക്കും ആരായിരുന്നു ദി ഗേൾ വിത്ത് ദി ഡ്രാഗൺ ടാറ്റൂ എന്ന ലിസ്ബെത്ത് സലാൻഡർ.
■ ഡേവിഡ് ഫിഞ്ചർ സംവിധാനം നിർവഹിച്ച സൈക്കോളജിക്കൽ ഇൻവെസ്റ്റിഗേഷണൽ ക്രൈം ത്രില്ലർ ഹോളിവുഡ് ചിത്രമാണ് ദി ഗേൾ വിത്ത് ദി ഡ്രാഗൺ ടാറ്റൂ. സ്വീഡിഷ് നോവലിസ്റ്റായ സ്റ്റീഗ് ലാർസന്റെ ഇതേ പേരിലുള്ള നോവലിനെ അടിസ്ഥാനമാക്കി സ്റ്റീവൻ സൈലിയനാണ് തിരക്കഥ രചിച്ചിരിക്കുന്നത്. മില്ലേനിയം ഫിലിം സീരീസിലെ ആദ്യത്തെ സിനിമയാണിത്. സ്റ്റീഗ് ലാർസന്റെ മില്ലേനിയം നോവൽ ട്രയോളജിയെ ആസ്പദമാക്കി സ്വീഡിഷിൽ ഫിലിം സീരീസുകളും ടെലിവിഷൻ സീരീസുകളും ഉണ്ടായിട്ടുണ്ട്. അതിന്റെയൊക്കെ റീമേക്ക് എന്ന് പറയാം ഈ സിനിമയെ. ഫെഡെ അൽവാരസ് സംവിധാനം നിർവഹിച്ച ദി ഗേൾ ഇൻ ദി സ്പൈഡേഴ്സ് വെബ് ആണ് ഈ ഹോളിവുഡ് സീരീസിലെ രണ്ടാമത്തെ സിനിമ. ജെഫ് ക്രോണൻവേത് ഛായാഗ്രഹണവും കിർക് ബാക്സ്റ്ററും ആംഗസ് വാളും ചേർന്ന് എഡിറ്റിങ്ങും നിർവഹിച്ചിരിക്കുന്നു. ട്രെന്റ് റെസ്നോറും അറ്റിക്കസ് റോസും ചേർന്നൊരുക്കിയ അതിഗംഭീര പശ്ചാത്തല സംഗീതമാണ് ഈ സിനിമയുടെ മറ്റൊരു പ്രത്യേകത.
✍sʏɴᴏᴘsɪs
■ സ്വീഡനിലെ പ്രശസ്ത ലൈഫ് സ്റ്റൈൽ മാഗസിന്റെ സഹഉടമസ്ഥനും മാധ്യമപ്രവർത്തകനുമായ മൈക്കൽ ബ്ലോൻക്വിസ്റ്റ്, സ്വീഡനിലെ അറിയപ്പെടുന്ന ഒരു ബിസിനെസ്സുകാരനായിരുന്ന ഹാൻസ്-എറിക് വെന്നർസ്ട്രോമിനെതിരെ അഴിമതിയാരോപിച്ച് തന്റെ മാഗസിനിലെഴുതിയത് തെളിയിക്കുന്നതിൽ പരാജയപ്പെടുന്നു. അങ്ങനെ തന്റെ കരിയറിന്റെ മഹാമോശം സമയത്ത് നിൽക്കുമ്പോഴാണ് അയാളെത്തേടി സ്വീഡനിലെ ഏറ്റവും വലിയ ബിസിനെസ്സ് കുടുംബമായിരുന്ന വാംഗർ കുടുംബത്തിന്റെ തലവൻ ഹെൻറിക് വാംഗറിൽ നിന്നും ഒരു ഓഫർ വരുന്നത്. തന്റെ ഓർമ്മക്കുറിപ്പുകൾ എഴുത്തുകയെന്ന വ്യാജേന നാല്പത്ത് വർഷങ്ങൾക്ക് മുൻപ്, അതായത് 1966ൽ നടന്ന ഒരു സംഭവത്തെക്കുറിച്ച് അന്വേഷിക്കണം. തന്റെ സഹോദരൻ റിക്കാർഡിന്റെ കൊച്ചുമകളായിരുന്ന ഹാരിയറ്റ് എന്ന പതിനാറുകാരിയെ കാണാതായത് അന്നുമുതലാണ്. ഹാരിയറ്റ് കൊല്ലപ്പെട്ടെന്ന് തന്നെ വിശ്വസിക്കുന്ന ഹെൻറിക് വാംഗർ, ഹാരിയറ്റിന്റെ തിരോധാനത്തിന് പിന്നിലുള്ള രഹസ്യം കണ്ടുപിടിക്കാൻ മൈക്കലിന് മുന്നിലേക്ക് വലിയൊരു ഓഫർ നീട്ടുന്നു. വലിയൊരു പ്രതിഫലവും പിന്നെ മൈക്കലിനെ അപമാനിതനാക്കിയ ഹാൻസ്-എറിക് വെന്നർസ്ട്രോമിന്റെ അഴിമതികളെക്കുറിച്ചുള്ള ഞെട്ടിക്കുന്ന തെളിവുകളും. അതും ഹാരിയറ്റിന്റെ തിരോധാനത്തെക്കുറിച്ചുള്ള രഹസ്യങ്ങൾ കണ്ടുപിടിച്ചാലും ഇല്ലെങ്കിലും..
👥ᴄᴀsᴛ & ᴘᴇʀfᴏʀᴍᴀɴᴄᴇs
■ ജെയിംസ് ബോണ്ട് സിനിമകളിലൂടെ ആരാധകരുടെ ഹൃദയം കീഴടക്കിയ ഡാനിയേൽ ക്രെയ്ഗ് ആണ് മൈക്കൽ ബ്ലോൻക്വിസ്റ്റ് എന്ന മാധ്യമപ്രവർത്തകനായി വേഷമിട്ടിരിക്കുന്നത്. മൈക്കലിന്റെ ഈ റോളിന് വേണ്ടി ഡാനിയേൽ ക്രെയ്ഗ് മത്സരിച്ചത് ബ്രാഡ് പിറ്റ്, ജോർജ് ക്ലൂണി, ജോണി ഡെപ്പ് തുടങ്ങിയ പ്രഗത്ഭരോടായിരുന്നു എന്നറിയുക. ലിസ്ബെത് സലാൻഡറെന്ന, ഒരു തരത്തിലും പിടിതരാത്ത അസ്ഥിര സ്വഭാവ സവിശേഷതകളുള്ള പെൺകുട്ടിയായി റൂണി മാര വിസ്മയിപ്പിക്കുന്ന പ്രകടനമാണ് നടത്തിയത്. ലിസ്ബെത്തിന്റെ വേഷത്തിനായി രംഗത്തുണ്ടായിരുന്നത് നതാലി പോർട്മാൻ, ക്രിസ്റ്റൻ സ്റ്റിവാർട്ട്, ജെന്നിഫർ ലോറൻസ്, എമ്മ വാട്സൺ, സ്കാർലറ്റ് ജോഹാൻസൺ തുടങ്ങിയവരായിരുന്നു. ഇവരെയൊക്കെ മറികടന്നാണ് റൂണി മാര, ലിസ്ബെത് സലാൻഡറായി സ്ക്രീനെത്തിയത്. വാംഗർ ഫാമിലിയുടെ തലവനായ ഹെൻറിക് വാംഗറായി അഭിനയിച്ചിരിക്കുന്നത് ക്രിസ്റ്റഫർ പ്ലമ്മറാണ്. ഹാരിയാറ്റിന്റെ സഹോദരൻ മാർട്ടിൻ വാംഗറായി സ്റ്റെല്ലാൻ സ്കാസ്ഗാർഡും വേഷമിട്ടിരിക്കുന്നു. റോബിൻ റൈറ്റ് (എറിക്ക ബെർഗെർ, മില്ലേനിയം മാഗസിന്റെ സഹഉടമ), സ്റ്റീവൻ ബെർക്കോഫ് (ഡിർച്ച് ഫ്രോഡെ), യോറിക്ക് വാൻ വാഗാനിംഗൻ (നിൽസ് ജുർമാൻ/ലിസ്ബെത്തിന്റെ ലീഗൽ ഗാർഡിയൻ), മോവ ഗാർപെന്റാൽ (ഹാരിയറ്റ് വാംഗർ), ജോയേലി റിച്ചാർഡ്സൺ (അനീറ്റ), ജോസഫൈൻ ആസ്പ്ലൻഡ് (പെർനില്ല ബ്ലോൻക്വിസ്റ്റ്, മൈക്കലിന്റെ മകൾ), ഉൾഫ് ഫ്രിബെർഗ് (ഹാൻസ്-എറിക് വെന്നർസ്ട്രോം) തുടങ്ങിയവരാണ് മറ്റുപ്രധാന അഭിനേതാക്കൾ..
📎 ʙᴀᴄᴋwᴀsh
■ മികച്ച ഫിലിം എഡിറ്റിംഗിനുള്ള ഓസ്കാർ പുരസ്കാരം ലഭിച്ചിരുന്നു. ലിസ്ബെത് സലാണ്ടറായുള്ള ഗംഭീര പ്രകടനത്തിന് റൂണി മാരയ്ക്ക് മികച്ച നടിക്കുള്ള ഓസ്കാർ നാമനിർദ്ദേശവും ലഭിച്ചിരുന്നു. കൂടാതെ മികച്ച ഛായാഗ്രഹണം, മികച്ച ശബ്ദമിശ്രണം, മികച്ച സൗണ്ട് എഡിറ്റിംഗ് എന്നിവയ്ക്കുള്ള ഓസ്കാർ നാമനിർദ്ദേശങ്ങളും ലഭിച്ചിരുന്നു. ലിസ്ബെത് സലാൻഡർ എന്ന കഥാപാത്രത്തിന് വേണ്ടി റൂണി മാര ചെയ്ത പല ബോഡി പിയേഴ്സിങ്ങുകളും ഒറിജിനലായിരുന്നു, മേയ്ക്കപ്പല്ല. മാത്രമല്ല, ആ കഥാപാത്രത്തിന് വേണ്ടി റൂണി സംവിധായകൻ ഡേവിഡ് ഫിഞ്ചർ പറയാതെ തന്നെ ശരീരഭാരം കുറച്ചിരുന്നു. ഡാനിയേൽ ക്രൈഗ് തന്റെ കഥാപാത്രം ജെയിംസ് ബോണ്ട് തന്നെയാണ് എന്ന് പ്രേക്ഷകർ തെറ്റിദ്ധരിക്കരുത് എന്ന് കരുതി ശരീരഭാരം കൂട്ടിയിരുന്നു..
7.8/10 . IMDb
86% . Rotten Tomatoes
Riγαs Ρυliκκαl
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ