Vaanmagal » ᴇxᴘʟᴀɪɴᴇᴅ
■ ദുരഭിമാനക്കൊലകൾ പ്രമേയമാക്കിയ നാല് കൊച്ചു സിനിമകൾ ചേർന്നതായിരുന്നു പാവ കഥൈകൾ. പക്ഷേ, പാവ കഥൈകളിലെ മൂന്നാമത്തെ സെഗ്മെന്റായ ഗൗതം മേനോന്റെ വാന്മകൾ ഭൂരിഭാഗം പ്രേക്ഷകരും കണ്ടതും മനസ്സിലാക്കിയതുമായ ഒരു കഥയേ അല്ല എന്ന് ഞാൻ പറഞ്ഞാൽ..?
▪️അതെ, ഗൗതം മേനോന്റെ വാന്മകൾ പറഞ്ഞ യഥാർത്ഥ കഥയെക്കുറിച്ചാണ് ഇനി ഞാൻ പറയാൻ പോകുന്നത്.. ഇനി സ്പോയ്ലറുകളുടെ വരവാണ്. അതുകൊണ്ട് പാവക്കഥൈകൾ, പ്രത്യേകിച്ച് തുടർന്ന് വായിക്കരുത്..
🚫Spoiler Ahead 👇
▪️വീഡിയോയിലേക്ക് കടക്കുന്നതിന് മുൻപ് വാന്മകൾ കണ്ട പ്രേക്ഷകരായ നിങ്ങളോട് ഞാനൊരു ചോദ്യം ചോദിക്കട്ടെ..?
▪️വാന്മകളിൽ സ്വന്തം മകളായ പൊന്നുതായിയെ അവളുടെ അമ്മ മതി കൊല്ലുന്നുണ്ടോ..?
ഇല്ല എന്നാണ് നിങ്ങളിൽ ഭൂരിപക്ഷത്തിന്റെയും ഉത്തരം എങ്കിൽ അത് വലിയൊരു തെറ്റിദ്ധാരണയാണ്. കഴിഞ്ഞ റിവ്യൂവിൽ പാവ കഥൈകളിലെ ഊര് ഇരവ് എന്ന സെഗ്മെന്റിന്റെ ഉത്തരമാണ് ഗൗതം മേനോന്റെ വാന്മകൾ എന്ന് വരെ ഞാൻ തള്ളിയിരുന്നു. കാരണം, പാവ കഥൈകൾ പറഞ്ഞ നാല് കഥകളിൽ മൂന്നിന്റെയും എക്‌സെപ്ഷൻ ആയിട്ടായിരുന്നു ഞാൻ വാന്മകളെ മനസ്സിലാക്കിയത്. ദുരഭിമാന കൊലകളെക്കുറിച്ച് നാല് സിനിമകളും പറയുമ്പോൾ വാന്മകളിൽ മാത്രം ദുരഭിമാന കൊല നടക്കുന്നില്ല.. എന്നായിരുന്നു ഞാൻ കരുതിയത്. "ഏതോ ഒരു മൃഗം ചെയ്ത തെറ്റിന് വേണ്ടി ഞാൻ ജീവനെപ്പോലെ വളർത്തിയ സ്വന്തം മകളെ കൊല്ലുകയോ..?" എന്ന വീണ്ടുവിചാരത്തിൽ ആ ചിന്തയെ തന്നെ ശപിച്ചു പിന്മാറുന്ന മതി. മനസ്സിന് പരിപൂർണ്ണ തൃപ്തി തന്ന ക്ലൈമാക്സ്‌. പക്ഷേ, ഗൗതം മേനോൻ വാന്മകളിലൂടെ പ്രേക്ഷകരെ സമർത്ഥമായി പറ്റിക്കുകയായിരുന്നു എന്നത് ഞാൻ ഷഹീനുമായുള്ള തർക്കത്തിന് ശേഷമാണ് മനസ്സിലാക്കിയത്. കാരണം, അതിന് ശേഷം ഷഹീന്റെ വാദഗതിയെ ഖണ്ടിക്കുക എന്ന ഉദ്ദേശ്യത്തോടെ ഞാൻ വാന്മകൾ ഒരു മൂന്ന് നാല് പ്രാവശ്യമെങ്കിലും കണ്ടു. അതിന് ശേഷം ഒരു നിഗമനത്തിൽ എത്തി. ഷഹീൻ പറഞ്ഞ അതേ നിഗമനത്തിൽ. മതി തന്റെ ദുരഭിമാനം സംരക്ഷിക്കാൻ പൊന്നുപോലെ വളർത്തിയ സ്വന്തം മകൾ പൊന്നുതായിയെ മല മുകളിൽ നിന്നും തള്ളിയിട്ടു കൊല്ലുന്നു. ദുരഭിമാനക്കൊല അവിടെയും സംഭവിച്ചിരിക്കുന്നു. പാവ കഥൈകളിലെ ബാക്കി മൂന്ന് കഥകളിൽ നിന്നും ഒട്ടും എക്‌സെപ്‌ഷനലല്ല വാന്മകളും എന്ന് ഞാൻ തിരിച്ചറിയുകയാണ്.
▪️ഇനി വാന്മകളുടെ തുടർച്ചയായ റീവാച്ചിന് ശേഷം എന്റെ കണ്ടെത്തലുകളും അതിന് തക്കതായ തെളിവുകളും.
▪️ഗൗതം രണ്ടു രീതിയിൽ Output കിട്ടണമെന്ന് ആഗ്രഹിച്ച് ചെയ്തത് തന്നെയാണ് വാന്മകൾ. ഒരു തരത്തിൽ പ്രേക്ഷകരെ സമർത്ഥമായി കബളിപ്പിച്ചിരിക്കുന്നു. കാരണം, രണ്ട് വിഭാഗം പ്രേക്ഷകരെയും ഗൗതമിന് തൃപ്തിപ്പെടുത്തണമായിരുന്നു. ഇപ്പോഴും പഴഞ്ചൻ ചിന്താഗതി വെച്ചുപുലർത്തുന്ന യാഥാസ്ഥിതികരെയും നിലവിൽ പുരോഗമന ചിന്ത പിന്തുടരുന്ന നമ്മളെപ്പോലെയുള്ള ന്യൂജനറേഷനെയും. അതുകൊണ്ട് ഗൗതം, വാന്മകൾ എടുത്തിരിക്കുന്നത് നോൺ ലീനിയറായാണ്. പക്ഷേ, ലീനിയറാണെന്ന് ബഹുഭൂരിപക്ഷത്തെയും തെറ്റിദ്ധരിപ്പിച്ചിരിക്കുന്നു. സിനിമയിലെ നോൺ ലീനിയർ ഭൂരിപക്ഷവും കണ്ടിട്ടില്ല, അല്ലെങ്കിൽ മനസ്സിലാക്കിയിട്ടില്ല.
▪️ക്ലൈമാക്സിൽ മതി ഉടുത്തിരിക്കുന്ന ഡ്രസ്സ്‌ ശ്രദ്ധിക്കുക. ഒരു പിങ്ക് സാരിയും കസവു ബോർഡറുള്ള ബ്ലൗസുമാണ് ധരിച്ചിരിക്കുന്നത്. അത് ശ്രദ്ധിച്ചാൽ മനസ്സിലാക്കാൻ കഴിയുന്നത് ആ സീനിന്റെ തുടർച്ചയാണ് പൊന്നുത്തായിയെ അന്വേഷിച്ച് വരുന്ന ഭർത്താവിന്റെ ചേച്ചിയുടെയും അയൽക്കാരുടെയും സീൻ. മതി എന്തോ ശബ്ദം കേട്ട് ജനലിലൂടെ നോക്കിയിട്ട് ജനൽ അടയ്ച്ചു താഴേക്ക് പോകുന്നതാണ് ക്ലൈമാക്സ്‌ സീൻ. ആ സീനിൽ മതിയും പൊന്നുതായിയും വീടിന്റെ ഒന്നാം നിലയിൽ ആണ്. പുറത്തെ ശബ്ദം കേട്ട് ചെന്നു നോക്കുന്ന മതിക്ക് ബന്ധുക്കൾ വന്നത് കാണാൻ കഴിയുന്നു. ശേഷം പൊന്നുതായിയെ മുകളിൽ കിടത്തിയിട്ട് താഴേക്ക് ഇറങ്ങി വന്ന് ബന്ധുക്കൾക്ക് വാതിൽ തുറന്നു കൊടുക്കുന്നു. തൊട്ടുമുൻപത്തെ സീനിൽ മതി തന്റെ മകളെ കൊല്ലാൻ ഉദ്ദേശിച്ച തന്റെ മനസ്സിനെ ശപിച്ചു കൊണ്ട് തന്റെ മകൾ കൊല്ലപ്പെടേണ്ടവൾ അല്ലെന്ന ദൃഢനിശ്ചയത്തിലാണ് താഴേക്ക് ഇറങ്ങുന്നത്. പക്ഷേ, പൊന്നുതായിയെ കാണണമെന്ന് വാശി പിടിച്ച കുടുംബക്കാരോട് കയർത്തു സംസാരിക്കുന്ന മതിയുടെ മനസ്സ് പഴയ യാഥാസ്ഥിതിക മനോഭാവത്തിലേക്ക് തന്നെ മടങ്ങുകയാണ്. കാരണം, സമൂഹം കൽപ്പിച്ചു കൊടുത്തത് അങ്ങനെയാണ്. ഏതോ ഒരു മൃഗം ചെയ്ത തെറ്റ് കൊണ്ടാണെങ്കിലും പൊന്നുത്തായിയുടെ ശരീരം കളങ്കപ്പെട്ടു എന്ന് മതി എന്ന യാഥാസ്ഥിതിക അമ്മ വിശ്വസിക്കുന്നുണ്ട് എന്നത് മുൻപ് മതി പല തവണ തന്റെ മകൾ പൊന്നുതായിയെ കുളിപ്പിക്കുന്ന രംഗങ്ങളിലൂടെ ഗൗതം മേനോൻ വ്യക്തമാക്കുന്നുണ്ട്. ഈ സീനുകളെല്ലാം പൊന്നുതായിക്ക് സംഭവിച്ച ദുരന്തത്തിന് ഉടൻ സംഭവിച്ചതാണെന്ന് അനുമാനിക്കാം. അതിന് ശേഷം മതിയും സത്യയും വീടിന്റെ ടെറസിൽ ഇരുന്ന് സംസാരിക്കുമ്പോൾ സത്യ പറയുന്നുണ്ട് മൂന്ന് ആഴ്ച്ചയ്ക്ക് മേലെയായി പൊന്നുതായിയെ സ്കൂളിൽ വിട്ടിട്ട്, നാളെ അവളെ സ്കൂളിൽ വിടാം എന്ന്. അതിന് മതി പറയുന്നത് നാളെ സ്കൂളിൽ വിടേണ്ട എന്നാണ്. അതിന് ശേഷമാണ് സത്യ കുടുംബത്തേക്കൂട്ടി മലമുകളിലുള്ള അമ്പലത്തിലേക്ക് പോകുന്നത്. അതായത് സംഭവം നടന്ന് മൂന്ന് ആഴ്ച്ചകൾക്ക് ശേഷം. അപ്പോഴേക്കും മതി സ്വന്തം മകളെ കൊല്ലാൻ തന്നെ കണക്കുകൂട്ടിയിരുന്നു. പിന്നീട് മതി മകളെ തള്ളിയിട്ടു കൊല്ലുന്നതും, മകൻ ഭരത് തെറ്റ് ചെയ്തവനെ കണ്ടെത്തി ശിക്ഷിക്കുന്നതും ഒരേ സമയത്ത് തന്നെയാണ് എന്നാണ് അനുമാനം.
▪️അങ്ങനെയെങ്കിൽ വാന്മകളുടെ യഥാർത്ഥ ക്ലൈമാക്സ്‌ എന്താണ്?
▪️പൊന്നുതായിയെ മലമുകളിൽ നിന്നും തള്ളിടുന്ന സീനിനിടയ്ക്ക് സത്യയും മതിയും അവരുടെ "ഒരു മകളും" ഉള്ള ഒരു ബെഡ് റൂം സീൻ കാണാം. അതിലുള്ള മകൾ പൊന്നുതായിയാണ് എന്നാണ് ഞാനടക്കമുള്ള പലരും വിശ്വസിച്ചിരുന്നത്. പക്ഷേ, യഥാർത്ഥത്തിൽ ആ സീനിലുള്ളത് അവരുടെ മൂത്ത മകൾ വൈദേഹിയാണ്. അവൾ അണിഞ്ഞ കമ്മൽ ശ്രദ്ധിച്ചാൽ അത് വ്യക്തമാകും. കാരണം, വൈദേഹിയാണ് വലുപ്പമുള്ള ജിമിക്കി കമ്മൽ ഉപയോഗിക്കുന്നതെന്ന് വാന്മകൾ കൂടുതൽ നിരീക്ഷിച്ചു കണ്ടാൽ മനസ്സിലാകും. പൊന്നുതായി കൊല്ലപ്പെട്ടതിനു ശേഷമുള്ള സീനാണ് ഇതെന്ന് അതിൽ നിന്നും അനുമാനിക്കാം. "നീ വാനത്തിൽ പറക്കാനായി ജനിച്ചവളാണ് പൊന്നുതായീ." എന്ന് പറഞ്ഞു കാണിക്കുന്ന കറുത്ത ആകാശത്തിന്റെയും മിന്നിത്തിളങ്ങുന്ന നക്ഷത്രങ്ങളുടെയും ചിത്രമാണ് വാന്മകളുടെ യഥാർത്ഥ ക്ലൈമാക്സ്‌.
Riγαs Ρυliκκαl
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ